JENESIS 50

1Te u Joseph u la noh ha ka khmat u kpa jong u, bad u la ïam halor jong u, bad u la doh ïa u. 2Bad u Joseph u la hukum ïa ki nongpynkhiah kiba long ki shakri jong u ba kin kyllan masla ïa u kpa jong u: te kita ki nongpynkhiah ki la kyllan masla ïa u Israel. 3Bad la pyndep ïa ki sawphew sngi ïa u; naba kumta ki ju pyndep ïa ki sngi jong kita ïa kiba ki kyllan masla: ynda kumta, ki Ijipt ki la ïaïambriew ïa u hynñiewphew sngi.

4Te ynda la dep kita ki sngi ka jingïambriew ïa u, u Joseph u la kren ha kita kiba na ka ïing u Pharaoh, u da ong, “Lada mynta nga la shem ka jingsbun ha khmat jong phi, to da kren ha u Pharaoh, nga kyrpad ïa phi, da ong, 5#Jen. 47:29-31.u kpa jong nga u la pynsmai ïa nga, u da ong, ‘Ha khmih, ngan sa ïap noh: ha ka jingtep jong nga ïa kaba nga la tih ïa lade hi keiñ ha ka ri Kanaan, hangta men tep ïa nga.’ Bad mynta to shah, nga kyrpad ïa me, ba ngan leit kiew khnang ban ïoh tep ïa u kpa jong nga, hadien kata, ngan wan phai pat.” 6Bad u Pharaoh u la ong, “To khie leit kiew, bad to tep ïa u kpa jong me, kumba u la pynsmai ïa me.” 7Ynda kumta, u Joseph u la leit kiew ïa ka ban tep ïa la u kpa: bad ki shakri jong u Pharaoh baroh, ki bakhraw batri ka ïing jong u, bad ki bakhraw batri baroh jong ka ri Ijipt, ki la ïaleit kiew ryngkat bad u, 8bad ka ïing u Joseph baroh, bad ki hynmen hynbew jong u, bad ka ïing u kpa jong u: hynrei, tang ïa la ki barit bad ïa la ki kynhun langbrot bad ïa la ka jingri, ki la iehnoh ha ka ri Goshen. 9Bad la leit kiew ryngkat bad u ki kali ïapom, bad ki riewshong kulai ruh de: ka la long ka jingïalang briew bakhraw eh. 10Te haba ki la ïapoi ha ka pynthor Atad, kaba sha shiliang ka Jordan, ki la ïa-pynlong hangta ïa ka jingïambriew ka bakhraw bad kaba jur: namar u la pynlong ka jingïambriew na ka bynta u kpa jong u hynñiew sngi.

11Ki kynja Kanaan kiba shong sah ha kata ka ri, ynda ki la ïohi ïa kata ka jingïambriew ha ka kyntem ka pynthor Atad, ki la ïa-ong, “Kane ka bakhraw ka jingïambriew ka jong ki Ijipt:” namar kata, ki la khot kyrteng ïa kata ka jaka “Ka Abel-Misraim”, kaba sha shiliang ka Jordan. 12Kumta, ki khun shynrang u Jakob ki la leh ïa u kumba u la hukum ïa ki; 13#Ki Kam. 7:16.naba ki khun shynrang jong u ki la ïawallam noh ïa u sha ka ri Kanaan, bad ki la ïatep ïa u hapoh ka krem kaba ha ka lyngkha ka Makhpelah, ïa kaba u Abraham u la lah thied lem bad ka lyngkha, ïa ka ban long ka jaka jingtep, na u Ephron u kynja Hit, marpyrshah ïa ka Mamre. 14Te u Joseph, ynda u la lah tep ïa la u kpa, u la leit phai pat sha ka ri Ijipt: ma u bad ki hynmen hynbew jong u, bad baroh kat kiba la leit kiew ryngkat bad u ïa ka ban tep ïa u kpa jong u.

U Joseph u pyntngen ïa la ki hynmen

15Ki hynmen jong u Joseph ynda ki la ïohi ba u la ïap u kpa jong ki, ki la ïa-ong, “Lehse mynta u Joseph un isih ïa ngi, bad un siew kylliang pat kaba biang ïa ngi ïa kata ka basniew baroh ïa kaba ngi la leh ïa u.” 16Namar kata, ki la ïaphah ïathuh ha u Joseph, “U kpa jong me u la bthah mynshuwa ba u la ïap, u da ong, 17‘Kumne phin ong ha u Joseph, “To map noh, nga kyrpad ïa me mynta, ïa ka jingpalat ki hynmen jong me, bad ïa ka pop jong ki; naba ki la ïaleh bymman ïa me; te mynta, to map noh, nga kyrpad ïa me, ïa ka jingpalat ki shakri jong U Blei u kpa jong me.” ’ ” Bad u Joseph u la ïam haba ki la ïakren ha u. 18Bad ki hynmen jong u ki la wan bad ki la dem ngon ha khmat jong u; bad ki la ïa-ong, “Ha khmih, ngi long ki shakri ïa me.” 19Bad u Joseph u la ïathuh ha ki, “Wat sheptieng; naba hato nga long ma nga ha ka jaka jong U Blei? 20Phi shisha, phi la lah thmu ïa ka basniew pyrshah ïa nga; hynrei U Blei u la thmu ïa ka, ïa ka ban pynbha, ïa ka ban pynlong ka lad, kumba ka long ha kane ka sngi, ïa ka ban pynim ïa ki paidbah babun. 21Namar kata, mynta, wat sheptieng: ngan ri bsa ïa phi, bad ïa ki barit jong phi.” Bad u la pyntngen ïa ki, bad u la kren pynsngewbha ïa ka dohnud jong ki.

Ka jingïap u Joseph

22Kumta, u Joseph u la shong sah ha ka ri Ijipt: ma u bad ka ïing u kpa jong u. Bad u Joseph u la im shispah shiphew snem. 23Bad u Joseph u la ïohi ïa la ki ksiew ar pateng ksiew ruh na u Ephraim: bad la ri bsa ïa ki khun u Makhir u khun u Manasseh ruh ha ki khohsiew u Joseph. 24Te u Joseph u la ong ha ki hynmen hynbew jong u, “Nga te ngan sa ïap noh: hynrei, U Blei shisha un wan khmih ïa phi, bad un ïalam noh ïa phi na kane ka ri sha kata ka ri ïa kaba u la smai ha u Abraham, ha u Isaak, bad ha u Jakob.” 25#Eks. 13:19; Jos. 24:32; Heb. 11:22.Bad u Joseph u la pynsmai ïa ki khun shynrang u Israel, u da ong, “U Blei shisha un wan khmih ïa phi, bad phin lam noh artad ïa ki shyieng jong nga na kane ka ri.” 26Kumta, u Joseph u la ïap, uba shispah shiphew snem ka rta: bad ki la kyllan masla ïa u, bad la buh ïa u ha ka synduk tep briew ha ka ri Ijipt.

Currently Selected:

JENESIS 50: KHB

Highlight

Copy

Compare