ISAÏAH 41
41
Ka jingkular U Blei ïa ki Israel
1To sngap noh jar
ha khmat jong nga,
ko ki 'dewlynnong;
bad to ki kynja bynriew
kin pynthymmai
la ka bor:
to kin ïawan hajan;
ynda kumta, to kin ïakren:
to ngin ïawan lang hajan
sha ka jingbishar.
2Uei ba la pynmih ïa uwei
na mihngi,
ïa uba u la khot ha ka hok
kat sha kaba u ïaid?
U aiti noh ïa ki jaid bynriew
ha khmat jong u,
bad u pynlong ïa u ban synshar
halor ki syiem;
u aiti ïa ki kum u pum pum
ïa ka waitlam jong u,
kum ka skum ïa kaba la kynting
ïa ka ryntieh jong u.
3U beh ïa ki, bad u ïaid lait
ha kaba suk;
na ka lynti kaba um ju ïuh
da la ki sla'jat.
4Uei ba la trei bad ba la leh
ïa kane,
u da khot ïa ki pateng bynriew
naduh kaba mynnyngkong?
Ma nga U Trai, u banyngkong,
lem bad u bakhatduh ruh,
nga long uta.
5Ki 'dewlynnong ki la ïohi,
bad ki la sheptieng;
ki bakut ka khyndew
ki la khynñiuh:
ki la ïawan hajan,
bad ki la ïapoi.
6Ki la ïarap uwei uwei
ïa la u paramarjan;
bad uwei uwei u la ong
ha la u para,
“To long shlur bha.”
7Kumta u misteri u la pynshlur
ïa u bania,
bad uta uba sad da u tyrnem
ïa uta uba shoh ïa u rniang,
u da ong shaphang kaba
ai paiñ,
“Ka long ka babha”;
bad u la pynskhem ïa ka
da ki prek,
ba kan ym khih.
8 #
2 Khrn. 20:7; Jak. 2:23. #
Luk. 1:54; Heb. 2:16. Hynrei ma me, ko Israel,
u shakri jong nga,
u Jakob ïa uba nga la jied,
u symbai jong u Abraham
u lok jong nga;
9me ïa uba nga la bat
na ki bakut ka pyrthei,
bad nga la khot ïa me
na ki dong jong ka,
bad nga la ong ha me,
“Me long u shakri jong nga,
nga la jied ïa me
bad ngam shym la kyntait noh
ïa me”;
10 #
Ki Kam. 18:10. to wat sheptieng me,
namar nga long ryngkat
bad me;
wat sngewma,
namar nga long U Blei jong me:
ngan pynshaitbor ïa me;
ho-oid, ngan ïarap ïa me;
ho-oid, ngan kyrshan ïa me
da ka kti kamon ka hok
jong nga.
11Ha khmih,
baroh kat kiba la sngewbitar
ïa me
kin sngewlehrain
bad kin sngewlyngngoh:
kita kiba ïaleh ïa me
kin ym long ei ei ruh em,
bad kin duh noh.
12Men wad ïa ki, te men ym shem,
ïa kita keiñ kiba ïaleh ïa me:
kiba ïaleh thma ïa me
kin ym long ei ei ruh em,
hynrei, kum ka jingthala.
13Namar ma nga U Trai U Blei
jong me,
ngan bat ïa ka kti kamon
jong me,
da kaba ong ha me,
“Wat sheptieng; nga ngan ïarap
ïa me.”
14Wat sheptieng, me u Jakob
uba kum u khñiang,
bad phi ki rangbah Israel;
nga ngan ïarap ïa me,
ong U Trai,
U Nongsiewspah jong me,
uta U Bakhuid jong ki Israel.
15Ha khmih, ngan pynlong ïa me
ka kor khlur kba banep
bad bathymmai kaba don bniat:
men shoh ïa ki lum bah,
bad men pynlwet jin ïa ki,
bad men pynlong ïa ki lum rit
kum u stait.
16Men peh ïa ki, bad ka lyer
kan rong noh ïa ki,
bad ka lyer langthari
kan pynsakma noh ïa ki:
te me men kmen ha U Trai,
men leh thaw burom
ha uta U Bakhuid jong ki Israel.
17Ki baduk bad ki bakyrduh
ki wad um te ym don,
bad u thylliej jong ki
u tyrkhong da ka jingsliang;
nga U Trai ngan shahshkor ïa ki,
nga U Blei ki Israel
ngan ym iehnoh ïa ki.
18Ngan pynmih ïa ki wah
ha ki jaka bajrong,
bad ki pukri hapdeng ki them:
ngan pynlong ka pung um
ïa ka ri khlaw,
bad ki umpohliew
ïa ka 'dewrkhiang.
19Ngan thung ha ka ri khlaw
ïa u dieng Kedar,
u dieng Shittim,
bad u dieng Myrtl,
bad u dieng Olib;
ngan buh ha ka ri kynjah
da u dieng Kseh,
u dieng Thedshar
lem bad u dieng Thashur:
20ba kin ïohi bad ïoh tip,
bad ïapyrkhat,
bad ïashemphang lang,
ba ka kti U Trai ka la leh
ïa kane,
bad U Bakhuid jong ki Israel
u la thaw ïa ka.
Shaphang ka jingthala ki bleithaw
21“To pynmih la ka kam,”
ong U Trai;
“bad to sei ïa ki nia bajur
jong phi,”
ong U Syiem u Jakob.
22To kin sei noh ïa ki,
bad pynpaw ha ngi
ïa kata ka ban sa long:
to pynpaw ïa kiei kiei
kiba mynshuwa,
kumno ki long,
ba ngin ïapyrkhat ïa ki,
bad tip ïa ka jinglong
bakhatduh jong ki;
lane pynpaw ha ngi
ïa kiei kiei ki ban sa long.
23To pynpaw ïa kiei kiei
ki ban sa jia hadien,
ba ngin ïoh tip
ba phi long ki blei:
to leh bha ñiuma,
lane to leh sniew,
ba ngin sngewma,
bad ba ngin ïakhmih lang.
24Ha khmih, phim long ei ei
ruh em,
bad ka kam jong phi
ka jingthala:
uta uba jied ïa phi
u long ka jingijli.
25Nga la pynmih ïa uwei
na shatei,
bad u la wan;
na mihngi ïa uwei
uba khot kyrpad ïa
ka kyrteng jong nga:
te un wan halor ki nongsynshar
kumba halor ka sorki,
bad kumba u nongthaw khiew
u da ïuh ïa ka 'dewbyrtha.
26Uei ba la pynbna ïa kane
na kaba mynnyngkong,
ba ngin ïoh tip?
Bad naduh mynshuwa,
ba ngin ong,
“U long u bahok?”
Ho-oid, ym don uba pynbna,
ho-oid, ym don uba pynpaw,
ho-oid, ym don uba ïohsngew
ïa ka ktien jong phi.
27Nga nyngkong ngan ong
ha ka Seïon,
“Ha khmih, ha khmih ïa ki;
bad ngan ai ha Jerusalem
ïa uwei uba
ïathuhkhana babha.”
28Te haba nga khmih,
ym don u briew;
wat hapdeng jong ki
ym don u nongsylla,
uba haba nga kylli ïa ki,
uba lah ban ai jubab
shikyntien.
29Ha khmih, kine baroh,
ki kam jong ki,
ki long ka jingthala
bad ei ei ruh em:
ki dur jong ki, ba la saiñ
ki long ka lyer bad kaba thala.
Currently Selected:
ISAÏAH 41: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India