NONGBISHAR 8
8
1Ki rangbah Ephraim te ki la ong ha u, “Balei me la leh kumne ïa ngi, ba mem shym khot ïa ngi haba me la leit ïaleh ïa ki Midian?” Te ki la kren bitar eh ïa u. 2Bad u la ong ha ki, “Aïu nga la leh te ban ïapyrshang bad ka jong phi? Kaba shu khar ei u soh Waiñ jong u Ephraim kam long kham bha ïa kaba kheit soh u Abieser? 3U Blei u la ai noh ha ka kti jong phi ïa ki rangbah ki Midian, ïa u Oreb bad u Sib: te ka leit long aïu kaba nga la leh haba ïapyrshang bad ka jong phi?” Ynda kumta, ka jingbitar jong ki ïa u ka la jem, haba u la lah ong ïa kata.
U Gideon u kem ïa ki syiem ki Midian
4U Gideon te u la wan sha Jordan, bad u la ryngkang sha shiliang, ma u, bad kita ki laispah ngut kiba bad u, kiba la sngewtlot, pynban ki dang ïabeh. 5U la ong te ha ki rangbah Sukkoth, “Nga kyrpad ïa phi, to ai kpu ïa kine ki paidbah kiba bud ïa nga; naba ki la tlot, bad nga dang beh ïa u Sebah bad u Salmunna, ki syiem ki Midian.” 6Te ki rangbah Sukkoth ki la ong, “Ki kti jong u Sebah bad u Salmunna ki don mynta ha ka kti jong me, ba ngin leit ai kpu ïa une u paidïapom jong me?” 7Bad u Gideon u la ong, “Namar kata, ynda U Trai u la ai noh ïa u Sebah bad u Salmunna ha ka kti jong nga, te ngan pynthar ïa ka doh jong phi da ki shiah khlaw bad da ki ñiut shiah.” 8Nangta te u la leit kiew sha Penuel, bad u la kren ha kita kumjuh: bad ki rangbah Penuel ki la jubab ïa u kumjuh kumba la jubab ki rangbah Sukkoth. 9Te u la kren ha ki rangbah Penuel, u da ong, “Ynda nga wan pat ha kaba suk, ngan pyntwa ïa kane ka kut.”
10Te u Sebah bad u Salmunna ki la don ha Karkor, bad u paidïapom jong ki lem bad ki, kumba khatsan hajar ki rangbah, baroh keiñ kiba dang sah na u paidïapom baroh jong ki khun mihngi: naba la kyllon shispah arphew hajar ki rangbah bakieng atiar. 11Bad u Gideon u la leit kiew na ka lynti jong kita kiba shong ha ki ïingjaiñ sha mihngi ka Nobah bad ka Jogbehah, bad u la pom ïa uta u paidïapom; naba uta u paidïapom u la leh kheiñ kylluid. 12Te u Sebah bad u Salmunna ki la phet ïap; te u la beh ïa ki; bad u la kem ïa kita ar ngut ki syiem ki Midian, u Sebah bad u Salmunna bad u la jop khoit ïa uta u paidïapom baroh.
13Te u Gideon u khun u Joash u la wan phai pat na ka thma na ka thiep Heres. 14Bad u la kem ïa uwei u samla na ki nong Sukkoth, bad u la kylli ïa u: u te u la thoh ïa u ki rangbah ka Sukkoth, bad ïa ki basan jong ka, hynñiewphew hynñiew ki rangbah. 15U la wan te ha ki nong Sukkoth, bad u la ong, “Ha khmih, ïa u Sebah bad u Salmunna, shaphang jong kiba phi la krenbeiñ ïa nga, phi da ong, ‘Ki kti u Sebah bad u Salmunna ki don mynta ha ka kti jong me, ba ngin leit ai kpu ha ki briew jong me kiba la thait?’ ” 16Te u la shim ïa ki basan ka shnong, bad ki shiah khlaw bad ki ñiut shiah, bad da kita u la sneng ïa ki rangbah Sukkoth. 17Ïa ka kut Penuel ruh u la pyntwa, bad u la pynïap ïa ki rangbah ka shnong.
18Ynda kumta, u la ong ha u Sebah bad u Salmunna, “Kiba kumno kita ki briew ïa kiba phi la pynïap ha Tabor?” Ki te ki la ïathuh, “Kumba long ma me, kumta ki la long; ki la long uwei pa uwei kum ki khun syiem.” 19U la ong te, “Ki la long ki para jong nga, ki khun ka kmie jong nga: katba im U Trai, lada phi la pynim ïa ki, ngan ym pynïap ïa phi.” 20Te u la ong ha u Jether, u khun nyngkong jong u, “To ïeng, pynïap ïa ki.” Hynrei, uta u samla um sei ïa la ka waitlam: naba u la sheptieng, namar u la dang khynnah. 21Ynda kumta, u Sebah bad u Salmunna ki la ong, “To ïeng hi ma me, bad to pynïap ïa ngi: naba kumba u rangbah u long, kumta long ka bor jong u.” Kumta, u Gideon u la ïeng joit bad u la pynïap ïa u Sebah bad u Salmunna, bad u la shim ïa ki jingdeng tabit kiba ha ki ryndang ki ut jong ki.
Kiwei pat ki kam u Gideon bad ka jingïap jong u
22Ynda kumta, ki rangbah Israel ki la ong ha u Gideon, “To synshar ma me halor jong ngi, ma me, bad u khun jong me, bad u khun u khun jong me ruh: naba me la pyllait ïa ngi na ka kti ki Midian.” 23U Gideon te u ong ha ki, “Ngan ym synshar halor jong phi, lymne u khun jong nga un ym synshar halor jong phi: U Trai keiñ un synshar halor jong phi.” 24Bad u Gideon u la ong ha ki, “Ngan pan kawei ka jingpan na phi, ba phin ïa-ai ha nga uwei pa uwei ïa ki sohshkor na ka jinglute jong u.” (Naba kita ki la don ki sohshkor ksiar, namar ki la long ki Ishmael.) 25Ki te ki la ïathuh, “Ngin ïa-ai sngewbha ïa ki.” Te ki la siang ïa ka jaiñ, bad ki la noh hangta uwei pa uwei ïa ki sohshkor na ka jinglute jong u. 26Bad ka jingthew kita ki sohshkor ksiar ba u la pan ka la long shi hajar hynñiewspah shekel ksiar; nalor ki jingdeng tabit, bad ki kpieng, bad ki jaiñ saw bthuh kiba ha kita ki syiem ki Midian, bad nalor ki kynjri kiba ha ryndang ki ut jong ki. 27Te u Gideon u la shna ka ephod da ki, bad u la buh ïa ka ha la ka shnong, ha Ophrah keiñ: bad ki Israel baroh ki la leit ïaklim ïa ka hangta: kata te, ka la long ka jingriam ïa u Gideon, bad ïa ka ïing jong u. 28Kumta, la jop ïa ki Midian ha khmat ki khun Israel, bad kim shym la pynïeng shuh ïa la ka khlieh. Ka ri te ka la suk sawphew snem ha ki sngi u Gideon.
29Bad u Jerubbaal u khun u Joash u la leit shong ha la ka jong ka ïing. 30Bad u Gideon u la don hynñiewphew ki khun shynrang kiba la kha na ka met jong u: naba u la don bun ki tnga. 31Bad ka tnga kliar jong u kaba ha Shekhem, ka ruh ka la kha u khun ïa u, bad u la kyrteng “u Abimelekh” ïa u. 32Te u Gideon u khun u Joash u la ïap ba u dap biang ka rta, bad la tep ïa u ha ka jingtep u Joash u kpa jong u, ha Ophrah ki Abieser.
33Ka la jia te, tang shu ïap u Gideon, ba ki khun Israel ki la phai pat, bad ki la leit ïaklim ïa ki Baal, bad ki la thung blei ha ki da u Baal-berith. 34Bad ki khun Israel kim shym la kynmaw ïa U Trai U Blei jong ki, uba la pyllait ïa ki na ki kti ki nongshun jong ki baroh ha ki phang baroh: 35lymne kim shym la leh sbun ïa ka ïing u Jerubbaal, u Gideon keiñ, katba kum kata ka jinglehbha baroh kaba u la pyni ha ki Israel.
Currently Selected:
NONGBISHAR 8: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
