NONGBISHAR 3
3
Ki jaid bynriew ba la pynsah ban tynjuh ïa ki Israel
1Kine te ki long ki jaid bynriew kiba U Trai u la pynsah, ban tynjuh ïa ki Israel da ki, wat kita baroh ki bym shym la tip ïa kita ki thma ka ri Kanaan baroh; 2tang ba kita ki pateng bynriew ki khun Israel kin ïoh tip, ban hikai ïapom ïa ki, kita keiñ ki bym shym la tip satia ïa kane mynshuwa; 3ki san doloi ki Philistia, ki Kanaan baroh, bad ki Sidon, bad ki Hib kiba shong ha u lum Lebanon, naduh u lum Baal-hermon haduh ka lynti sha Hamath. 4Kine ki la sah ban tynjuh ïa ki Israel da ki, ban tip la kin shahshkor ne em ïa ki hukum U Trai, kiba u la hukum ïa ki kpa jong ki da ka kti u Moses. 5Bad ki khun Israel ki la shong hapdeng ki Kanaan; ki Hit, bad ki Amor, bad ki Peris, bad ki Hib, bad ki Jebus: 6bad ki la shim ïa ki khun kynthei jong ki ban long ki tnga jong ki, ki la ai ruh ïa la ki khun kynthei ha ki khun shynrang jong ki, bad ki la shakri ïa ki blei jong ki.
U Othniel u pyllait ïa ki na u Kushan-rishathaim
7Bad ki khun Israel ki la leh ïa ka basniew ha khmat U Trai, bad ki la klet ïa U Trai U Blei jong ki, bad ki la leit shakri ïa ki Baal bad ki Asheroth. 8Namar kata, ka jingbitar U Trai ka la meh ïa ki Israel, bad u la die noh ïa ki ha ka kti u Kushan-rishathaim u syiem ka Mesopotamia: bad ki khun Israel ki la shakri ïa u Kushan-rishathaim, phra snem. 9Te haba ki khun Israel ki la lynñiar ha U Trai, U Trai u la pynmih ïa u nongpynim ïa ki khun Israel, uba la pyllait ïa ki, u Othniel keiñ u khun u Kenas, u hynbew u Kaleb. 10U Mynsiem U Trai te u la wan ha u, bad u la bishar ïa ki Israel; bad u la mih ha ka thma, U Trai te u la ai noh ïa u Kushan-rishathaim u syiem ka Mesopotamia ha ka kti jong u: bad ka kti jong u ka la jop ïa u Kushan-rishathaim. 11Ka ri ruh ka la suk sawphew snem. Bad u Othniel u khun u Kenas u la ïap.
U Ehud u pyllait ïa ki Israel na u Eglon
12Te ki khun Israel ki la leh ïa ka basniew pat ha khmat U Trai: bad U Trai u la ai bor ïa u Eglon u syiem ka Moab ban ïaleh ïa ki Israel, namar ba ki la leh ïa ka basniew ha khmat U Trai. 13Bad u la ïalum ha u ïa ki khun u Ammon bad u Amalek; te u la leit bad u la jop ïa ki Israel, bad ki la ïoh ïa ka nongbah ki dieng Tlai. 14Kumta, ki khun Israel ki la shakri ïa u Eglon u syiem ka Moab, khatphra snem.
15Hynrei, haba ki khun Israel ki la lynñiar ha U Trai, te U Trai u la pynmih ha ki u nongpyllait im, u Ehud keiñ u khun u Gera, u Benjamin, u briew uba kadiang: bad ha u ki khun Israel ki la phah ïa ka jingnguh syiem ha u Eglon u syiem ka Moab. 16Hynrei, u Ehud u la khreh ïa lade ka jamdor#3:16 ka jamdor: Ka waitlam balyngkot. ar liang syrti, kaba jrong shi pruh; bad u la tynsat ïa ka hapoh la ki jaiñ ha ka syngkai sha kamon jong u. 17Te u la wallam ïa kata ka jingnguh syiem ha u Eglon u syiem ka Moab. Te u Eglon u la long u briew u basngaid eh. 18Te ynda u la lah ai kata ka jingnguh syiem, u la phah noh ïa kita ki briew kiba la bah ïa kata ka jingnguh syiem. 19Hynrei, u hi u la kylla dien pat na kita ki par kiba don hajan Gilgal, bad u la ong, “Nga don ka kam ba jar jar ha me, ko syiem.” U te u la ong, “Sngap jar.” Baroh te kiba la ïeng hajan jong u ki la mih noh na u. 20Bad u Ehud u la wan ha u; te u shong marwei hi ha la ka kamra pyngngad. Bad u Ehud u la ong, “Ka ktien na U Blei nga don ha me.” Bad u la ïeng joit na la ka jaka shong. 21Te haba u Ehud u la sei ïa la ka kti kadiang bad u la sei ïa ka jamdor na ka syngkai kamon jong u, u la tynrah ïa ka na ka kpoh jong u: 22te ka sping ruh ka la rung lem bad ka sla wait; bad ka khleiñ ka la dambit ha ka sla wait, naba um shym sei shuh ïa kata ka jamdor na ka kpoh jong u; te ka la pei blait shadien. 23Ynda kumta, u Ehud u la mih noh sha ka baranda, bad u la khang lyndet ïa ki jingkhang ka kamra, bad u la khyrwait#3:23 khyrwait: Kane ka kyntien hangne ka mut khang pynshkem kumba khang tala. ïa ki.
24Te ynda u la lah mih noh, ki shakri jong u ki la ïawan; bad ki la ïohi, te, ha khmih, ïa ki jingkhang ka kamra la khyrwait; bad ki la ïa-ong, “Shisha u tap ïa la ki kjat#3:24 tap ïa la ki kjat: Kine ki kyntien ki dei ki kyntien don akor ba ki Hebru ki pyndonkam ban kren shaphang ka jingleit khyndew. ha ka kamra pyngngad.” 25Bad ki la ap ha ban da ki la lehrain: te, ha khmih, um shym plie shuh ïa ki jingkhang ka kamra; namar kata, ki la shim ïa u shabi bad ki la plie; te, ha khmih, u kynrad jong ki u la kyllon ïap ha tbian.
26U Ehud te u la phet ïap katba ki la dang ap, bad u la palat ïa kita ki par, u la lait ruh haduh Seirath. 27Te ynda u la lah poi, u la put ka turoi ha ka ri lum Ephraim, bad ki khun Israel ki la hiar lem bad u na ka ri lum, ma u ruh ha shuwa jong ki. 28Bad u la ong ha ki, “Bud ïa nga: naba U Trai u la ai noh ïa ki Moab ki nongshun jong phi ha ka kti jong phi.” Te ki la hiar hadien jong u, bad ki la ïoh ïa ki lynti khriang ka Jordan pyrshah ïa ki Moab, bad kim shah ïano ïano ruh ban ryngkang. 29Bad ki la pynïap na ki Moab ha kata ka por kumba shiphew hajar ki rangbah, baroh ki riewkhlaiñ, bad baroh ki riewshlur; ym shym la lait uwei ruh. 30Kumta, la jop ïa ka Moab ha kata ka sngi ha ka kti ki Israel. Ka ri te ka la suk phraphew snem.
U Shamgar u pyllait ïa ki Israel na ki Philistia
31Hadien jong u te u Shamgar u khun u Anath, uba la pynïap na ki Philistia hynriewspah ki rangbah da u dieng ñiah masi: u ruh u la pyllait ïa ki Israel.
Currently Selected:
NONGBISHAR 3: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
