JENESIS 49
49
Ka jingkyrkhu u Jakob ïa la ki khun shynrang
1Ynda kumta, u Jakob u la khot ïa la ki khun shynrang, bad u la ong, “To ïalang hajuh, ba ngan ïathuh ha phi kaei kan jia ïa phi ha ki sngi ki ban sa wan.
2“To ïalang hajuh,
bad to sngew
phi ki khun shynrang
u Jakob;
ho-oid keiñ,
to sngew ïa u Israel
u kpa jong phi.
3“U Reuben,
me u khun nyngkong
jong nga,
ka jingkhlaiñ jong nga,
bad ka jingsdang ka bor
jong nga,
ka jingbha tam ka burom,
bad ka jingbha tam ka bor:
4uba kyrsoi thnam kum ka um,
men ym long uba kham
donnam tam;
naba me la kiew
sha ka jingthiah
u kpa jong me;
bad kumta,
me la pyntngit ïa ka:
sha ka jingthiah jong nga
keiñ u la kiew.
5“U Simeon bad u Lebi
ki ïalong shipara;
ki tiar ka jingleh-jubor
ki long ki waitlam jong ki.
6Wat ai ba ka mynsiem
jong nga
kan wan hapoh
ka jingïasylla jong ki:
ka burom jong nga
kan ym ïasoh bad
ka jingïalang jong ki:
naba ha la ka jingbitar
ki la pynïap ïa u briew,
bad ha la ka jingmon
pathar hi
ki la ot noh ïa ki masi.
7Long ba la tim
ïa ka jingbitar jong ki,
naba ka la sat eh;
bad ïa ka jingpynhiar kput
jong ki,
naba ka la i runar eh:
ngan pynïakhlad ïa ki
ha u Jakob,
bad ngan pynsaphred ïa ki
ha Israel.
8“Ma me u Judah,
ki para jong me
kin ïaroh ïa me:
ka kti jong me kan long
ha ka ryndang ki
nongshun jong me;
ki khun u kpa jong me
kin nguh ngon ïa me.
9 #
Jkñ. 24:9; Jpw. 5:5. U Judah
u long u khun sing:
na ka jinglute,
ko khun, me la wan kiew:
u la dem, u la thiah
kum u sing,
bad kum ka sing kmie;
uei u ban kyrsiew ïa u?
10U dieng synshar
un ym kynriah
na u Judah,
lymne u nongthaw aiñ
napdeng ki sla'jat jong u,
ha ban da wan u Shiloh;
bad ïa u ki jaid bynriew
kin ïakohnguh.
11U da teh ïa la ka
kadda khynraw
ha u dieng soh Waiñ,
bad ïa la i khun kadda
ha u dieng soh Waiñ
u babha tam;
u la sait ïa la ki jaiñ
ha ka umsoh,
bad ïa la ka barandi
ha ka snam ki soh Waiñ.
12U saw la ki khmat
na ka umsoh,
bad u lieh la ki bniat
na ka dud.
13“U Sabulon#49:13 Sabulon: Ha ka Ktien Hebru kane ka kyrteng ka dei Sebulun.
un shong harud
ka duriaw;
bad un long ïa ka jaka
rieh ki lieng bah,
bad ka pud jong u
kan long haduh Sidon.
14“U Issakhar
u long u kadda
uba shong dem ryngkhung
ba dem hapdeng
ar tylli ki jingkit:
15ynda u la ïohi ba
kaba jahthait
ka long ka babha,
bad ïa ka khyndew
ba ka long kaba itynnad;
un pyndem ïa la
ka tyrpeng ban bah,
bad un long uba shakri
hapoh ka khajna.
16“U Dan
un bishar ïa la
ki briew,
kum uwei na ki
jaid Israel.
17U Dan un long u bseiñ
ha ka lynti bah,
bad u 'seiñ tyrnem
ha ka lynti khlaw,
uba puh ïa ka khongdong'jat
u kulai,
katba un kyllon da dien
u trai bashong.
18Nga la khmih kyrmen
ïa ka jingpynim jong me,
A Trai.
19“U Gad,
ka kynhun bah kan
ban ïa u:
te u un ban ha
ka bakhatduh.
20“U Asher,
ka khleiñ kan long
ka jingbam jong u,
bad un sei
ki soh bashngiam rai rai
ba bit ïa u syiem.
21“U Naphtali
u long ka skei ba la pyllait:
u kren ki ktien
ba sngewtynnad.
22“U Joseph
un long ka tnat
basei soh byrhien,
ka tnat basei soh byrhien
harud ka pukri,
ki tnat jong u kin pur
ïa ka kynroh.
23Ki nongsiat khnam
ki la pynsngewsih sat ïa u
bad ki la ïasiat,
bad ki la behbeiñ ïa u.
24Hynrei, ka ryntieh jong u
pynban ka la neh bor,
bad ki ksang'ti jong u
ki la nang kham khlaiñ
da ki kti jong
U Bakhrawbor u Jakob;
(nangta u long
u Nongsharai,
u Mawsiang jong
u Israel),
25da U Blei u kpa
jong me keiñ,
u ban ïarap ïa me,
bad U Badonbor Baroh,
u ban kyrkhu ïa me
da ki jingkyrkhu
ka bneng na jrong,
bad da ki jingkyrkhu
kiba jylliew
ba long shapoh,
bad da ki jingkyrkhu
ki jymbuiñ
bad jong ka kpoh.
26Ki jingkyrkhu u kpa jong me
kiba kham bha
ïa ki jingkyrkhu
ki kmie ki kpa jong nga
haduh ka bakut ki lum
ki bymjukut:
kin long ha ka khlieh
u Joseph,
bad ha ka shynrong khlieh
uta ïa uba la pynkyrpang
na la ki para.
27“U Benjamin
un lute kum u suri:
mynstep un bam duh
ïa ka jinglute,
bad mynmiet un sam
ïa kaba la lah lute.”
28Kine ki long ki khat-ar jaid Israel baroh: bad kane ka long ba la kren u kpa jong ki ha ki, bad u la kyrkhu ïa ki; uwei uwei ruh katba kum ka jingkyrkhu jong u, u la kyrkhu ïa ki.
Ka jingïap bad kaba tep ïa u Jakob
29Ynda kumta, u la hukum ïa ki, bad u la ong ha ki, “Ïa nga yn sa lum sha la ki briew; to tep ïa nga bad ki kpa jong nga ha ka krem kaba ha ka lyngkha u Ephron u kynja Hit, 30#Jen. 23:3-20.ha kata ka krem kaba ha ka lyngkha Makhpelah, kaba marpyrshah ïa ka Mamre, ha ka ri Kanaan, ïa kaba u Abraham u la thied lem bad ka lyngkha na u Ephron u kynja Hit, ïa ka ban long ka bynta trai kum ka jaka tep. 31#Jen. 25:9-10; 35:29.Hangta ki la ïatep ïa u Abraham bad ïa ka Sara ka tnga jong u; hangta ki la ïatep ïa u Isaak bad ïa ka Rebekka ka tnga jong u; bad hangta ruh nga la tep ïa ka Leah: 32kata ka lyngkha keiñ bad ka krem hapoh jong ka, ïa kaba la thied na ki khun u Heth.” 33#Ki Kam. 7:15.Ynda u Jakob u la wai noh ban hukum ïa la ki khun shynrang, u la ring ïa la ki kjat sha ka jingthiah bad u la ïap, bad la ïalum ïa u sha la ki briew.
Currently Selected:
JENESIS 49: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
