JINGKHEIÑ 19
19
Ka jingpynkhuid ïa u batngit
1Te U Trai u la kren pat ha u Moses, bad ha u Aaron, u da ong, 2“Kane ka long ka rukom jong ka hukum ïa kaba U Trai u la hukum, u da ong, ‘To kren ha ki khun Israel, ba kin wallam ha me ïa ka masi lud basaw ba-tlem, ha kaba ym don ka jingduna, bad ha kaba ym shym la buh ïa ka jwar mynno mynno ruh: 3Te phin aiti ïa ka ha u Eleasar lyngdoh, ba un ïalam ïa ka shabar ka jaka shong dara, te uno uno uwei un pynïap ïa ka ha khmat jong u: 4bad u Eleasar lyngdoh un shim na ka snam jong ka da ka shynriah'ti jong u, bad un synreit na ka snam jong ka beit sha khmat Ka Tabernakl ka jingïaseng, hynñiew sien: 5te uno uno uwei un thang ïa kata ka masi lud ha khmat jong u; ïa ka snieh jong ka, bad ïa ka doh jong ka, bad ïa ka snam jong ka, lem bad ka eit jong ka, un thang. 6Te u lyngdoh un shim ïa u dieng Kedar, bad ïa u Hyssop, bad ïa ka basaw hain hain, un bred ruh ïa ka hapdeng kata ka jingthang ïa kata ka masi lud. 7Ynda kumta, u lyngdoh un sait ïa la ki jaiñ, bad un sum ïa la ka met ha ka um, hadien kata, to ai ba un wan ha kata ka jaka shong dara, bad u lyngdoh un long u bymkhuid haduh janmiet. 8Te uta ruh uba la thang ïa ka, un sait ïa la ki jaiñ ha ka um, bad un sum ruh ïa la ka met ha ka um, bad un long u bymkhuid haduh janmiet. 9#Heb. 9:13.Te u briew u bakhuid un khur ïa ka dpei kata ka masi lud, bad un buh ruh ïa ka habar ka jaka shong dara, ha ka jaka ka bakhuid, bad un sumar de ïa ka ïa u paidlang ki khun Israel, ban long ka um ka jingpynkhuid: ka long ka jingkñia namar ka pop. 10Te uta uba khur ïa kata ka dpei jong kata ka masi lud, un sait ïa la ki jaiñ, bad un long u bymkhuid haduh janmiet: te ha ki khun Israel, bad ha u nongwei uba wanhap hapdeng jong ki, kane kan long ka hukum bymjukut.
11“ ‘Uta uba ktah ïa ka metïap jong uno uno u briew, un long u bymkhuid, hynñiew sngi. 12Ha ka sngi ka balai, un pynkhuid ïa lade da kata ka um, bad ha ka sngi ka bahynñiew, un long u bakhuid: hynrei, lada un ym pynkhuid ïa lade ha ka sngi ka balai, te un ym long u bakhuid ha ka sngi ka bahynñiew. 13Uno uno ruh uba ktah ïa ka metïap jong uno uno u briew uba la ïap, hynrei, u bym pynkhuid ïa lade, u pyntngit ïa Ka Tabernakl U Trai; bad ïa kata ka mynsiem yn ot noh na Israel: namar ba ym shym la synreit ïa kata ka um ka jingpynkhuid halor jong u, un long u bymkhuid; ka jingbymkhuid jong u ka dang sah keiñ ha u.
14“ ‘Kane ka long ka hukum haba u briew u ïap ha ka ïingjaiñ: kita baroh kiba wan hapoh kata ka ïingjaiñ, bad kita baroh kiba la don hapoh kata ka ïingjaiñ, kin long ki bymkhuid, hynñiew sngi. 15Ka jingdiang baroh ruh kaba rynghang, ïa kaba ym shym la teh jingtap halor jong ka, ka long ka bymkhuid. 16Uno uno ruh uba ktah ïa kaba la pynïap noh da ka waitlam ha ka lyngkha, lane ïa ka metïap, lane ïa ka shyieng jong u briew, lane ïa ka jingtep, un long u bymkhuid, hynñiew sngi. 17Te namar uta u bymkhuid, kin shim na ka dpei jong kata kaba thang ïa ka jingkñia namar ka pop, bad ïa ka um na kaba tuid ruh yn buh ha ka, ha ka pliang: 18bad u briew u bakhuid un shim ïa u Hyssop, bad un wieh ïa u ha kata ka um, bad un synreit ïa ka halor kata ka ïingjaiñ, bad halor ki pliang baroh, bad halor ki briew kat kiba la don hangta, bad halor uta uba la ktah ïa ka shyieng, lane ïa uba la pynïap noh, lane ïa uba la ïap hi, lane ïa ka jingtep: 19te uta u bakhuid un synreit halor uta u bymkhuid ha ka sngi ka balai, bad ha ka sngi ka bahynñiew de: te ha ka sngi ka bahynñiew, un pynkhuid ïa lade; bad un sait ruh ïa la ki jaiñ, bad un sum ïa lade ha ka um, te ha kaba la janmiet, un long bakhuid.
20“ ‘Hynrei, uta u briew ïa uba la pyntngit, bad u ban ym pynkhuid ïa lade, ïa kata ka mynsiem yn ot noh napdeng u paidlang, namar u la pynsang ïa ka jaka kyntang ka jong U Trai: ïa ka um ka jingpynkhuid ym shym la synreit halor jong u; u long u bymkhuid. 21Te kan long ka hukum bymjukut ha ki: bad uta uba synreit ïa ka um ka jingpynkhuid, un sait ïa la ki jaiñ; bad uta uba ktah ïa ka um ka jingpynkhuid, un long u bymkhuid haduh janmiet. 22Bad kiei kiei baroh ïa kiba uta u bymkhuid un ktah, kin long bymkhuid; bad uta u briew ba ktah ïa kita, un long u bymkhuid haduh janmiet.’ ”
Currently Selected:
JINGKHEIÑ 19: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
