LEBITIKOS 20

Ki jingpynshitom namar ka jingbymkhuid bad ka jingbymkohnguh

1Bad U Trai u la kren ha u Moses, u da ong, 2#Leb. 18:21.“To ong ruh ha ki khun Israel, ‘Uno uno ruh na ki khun Israel, lane na ki nongwei ba wanhap ha Israel, ba aiti ïa la ki khun ha u Molek; yn sa pynïap shisha ïa uta: ki trai-shnong kin ïalynthem maw ïa u. 3Bad ngan buh ïa la ka khmat pyrshah ïa uta u briew, bad ngan ot noh ïa u napdeng u paidbah jong u; namar ba u la aiti ïa la ki khun ha u Molek, ïa ka ban pyntngit sang ïa ka jaka bakyntang jong nga, bad pynkheiñ burom ïa ka kyrteng bakhuid jong nga. 4Te lada ki trai-shnong shisha kin rieh ïa la ki khmat na uta u briew, haba u dang aiti ïa la ki khun ha u Molek, khlem da pynïap noh ïa u: 5ynda kumta, ngan buh ma nga ïa ka khmat jong nga pyrshah ïa uta u briew, bad pyrshah ïa ka ïing jong u, bad ngan ot noh ïa u, bad ïa baroh ki ban leit bud ïa ka jingklim jong u, da kaba klim bad u Molek, napdeng u paidbah jong ki.

6 # Leb. 19:31. “ ‘Bad uta u briew uba leit phai hadien kiba leh blei, bad ki nongleh byrtong, ïa ka ban leit klim hadien jong ki, ngan buh ïa la ka khmat pyrshah ïa uta u briew, bad ngan ot noh ïa u napdeng u paidbah jong u. 7#Leb. 11:44,45; 19:2; 20:26; 1 Pet. 1:16.Namar kata te, to pynkhuid phi ïa lade, bad to long phi ki bakhuid: naba nga long U Trai U Blei jong phi. 8Bad phin sumar ïa ki hukum jong nga, bad to leh ïa ki: Nga long U Trai uba pynkhuid ïa phi. 9#Eks. 21:17; Deu. 27:16; Mat. 15:4; Mrk. 7:10.Bad jar uba tim ïa la u kpa lane ïa la ka kmie yn pynïap shisha ïa u: u la tim ïa la u kpa lane ïa la ka kmie; ka snam jong u kan long halor jong u hi.

10 # Eks. 20:14; Leb. 18:20; Deu. 5:18. “ ‘Bad u briew uba klim bad ka tnga jong uwei pat, uba klim bad ka tnga u paramarjan, yn pynïap noh shisha ïa uta uba klim bad ïa kata kaba klim bad u. 11#Leb. 18:7,8; Deu. 22:30; 27:20.U briew uba thiah bad ka tnga u kpa jong u, u la pynpaw ïa ka jinglyngkhuit u kpa jong u: yn pynïap shisha ïa ki baroh ar ngut; ka snam jong ki kan long halor jong ki hi. 12#Leb. 18:15.Bad uta u briew uba thiah bad la ka pyrsa kurim, yn pynïap shisha ïa ki baroh ar ngut: ki la ïa-pynlong ka jingkhleh sang; ka snam jong ki kan long halor jong ki hi keiñ. 13#Leb. 18:22.Haba u briew u thiah bad u shynrang kumba thiah bad ka kynthei, ki la ïakam ïa kaba ijli baroh ar ngut: yn pynïap noh shisha ïa ki; ka snam jong ki kan long halor jong ki hi keiñ. 14#Leb. 18:17; Deu. 27:23.Bad lada u briew u shim tnga ïa ka briew bad ïa ka kmie jong ka, kata ka long ka jingbymman eh: yn thang ïa uta bad ïa kita ha ka ding; ba ka jingbymman kan ym long hapdeng jong phi. 15#Eks. 22:19; Leb. 18:23; Deu. 27:21.Bad to pynïap noh ïa u briew uba ïathiah bad ka mrad; to pynïap noh ïa kata ka mrad ruh de. 16Bad haba ka briew ka da leit ha u mrad, ïa ka ban thiah bad u, to men pynïap noh ïa kata ka briew, bad ïa uta u mrad ruh: to pynïap noh shisha ïa ki keiñ; ka snam jong ki kan long halor jong ki hi.

17 # Leb. 18:9; Deu. 27:22. “ ‘Bad haba u briew u da shim ïa la ka para, ka khun u kpa jong u, lane ka khun ka kmie jong u, bad ba u ïohi ïa ka jinglyngkhuit jong ka, bad ba ka ruh ka ïohi ïa ka jinglyngkhuit jong u; kata ka long ka jingbymman eh; to ot noh ïa ki ha khmat u paidbah jong ki: u la pynpaw ïa ka jinglyngkhuit ka para jong u; bad un kit hi ïa la ka pop. 18#Leb. 15:24; 18:19.Bad lada u briew u da thiah lem bad ka briew ka bapang poi bnai, bad u pynpaw ïa ka jinglyngkhuit jong ka; u la pynpaw ïa ka jingmih snam jong ka, bad ka ruh ka la pynpaw hi ïa la ka jingmih snam: yn ot noh ïa ki baroh ar ngut napdeng u paidbah jong ki. 19#Leb. 18:12,13.Bad wat pynpaw ïa ka jinglyngkhuit ka para ka kmie jong me, lymne ïa ka jong ka para u kpa jong me: naba u pynpaw ïa ka jinglyngkhuit ka kur bajan jong u; kin kit hi ïa la ka pop. 20#Leb. 18:14.Bad lada u briew u da thiah bad ka tnga u kpanah lane u kpasan jong u, u la pynpaw ïa ka jinglyngkhuit ka jong uta u kpanah lane u kpasan jong u: kin kit hi ïa la ka pop; kin ïap khlem khun. 21#Leb. 18:16.Bad lada u briew u da shim ha lade ïa ka tnga u para jong u, kata ka long kaba jakhlia: u la pynpaw sih ïa ka jinglyngkhuit u para jong u, kin long khlem khun.

22“ ‘Namar kata, phin sumar ïa ki hukum jong nga baroh, bad ïa ki jingbishar jong nga baroh, bad to leh ïa ki: ba kata ka ri sha kaba nga ïalam ïa phi ban shong ha ka, kan ym prie noh ïa phi. 23Bad wat ïaid katba kum ki hukum ki jaid bynriew, ïa kiba ngan sa leit beh noh ha khmat jong phi: naba ïa kine kiei kiei baroh ki la leh ma ki: namar kata keiñ, nga la ijli ïa ki. 24Hynrei, nga la ong ha phi, “Phin ïoh pateng ma phi ïa ka ri jong ki, bad ngan ai ïa ka ha phi keiñ ba phin ïoh ma phi ïa ka, ka ri kaba tuid da ka dud bad ka ngap: nga long U Trai U Blei jong phi, uba la pynkyrpang ïa phi na ki jaid bynriew. 25Phin pynïapher, namar kata, hapdeng ki mrad bakhuid bad ki mrad bymkhuid, bad hapdeng ki sim ki bakhuid bad ki bymkhuid: bad wat pynlong ba-ijli ïa la ki mynsiem namar u mrad, lymne namar u sim, lymne namar kaei kaei ruh ka bapar halor ka khyndew, ïa kiba nga la pynkyrpang ïa phi ba phin kheiñ bymkhuid ïa ki. 26#Leb. 20:7.Phin long ki bakhuid ïa nga: naba ma nga U Trai nga long u bakhuid, bad nga la pynkyrpang ïa phi na ki jaid bynriew, ïa ka ban long ki jong nga hi.”

27 # Leb. 19:31; 20:6. “ ‘U briew ruh lane ka briew ba don ka mynsiem leh blei, lane ba long ki nongleh byrtong, yn pynïap noh shisha ïa ki: kin ïalynthem maw ïa ki: ka snam jong ki kan long halor jong ki hi keiñ.’ ”

Currently Selected:

LEBITIKOS 20: KHB

Highlight

Copy

Compare