NONGBISHAR 4
4
U Sisera u shah jop ha ka Deborah bad u Barak
1Te ki khun Israel ki la leh ïa ka basniew pat ha khmat U Trai, ynda la ïap u Ehud. 2Te U Trai u la die noh ïa ki ha ka kti u Jabin u syiem ka Kanaan, uba synshar ha Hasor; u rangbah ki paidïapom jong u, u Sisera, uba shong ha Harosheth ki Jentil. 3Bad ki khun Israel ki la lynñiar ha U Trai: naba u la don khyndaispah ki kali nar; bad arphew snem u la banbeiñ eh ïa ki khun Israel.
4Te ka Deborah, ka nongïathuhlypa, ka tnga u Lapidoth, ha kata ka por ka la bishar ma ka, ïa ki Israel. 5Bad ka la shong hapoh u dieng Tlai jong ka Deborah hapdeng ka Ramah bad ka Bethel ha ri lum Ephraim: bad ki khun Israel ki la ju wan kiew sha ka ban ïoh bishar. 6Te ka la phah khot ïa u Barak u khun u Abinoam na Kedesh-naphtali, bad ka la ong ha u, “Hato U Trai, U Blei ki Israel, um shym la hukum, ‘To khie, kynriah sha u lum Tabor, bad ïalam bad me shiphew hajar ngut na ki khun u Naphtali bad na ki khun u Sabulon? 7Bad ngan pynwan sha me sha ka wah Kishon ïa u Sisera, u rangbah ki paidïapom jong u Jabin, lem bad ki kali jong u bad u paidbah jong u de; bad ngan ai noh ïa u ha ka kti jong me.’ ” 8Te u Barak u la ong ha ka, “Lada phan leit lem bad nga, te ngan leit keiñ: hynrei, lada pha phan ym leit lem bad nga, ngan ym leit.” 9Ka te ka la ong, “Ïa ka ban leit ngan leit lem bad me: pynban, men ym ïoh burom ma me na kane ka jingleit kaba me leit: naba U Trai un die noh ïa u Sisera ha ka kti ka kynthei.” Ka Deborah te ka la ïeng, bad ka la leit lem bad u Barak sha Kedesh. 10Bad u Barak u la khot lang ïa ki Sabulon bad ki Naphtali sha Kedesh; bad ki la leit kiew shiphew hajar ki rangbah ha ki sla'jat jong u: ka Deborah de ka la leit lem bad u.
11Te u Heber u nong Ken u la pynkhlad ïa lade na ki Ken, wat na ki khun u Hobab u kthaw kurim u Moses, bad u la pynïeng ïa la ka ïingjaiñ haduh uta u dieng Sning ha Saanannim, uba hajan Kedesh.
12Ki la ïathuh te ha u Sisera ba u Barak u khun u Abinoam u la leit kiew sha u lum Tabor. 13Ynda kumta, u Sisera u la ïalum lang ïa la ki kali baroh, kita ki khyndaispah ki kali nar keiñ, bad u paidbah baroh uba la don lem bad u, naduh Harosheth jong ki Jentil, haduh ka wah Kishon. 14Te ka Deborah ka la ong ha u Barak, “Ïeng joit; naba kane ka long kata ka sngi ba U Trai u la ai noh ïa u Sisera ha ka kti jong me: hato U Trai um shym la leit ha shuwa jong me?” Kumta, u Barak u la leit hiar na u lum Tabor, bad shiphew hajar ki rangbah ki ïabud ïa u. 15Bad U Trai u la pynduh khoit ïa u Sisera, bad ki kali jong u baroh, bad u paidïapom jong u baroh, da ka syrti waitlam ha khmat u Barak; te u Sisera u la hiar noh na la ka kali, bad u la phet ïap noh da ki kjat. 16Hynrei, u Barak u la beh ïa kita ki kali, bad ïa uta u paidïapom haduh ka Harosheth ki Jentil: bad uta u paidïapom jong u Sisera baroh u la kyllon da ka syrti waitlam; uwei ruh ym shym pynsah shuh.
17Hynrei, u Sisera u la phet ïap noh da ki kjat sha ka ïingjaiñ ka Jael ka tnga u Heber u nong Ken: namar la don ka jingïasuk hapdeng u Jabin u syiem ka Hasor bad ka ïing u Heber u nong Ken. 18Bad ka Jael ka la leit tan ïa u Sisera, bad ka la ong ha u, “To ale sha ïing, kynrad, ale sha nga; wat sheptieng.” Te ynda u la rung sha ka shapoh ka ïingjaiñ, ka la pyntap ïa u da ka banat. 19U la ong te ha ka, “Ai ha nga, nga kyrpad ïa pha, khyndiat ka um ban dih; naba nga sliang.” Te ka la law shi bitor ka dud, bad ka la pyndih ïa u, bad ka la pyntap ïa u ruh. 20U te u la ong ha ka, “To ïeng ha jingkhang ka ïingjaiñ, te haba wan mano mano ba kylli ïa pha, da kaba ong, ‘Don uno uno hangne?’ te phan ong, ‘Em.’ ” 21Ynda kumta, ka Jael ka tnga u Heber ka la shim u snar ïingjaiñ, bad u tyrnem ha la ka kti, bad ka la leit mian mian sha u, bad ka la sah ïa uta u snar na ki moi moi jong u, bad u la pei lyngba ruh sha ka khyndew; naba u la thiah lyngngai; kumta u la thiah lter bad u la ïap noh. 22Te, ha khmih, katba u Barak u nang beh ïa u Sisera, ka Jael ka la wan tan ïa u, bad ka la ong ha u, “Ale, te ngan pyni ha me ïa uta u briew ïa uba me wad.” Bad u la wan sha ka; te, ha khmih, u Sisera u la thiah ïap, bad uta u snar ha ki moi moi jong u.
23Kumta, U Blei u la jop ha kata ka sngi ïa u Jabin u syiem ka Kanaan ha khmat ki khun Israel. 24Te ka kti ki khun Israel ka la nang jop nang jop ïa u Jabin u syiem ka Kanaan, ha ban da ki la pynduh khoit ïa u Jabin u syiem ka Kanaan.
Currently Selected:
NONGBISHAR 4: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India