ISAÏAH 40
40
Ki ktien pyntngen U Blei ïa ka Seïon
1“To pyntngen phi,
to pyntngen phi
ïa u paidlang jong nga,”
ong U Blei jong phi.
2To kren pyntngen
ïa ka Jerusalem,
bad to pyrta ha ka,
ba la pynwai noh
ïa ka jingïaleh jong ka,
ba la map noh ïa ka palat
jong ka:
ba ka la ïoh diang
na ka kti U Trai
ar shah namar ki pop
jong ka baroh.
3 #
Mat. 3:3; Mrk. 1:3; Luk. 3:4; Ïoan. 1:23. Ka ktien jong uta uba pyrta,
“To pynkhreh phi
ha ka ri khlaw
ïa ka lynti U Trai,
to pynbeit ha ka ri kynjah
ïa ka lynti bah ïa U Blei
jong ngi.
4 #
Luk. 3:5-6. Ïa ka jaka them baroh
yn kyntiew,
bad ïa u lum bah
bad ïa u lum rit baroh
yn pynhiar:
bad ïa kiba kyllaiñ yn pynbeit,
bad ki jaka khohruh
khohram kin madan:
5bad ïa ka burom U Trai
yn sa pynpaw,
bad ka doh baroh kan ïohi
lang ïa ka:
naba ka shyntur U Trai
ka la kren ïa ka.”
6 #
Jak. 1:10,11; 1 Pet. 1:24-25. Ka ktien jong uba ong,
“To pyrta.”
Uwei te u la ong, “Ngan
pyrta aïu?”
Ka doh baroh ka long u phlang,
bad ka jingitynnad jong ka
baroh ka long kum u syntiew
ka ryngkew:
7uta u phlang u ïap tyrkhong,
uta u syntiew u tlor noh;
namar ka jingpyrsad U Trai
ka beh halor jong u:
da shisha u paidlang
u long u phlang.
8Uta u phlang u ïap tyrkhong,
uta u syntiew u tlor noh:
hynrei, ka ktien U Blei jong ngi
kan neh junom.
9 #
Isa. 52:7; Nah. 1:15; Ki Kam. 10:36; Rom. 10:15. A pha kaba ïathuhkhana babha
ïa ka Seïon,
to leit kiew noh sha uta
u lum bajrong;
A pha kaba ïathuhkhana babha
ïa ka Jerusalem,
to pynjam da ka bor
ïa la ka ktien;
to pynjam, wat sheptieng;
ong ïa ki shnong Judah,
“Ha khmih, U Blei jong phi!”
10 #
Isa. 62:11; Jpw. 22:7,12. Ha khmih, U Trai U Blei
un wan kum u badonbor,
bad ka ksang'ti jong u
kan synshar na ka bynta
jong u:
ha khmih, ka bainong jong u
ka don bad u,
bad ka nong jong u ha khmat
jong u.
11Un bsa ïa ka kynhun jong u
kum u nongaplangbrot,
ha ka ksang'ti jong u un lum
ïa ki khun langbrot,
bad ha ka shadem jong u
un rah ïa ki,
bad un ïalam suki
ïa kiba ai buiñ.
Badno te phin ïa-pynsyriem bad U Blei ki Israel
12Uei ba la thew ïa ki um
ha ka lynghoh kti jong u,
bad ba la thew ïa ka bneng
da kiba tda,
bad ba la thep ïa ka 'dewmet
ka khyndew ha ka pyrha,
bad ba la thew ïa ki lum bah
da ka man,
bad ïa ki lum rit
ha ka tarajur?
13 #
Rom. 11:34; 1 Kor. 2:16. Uei ba la ïalam ïa ka mynsiem
jong U Trai,
lane ba u long u nongsylla
jong u,
u la hikai ïa u?
14Badno u la ïasylla,
bad uei ba la pynshemphang
ïa u,
bad ba la hikai ïa u ha ka lynti
ka jingbishar,
bad ba la hikai jingnang ïa u,
bad ba la pyni ha u ïa ka lynti
ka jingstad?
15Ha khmih, ki jaid bynriew
ki long kum shi jaw
na u khiew um,
bad la ñiew ïa ki
kum ka phngit ka tarajur:
ha khmih, u kit noh
ïa ki 'dewlynnong
kum ïa kaei kaei ka barit eh.
16Bad u Lebanon um long
uba biang ban thang,
lymne ki mrad jong u
kim biang
ïa ka jingainguh thang.
17Ki jaid bynriew baroh
ki long kum ei ei ruh em
ha khmat jong u;
u la ñiew ïa ki
duna ïa ka bymlong,
bad ïa ka jingthala.
18Badno te phin pynsyriem
ïa U Blei?
Bad ka dur aïu phin ïanujor
bad u?
19Ïa ka durblei,
u nongtrei kamar u saiñ,
bad u nongtrei bania
u da suit ksiar ïa ka,
bad u da saiñ
ïa ki kynjri rupa.
20Uta u bakyrduh ka jingkñia
kat kata
u jied da u dieng
u ban ym pyut;
u wad ha lade
ïa u nongtrei dieng u bastad
ban pynïeng ïa ka durblei,
ka ban ym khih.
21Hato phim shym la tip?
phim shym la ïohsngew?
ym shym la ïathuh ïa phi
naduh kaba mynnyngkong?
phim shym la shemphang
naduh ki nongrim ka pyrthei?
22U shong ma u halor ka jylli
ka khyndew,
bad kiba shong ha ka
ki long kum ki puit;
u pynpyiar noh ïa ki bneng
kum ka shanduwa,
bad u pynïar ïa ki
kum ka ïingtrep ban shong:
23u lam ïa ki bakhraw batri
sha kaba ei ei ruh em;
u pynlong ïa ki nongbishar
jong ka pyrthei
kum ka jingthala.
24Shisha, ym shym la thung
ïa ki;
shisha, ym shym la bet ïa ki;
shisha, ka met dieng jong ki
kam shym la suhthied
ha ka khyndew:
u pyrsad ruh halor jong ki,
bad ki tlor noh,
bad ka lyer langthari ka rong
noh ïa ki
kum ïa ka skum.
25Badno te phin pynsyriem ïa nga,
ba ngan long uba ïamarryngkat?
ong uta U Bakhuid.
26To khmied ïa la ki khmat
sha jrong,
bad to khmih,
uei uba la thaw ïa kine,
uba pynmih noh
ïa u paidbah jong ki
da kaba ñiew:
u khot ïa ki baroh
da ka kyrteng;
da ka jingkhraw ka bor
jong u,
bad ba u khlaiñ bor,
uwei ruh um jah noh.
27Balei me ong, ko Jakob,
bad me kren, ko Israel,
“La buhrieh ïa ka lynti
jong nga na U Trai,
bad ka jingbishar jong nga
ka la jah noh na U Blei
jong nga”?
28Mem shym la tip?
Mem shym la ïohsngew?
U Blei bymjukut, U Trai,
U Nongthaw ïa ki bakut
ka pyrthei,
um sngewlwait,
lymne um ju thait;
ym don jingïit
ïa ka jingshemphang jong u.
29U ai ka bor
ha kiba sngewlwait;
bad ha u bymdonbor
u pynroi ka bor.
30Wat ki samla kin sngewlwait
bad kin sngewthait,
bad ki rang samla kin
kyllon khoit:
31hynrei, kita kiba ap khmih
ïa U Trai
kin pynthymmai bor;
kin her sha jrong
da ki thapniang
kum ki pukni;
kin mareh,
bad kin ym sngewthait;
kin ïaid,
bad kin ym sngewlwait.
Currently Selected:
ISAÏAH 40: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India