ESTHER 8
8
La ai bor ïa ki Jiw ban ïada ïa lade
1Ha kata ka sngi, u Ahasueros syiem u la ai ïa ka ïing u Haman, u nongshun jong ki Jiw, ha ka Esther syiem. Bad u Mordekai u la wan ha khmat u syiem; namar ka Esther ka la lah ïathuh u la dei aïu ïa ka. 2Bad u syiem u la law noh ïa la ka sa'ti, ïa kaba u la lah shim noh na u Haman, bad u la ai ïa ka ha u Mordekai. Bad ka Esther ka la buh ïa u Mordekai halor ka ïing u Haman.
3Bad ka Esther ka la kren pat sa shi sien ha khmat u syiem, bad ka la dem ngon ha ki sla'jat jong u, bad ka la kyrpad ïa u da ki jingjaw ummat ban pynduh noh ïa ka jingleh bymman jong u Haman u nong Agag, bad ïa ka buit sniew jong u ïa kaba u la shet pyrshah ïa ki Jiw. 4Ynda kumta, u syiem u la pyni sha ka Esther ïa uta u dieng synshar ksiar. Kumta, ka Esther ka la khie joit, bad ka la ïeng ha khmat u syiem. 5Bad ka la ong, “Lada u syiem u sngewbha, bad lada nga la shem ka jingsngewbha ha khmat jong u, bad lada kata ka ibit ha khmat u syiem, bad ba nga long kaba pynsngewbha ha khmat jong u, ai ba yn thoh ban pynkylla ïa kita ki shithi ba la pyrkhat sniew da u Haman u khun u Hammedatha u nong Agag, ïa kiba u la lah thoh ban pynjot ïa ki Jiw kiba don ha ki shnat baroh ki jong u syiem: 6namar kumno nga lah ban shah ban ïohi ïa kata ka jingsniew ka ban jia ha ki briew jong nga? Lane kumno nga lah ban shah ban ïohi ïa ka jingpynjot ïa ki kha ki man jong nga?” 7Ynda kumta, u Ahasueros syiem u la ong ha ka Esther syiem bad ha u Mordekai u Jiw, “Ha khmih, nga la ai ha ka Esther ïa ka ïing u Haman, bad ïa u ki la phasi ha ka dieng phasi, namar ba u la buh la ka kti ha ki Jiw. 8To thoh ma phi ruh sha ki Jiw, katba phi ibit, ha ka kyrteng u syiem, bad to shon ïa ka da ka sa'ti u syiem: namar ïa ka jingthoh ïa kaba la thoh ha ka kyrteng u syiem, bad ïa kaba la shon da ka sa'ti u syiem, ym lah pynkylla mano mano ruh em.”
9Ynda kumta, la khot ha kata ka por ïa ki nongthoh ki jong u syiem, ha u bnai u balai, uba long u 'nai Siban, ha ka ba-arphew lai tarik jong u: bad la thoh ïa ka katba kum kata baroh ïa kaba u Mordekai u la hukum ïa ki Jiw, ïa ki lyngskor, bad ïa ki nongsynshar bad ïa ki rangbah jong ki shnat kiba long naduh ri India haduh ka ri Ethiopia, shispah arphew hynñiew ki shnat, sha kawei pa kawei ka shnat, katba kum ka jingthoh jong ka, bad sha kawei pa kawei ka kynja bynriew katba kum ka ktien jong ki, bad sha ki Jiw katba kum ka jingthoh jong ki, bad katba kum ka ktien jong ki. 10Bad u la thoh ha ka kyrteng u Ahasueros syiem, bad u la shon ïa ka da ka sa'ti u syiem, bad u la phah ïa ki shithi da ki nongphet-dak ba shong kulai, ki da shong halor ki kulai bastet ïa kiba la ju pyndonkam ha ka kam u syiem, kiba la ri khnang: 11ha kiba u syiem u ai bor ïa ki Jiw kiba la don ha kawei pa kawei ka nongbah ban ïalang, bad ban ïeng, na ka bynta la ka jingim, ban pynjot, ban pynïap, bad ban pynduh noh ïa ka bor jong ki briew bad ki shnat baroh ki ban da ktah kti ïa ki, ïa ki khynnah bad ïa ki kynthei, bad ban lute ïa ka spah jong ki, 12ha kajuh ka sngi ha ki shnat baroh jong u Ahasueros syiem, kata ka long, ha ka bakhatlai tarik u bnai u bakhat-ar, uba long u 'nai Adar. 13Ïa ka nokol#8:13 ka nokol: Kane ka mut ka kopi. jong kata ka jingthoh, ba ka la dei ban pyntip ïa kata ka hukum ha la ka shnat ka shnat, la pynbna ha kita ki kynja bynriew baroh, bad ba ki Jiw ki la dei ban long kiba la khreh hamar kata ka sngi ban pynhiar kput ha ki nongshun jong ki. 14Kumta, ki nongphet-dak kiba la shong halor ki kulai bastet ïa kiba la ju pyndonkam ha ka kam u syiem, ki la leit noh ba la pynkyrkieh bad la ban khia da ka hukum u syiem; bad ïa kata ka hukum la pynbna ha Shushan ka ïingsyiem.
15Bad u Mordekai u la mih noh na khmat u syiem ha ka jaiñkup syiem ka babyrïong bad balieh, bad da ka pansngiat ksiar bakhraw, bad da ka barandi jaiñ linen bani bad basaw bthuh: bad ka nongbah Shushan ka la risa bad ka la kmen. 16Ki Jiw ki la ïoh ka jingshai bad ka jingsngewbha, bad ka jingkmen bad ka burom. 17Bad ha ka shnat baroh, bad ha ka nongbah baroh, kat shaba ka hukum u syiem bad ka jingrai jong u ki la poi, ki Jiw ki la ïoh ka jingsngewbha bad ka jingkmen, ka jingkhawai bad ka sngi babha. Bad bun napdeng kita ki kynja bynriew ki la kylla Jiw; namar ka jingsheptieng ïa ki Jiw ka la ngat ha ki.
The Bible Society of India