JINGKHEIÑ 18

Ka bynta ki lyngdoh bad ki Lebi

1Bad U Trai u la ong ha u Aaron, “Ma me, bad ki khun shynrang jong me, bad ka ïing u kpa jong me, lem bad me, phin ïakit ïa ka pop jong ka jaka kyntang: ma me ruh bad ki khun shynrang jong me, phin ïakit ïa ka pop jong ka jinglong lyngdoh jong phi. 2Ïa la ki para ruh na ka jaid Lebi, ka jaid u kpa jong me, men shim lem bad me, ban pynïasoh ïa ki ha lade, ba kin shakri ïa me: hynrei, ma me bad ki khun shynrang jong me, phin ïashakri ha khmat Ka Tabernakl ka jingphla. 3#Jkñ. 1:50-53; 3:5-8,21-37; 4:1-33; 8:19.Bad kin ïa-ap sumar ïa ka jingsumar jong me, bad ïa ka jingsumar Ka Tabernakl baroh: tang ba, kin ym wan hajan ïa ki pliang ka jaka kyntang bad ïa ka duwan, ba ïoh kin ïap, ma ki, lane ma phi ruh. 4Bad kin ïasoh bad me, bad kin ïa-ap sumar ïa ka jingsumar Ka Tabernakl ka jingïaseng, ha ka kam baroh ka jong Ka Tabernakl; wat ai ruh ba u nongwei un wan hajan jong phi. 5Hynrei, phin ïa-ap sumar ma phi ïa ka jingsumar ka jaka kyntang, bad ïa ka jingsumar ka duwan: ba kan ym long shuh ka jingbitar halor ki khun Israel. 6Bad ha khmih, nga la shim ma nga ïa ki para jong me, ki Lebi, napdeng ki khun Israel: ha me la ai ïa ki, kum ka jingai ha U Trai, ïa ka ban trei ïa ka kam jong Ka Tabernakl ka jingïaseng. 7Kumta, ma me bad ki khun shynrang jong me, phin ïasumar ïa ka kam lyngdoh jong phi shaphang kiei kiei baroh kiba dei ïa ka duwan, bad hapoh ka jingkah de phin trei; nga la ai ïa ka kam lyngdoh jong phi ha phi kum ka jingai ei: te ïa u nongwei u ban wan hajan yn pynïap noh.”

8U Trai ruh u la kren ha u Aaron, “Ha khmih, nga la ai ha me ruh ïa ka jingsumar halor ki jingainguh kyntiew jong nga, na kiei kiei baroh ba la kyntang jong ki khun Israel, ha me nga la ai ïa ki na ka bynta kata ka jingpynsleh, bad ha ki khun shynrang jong me, da ka hukum bymjukut. 9Kane, kan long ka jong me, na kita kiei kiei ki bakhuid tam kiba la lait na ka ding: ki jingainguh jong ki baroh, ki jingainguh bam jong ki baroh, bad ki jingkñia sait pop jong ki baroh, bad ki jingkñia namar ki jingpalat jong ki baroh, ïa kiba dei ba kin ai ha nga, kin long ki bakyntang tam eh ha me, bad ha ki khun shynrang jong me. 10Ha ka jaka kyntang tam, men bam ïa ka: u shynrang baroh un bam ïa ka; kan long ka bakyntang ha me. 11Kane ruh kan long ka jong me: ka jingainguh kyntiew na ki jingainguh jong ki, lem bad ki jingainguh kaweh baroh jong ki khun Israel: nga la ai ïa ki ha me, bad ha ki khun shynrang, bad ki khun kynthei jong me, lem bad me, da ka hukum bymjukut: uwei uwei baroh u bakhuid na ka ïing jong me, un ïoh bam na ka. 12Ka babha tam baroh na ka umphniang, bad ka babha tam baroh na ka Waiñ, bad na u Kew, ki soh nyngkong jong ki keiñ ïa kiba kin ainguh ha U Trai, ïa kita, nga la ai ha me. 13Kiba la ih nyngkong na kiei kiei baroh ha ka ri, ïa kiba kin wan ai ha U Trai, kin long ki jong me; bad uwei uwei baroh u bakhuid na ka ïing jong me, un ïoh bam na ki. 14#Leb. 27:28.Kiei kiei baroh ba la pynkyntang ha Israel, kin long ki jong me. 15Kiei kiei baroh kiba kha nyngkong ka kpoh na ka doh baroh, ïa kiba kin wan ai ha U Trai, la ka long na ki briew, ne na ki mrad, kin long ki jong me: hynrei, ïa uta uba la kha nyngkong na u briew, men shah ban siewspah, bad ïa uba la kha nyngkong na ki mrad ki bymkhuid, yn siewspah. 16Te ïa kita kiba dei ban siewspah men siewspah ïa ki naduh kaba shi bnai ka rta, katba kum ka jingkheiñ dor jong me, da san shekel ki sbai rupa, katba kum ka shekel jong ka jaka kyntang, kaba long arphew gerah. 17Hynrei, ïa ita iba la kha nyngkong na ka masi, lane ïa iba la kha nyngkong na ka langbrot, lane ïa iba la kha nyngkong na ka blang, ïa kita, men ym shah ban siewspah; ki long ki bakhuid: men synreit ïa ka snam jong ki ha ka duwan, bad ïa ki khleiñ jong ki, men thang kum ka jingkñia ha ka ding, ban long ka jingiw baiwbih ha U Trai. 18Hynrei, ka doh jong ki, kan long ka jong me, kumba ka krung kaweh, bad kumba ka kti kamon, ki long ki jong me. 19#2 Khrn. 13:5.Ïa ki jingainguh kyntiew baroh na kiei kiei ki bakhuid, ïa kiba ki khun Israel kin ainguh ha U Trai, nga la ai ha me, bad ha ki khun shynrang jong me, bad ha ki khun kynthei jong me, lem bad me, da ka hukum bymjukut: ka long ka jutang kaba da ka mluh junom la junom ha khmat U Trai ha me, bad ha ki symbai jong me, lem bad me.” 20Bad U Trai u la kren ha u Aaron, “Men ym ïoh ka jingïoh pateng ha ka ri jong ki, bad men ym ïoh bynta ruh hapdeng jong ki: nga long ma nga ka bynta, bad ka jingïoh pateng jong me hapdeng ki khun Israel.”

21 # Leb. 27:30-33; Deu. 14:22-29. “Bad, ha khmih, nga la ai ha ki khun u Lebi ïa kaba shiphew baroh ha Israel ïa ka ban long ka jingïoh pateng, na ka bynta kata ka kam ïa kaba ki trei, kata keiñ, ka kam ïa Ka Tabernakl ka jingïaseng. 22Te wat ai ba ki khun Israel kin wan shuh hajan Ka Tabernakl ka jingïaseng, ba ïoh kin kit ïa ka pop, bad ba kin ïap. 23Hynrei, ki Lebi kin trei ïa ka kam Ka Tabernakl ka jingïaseng, kin kit ruh ïa ka pop jong ki: kane kan long ka hukum bymjukut ïa ki jingkha pateng jong phi, bad hapdeng ki khun Israel, kim don ka jingïoh pateng. 24Hynrei, ïa kiba shiphew jong ki khun Israel, ïa kiba ki ainguh kum ka jingainguh kyntiew ha U Trai, nga la ai ha ki Lebi kum ka bynta: namar kata, nga la ong ha ki, ‘Hapdeng ki khun Israel kin ym ïoh ka jingïoh pateng.’ ”

25Te U Trai u la kren ha u Moses, U da ong, 26“Kumne men kren ha ki Lebi, to ong ruh ha ki, ‘Haba phi shim na ki khun Israel ïa kita kiba shiphew, ïa kiba nga la ai ha phi na ki, ban long ka bynta jong phi, na kata te, phi ruh phin ainguh da ka jingainguh kyntiew ha U Trai, ïa kaba shiphew na kata kaba shiphew keiñ. 27Te ïa ka kam ka jingainguh kyntiew jong phi yn ñiew ha phi, kum u Kew na ka kyntem, bad kum ka jingdap jong ka kor khñiot soh Waiñ. 28Kumta, phi ruh phin ainguh da ka jingainguh kyntiew ha U Trai na kita kiba shiphew jong phi baroh, ïa kiba phi shim na ki khun Israel; bad na kata, phin ai ka jingainguh kyntiew ka jong U Trai ha u Aaron lyngdoh. 29Na ki jingïoh jong phi baroh, phin ainguh ïa ka jingainguh kyntiew baroh ka jong U Trai, na ka babha tam baroh ka jong ka, kata ka bynta keiñ kaba la kyntang na ka.’ 30Men ong te ha ki, ‘Haba phi pynkyntiew ïa ka babha tam jong ka na ka, te yn ñiew ïa ka ha ki Lebi kum ka jingkyrhai jong ka kyntem, bad kum ka jingkyrhai jong ka kor khñiot soh Waiñ. 31Phin bam ruh ïa ka ha ki jaka baroh, ma phi bad ki kur shi ïing jong phi de: naba ka long ka nong jong phi namar ka kam jong phi ha Ka Tabernakl ka jingïaseng. 32Te haba phi la pynkyntiew na ka, ïa ka babha tam jong ka, phin ym kit pop na ka bynta jong ka: to wat pynjakhlia ma phi ruh ïa kiei kiei ruh ki bakhuid ki jong ki khun Israel, ïoh phin ïap.’ ”

Currently Selected:

JINGKHEIÑ 18: KHB

Highlight

Copy

Compare