LEBITIKOS 19

Ki hukum shaphang ka jinglong khuid bad ka jinglong hok

1Bad U Trai u la kren ha u Moses, u da ong, 2#Leb. 11:44,45; 20:7,26; 1 Pet. 1:16.“To kren ha u paidlang ki khun Israel baroh, bad to ong ha ki, ‘To long ki bakhuid; naba nga u bakhuid, U Trai U Blei jong phi hi. 3#Eks. 20:12; Deu. 5:16; Eks. 20:8; 23:12; 34:21; 35:23; Deu. 5:12-15.To sheptieng uwei uwei baroh ïa la ka kmie, bad ïa la u kpa, bad to rakhe ïa ki Sabbaton jong nga: Nga long U Trai U Blei jong phi keiñ. 4#Eks. 20:4; 34:17; Leb. 26:1; Deu. 4:15-19; 27:15.Wat phai noh ha ki bleithaw, bad wat thaw ïa phi ïa ki blei ba la saiñ: Nga long U Trai U Blei jong phi keiñ.

5“ ‘Bad haba phi kñia ïa ka jingkñia bapynïasuk ha U Trai, phin kñia ïa kata da ka mon sngewbha jong phi hi. 6Bad ha kata ka sngi ba phin kñia ïa ka, bad ha kaba lashai, yn bam ïa ka: te ïa kaba sah tam ha kaba lashisngi, yn thang ha ding. 7Hynrei, lada kumno kumno ruh yn bam ïa ka ha kaba lashisngi, kan long bymkhuid, yn ym pdiang hun ïa ka, 8bad jar uba bam ïa ka un kit ïa la ka pop, namar ba u la pyntngit ïa kaba la kyntang ka jong U Trai: ïa kata ka mynsiem ruh yn ot noh napdeng u paidlang jong u.

9 # Leb. 23:22; Deu. 24:20,21. “ ‘Bad haba phi ot ïa ka jingot jong ka khyndew jong me, men ym ot lut ïa ki dong ka lyngkha jong me, men ym khar lut ïa ki soh na ki lyngkha jong me. 10Bad men ym kheit lut ïa ka brisoh Waiñ jong me, lymne men ym ïalum lut ïa u soh Waiñ baroh ha ka brisoh Waiñ jong me; men iehnoh ïa kita ïa u baduk bad ïa u nongwei: Nga long U Trai U Blei jong phi keiñ.

11 # Eks. 20:15,16; Deu. 5:19. “ ‘Phin ym tuh; lymne leh buit shukor, lymne ïalamler paralok hi. 12#Eks. 20:7; Deu. 5:11; Mat. 5:33.Phin ym smai lamler da ka kyrteng jong nga, lymne men ym shim thala ïa ka kyrteng U Blei jong me: Nga long U Trai.

13 # Deu. 24:15; Jak. 5:4. “ ‘Men ym leh klop ïa la u paramarjan, lymne lute ïa u: wat ai ba ka bainong u nongbylla kan sah bad me wat shi miet ruh haduh mynstep. 14#Deu. 27:18.Men ym tim ïa u bakyllut, lymne buh ïa ka jingjynthut ha khmat u bamatlah, hynrei, men sheptieng ïa U Blei jong me: Nga long U Trai.

15 # Eks. 23:6; Deu. 1:17; 16:19. “ ‘Wat leh ka bymhok ha ka jingbishar: wat shah shiliang ïa u baduk, lymne burom ïa ka khmat u badonbor: hynrei, men bishar ïa u paramarjan jong me ha ka hok. 16Wat ïaid me kum u nongkrensiar hapdeng u paidbah jong me: lymne ïeng pyrshah ïa ka snam jong u paramarjan jong me: Nga long U Trai keiñ.

17“ ‘Wat isih ïa la u para ha la ka dohnud: da kaba sneng men sneng ïa la u paramarjan, ba ïoh men kit hi ïa ka pop jong u. 18#Mat. 5:43; 19:19; 22:39; Mrk. 12:31; Luk. 10:27; Rom. 13:9; Gal. 5:14; Jak. 2:8.Men ym pynhiar kput, lymne bat nud pyrshah ïa la ki khun u paidlang jong me, hynrei, men ieit ïa la u paramarjan kumba ïa lade: Nga long U Trai keiñ.

19 # Deu. 22:9,11. “ ‘Sumar ïa ki hukum jong nga. Wat ai ba ki jingri jong me kin ïakurim bad kiwei kiwei ki bymdei kajuh ka jaid: lymne men ym bet ïa la ka lyngkha da u symbai ba la khleh bun jaid: lymne men ym kup ïa ka jaiñ ba la khleh da u 'saihon bad u 'sai 'ñiuh langbrot.

20“ ‘Bad haba u briew u da leit thiah bad ka briew kaba long ka mraw, kaba la lah ïatehktien bad u briew, khlem da siewspah ïa ka, lane pyllait ïa ka: ka dei ban sympat ïa ki; yn ym pynïap ïa ki, naba kam shym long kaba laitluid. 21To ai ba un wallam kum ka jingkñia namar ka jingpalat jong u ha U Trai, ha ka jingkhang Ka Tabernakl ka jingïaseng, da u langbrot ka jingkñia namar ka jingpalat. 22Ynda kumta, u lyngdoh un pynlong ka jingpynïasuk na ka bynta jong u da uta u langbrot ka jingkñia namar ka jingpalat ha khmat U Trai, namar ka pop ïa kaba u la leh: bad yn map ïa u ïa kata ka pop kaba u la leh.

23“ ‘Te haba phin wan poi sha kata ka ri, bad ba phi la thung ïa ki jaid ki dieng baroh ban bam, te phin kheiñ ïa u soh jong ki kum ki bym shym la otsher ïa ki: lai snem un sah ïa phi kum ïa u bym shym la otsher: te yn ym bam ïa u. 24Hynrei, ha ka basaw snem, u soh jong u baroh un long ba la kyntang, ïa ka ban ïaroh ïa U Trai. 25Te ha ka basan snem, phin bam ïa u soh jong kita ki dieng, khnang ba kin sei soh kyrhai ïa phi: Nga long U Trai U Blei jong phi.

26 # Leb. 3:17; 7:26,27; 17:10-16; Deu. 12:16,23-25; 18:10. “ ‘Wat bam phi ïa kaei kaei lem bad ka snam: lane wat leh byrtong, lane khan ïa ka por. 27#Leb. 21:5; Deu. 14:1.Wat khi pyllun ïa u 'ñiuh khlieh jong phi, bad wat khap ïa ki dong ki 'main ker jong phi. 28Phin ym pynmong ïa la ka doh namar u baïap, lymne shon dak kumno kumno ruh halor jong phi: Nga long U Trai keiñ. 29#Deu. 23:17,18.Wat pyntngit sang ïa la ka khun, da kaba pynklim ïa ka; ba ïoh ka ri ruh kan hap ha ka jingklim, bad ka ri ruh kan dap da ka jingbymman. 30#Eks. 20:8-11; 23:12; 34:21; 35:2,3; Leb. 19:3; 26:2; Deu. 5:12-15.To rakhe ïa ki Sabbaton jong nga, bad to burom ïa ka jaka kyntang jong nga: Nga long U Trai keiñ.

31 # Leb. 20:6,27; Deu. 18:11. “ ‘Wat phai sha ki nongkren blei, lymne sha ki nongkren byrtong; wat leit wad ïa ki ïa ka ban pyntngit ïa lade da ki: Nga long U Trai U Blei jong phi.

32“ ‘To men ïeng ha khmat ka khlieh uba la phuh 'ñiuhlieh, bad to burom ïa ka khmat u tymmen, bad to sheptieng ïa U Blei jong me: Nga long U Trai keiñ.

33 # Eks. 22:21; Deu. 24:17,18; 27:19. “ ‘Bad lada u nongwei u da wan shong lem bad me ha ka ri jong phi, wat banbeiñ ïa u. 34To ai ba u nongwei uba wanhap hapdeng jong phi un long kum ïa uba la kha na phi hi, bad to ieit ïa u kumba ïa lade hi; naba phi ruh phi la ju long ki nongwei ha ka ri Ijipt: Nga long U Trai U Blei jong phi.

35 # Deu. 25:13-16. “ ‘Wat leh bymhok ha ka jingbishar, ha ka pruh, lane ha u mawser, lane ha ka jingthew. 36To ai ba ki tarajur jong phi kin long ki bahok, bad ki mawser ki bahok, bad ka shang ka bahok, bad ka hin ka bahok ruh: Nga long U Trai U Blei jong phi, uba la ïalam noh ïa phi na ka ri Ijipt. 37Namar kata, to sumar bniah phi ïa ki hukum jong nga baroh, bad ïa ki jingbishar jong nga baroh, bad to leh ïa ki: Nga long U Trai keiñ.’ ”

Currently Selected:

LEBITIKOS 19: KHB

Highlight

Copy

Compare