ESTHER 9
9
Ki Jiw ki pynïap ïa ki nongshun jong ki
1Te ha u bnai u bakhat-ar, uba u 'nai Adar, ha ka bakhatlai tarik jong uta, haba yn sa pyndep ïa ka hukum u syiem bad ïa ka jingrai jong u, ha kata ka sngi ha kaba ki nongshun jong ki Jiw ki la kyrmen ban ïoh bor halor jong ki; pynban, la pynkylla ïa ka da kumwei, ba ki Jiw ki la ïoh bor halor kita kiba la shun ïa ki; 2ki Jiw ki la ïalang ha la ki nongbah ha ki shnat baroh ki jong u Ahasueros syiem, ban ktah kti halor kita kat kiba la wad ban pynsniew ïa ki; bad ym don uba lah ban ïeng ïaleh ïa ki; namar ka jingsheptieng ïa ki ka la ngat ha kita ki kynja bynriew baroh. 3Bad ki rangbah baroh jong ki shnat, bad ki lyngskor, bad ki nongsynshar, bad kita kiba la ju leh ïa ka kam u syiem, ki la ïarap ïa ki Jiw; namar ka jingsheptieng ïa u Mordekai ka la ngat ha ki. 4Namar u Mordekai u la long u bakhraw ha ka ïing u syiem, bad ka nam jong u ka la phriang kylleng kita ki shnat baroh: namar une u briew, u Mordekai keiñ, u la nang khraw nang khraw. 5Bad ki Jiw ki la shoh ïa la ki nongshun baroh da kaba pom da ka waitlam, bad da kaba pynïap bad da kaba pynjot, bad ki la leh katba ki mon ha kita kiba la shun ïa ki. 6Bad ha ïingsyiem Shushan, ki Jiw ki la pynïap bad ki la pynjot sanspah ngut ki briew. 7Bad ïa u Parshandatha, bad u Dalphon, bad u Aspatha, 8bad ïa u Poratha, bad u Adalia, bad u Aridatha, 9bad ïa u Parmasta, bad u Arisai, bad u Aridai, bad ïa u Baisatha. 10Ki shiphew ngut ki khun u Haman u khun u Hammedatha, u nongshun jong ki Jiw, ki la pynïap noh; hynrei, ha ka spah kim shym buh la ka kti.
11Ha kata ka sngi, ïa ka jingkheiñ jong kita ba la pynïap ha ïingsyiem Shushan la wallam ha khmat u syiem. 12Bad u syiem u la ong ha ka Esther syiem, “Ki Jiw ki la pynïap bad ki la pynjot sanspah ngut ki rangbah ha ïingsyiem Shushan, bad ïa ki shiphew ngut ki khun u Haman; aïu te ki la leh ha kita kiwei ki shnat ki jong u syiem! Mynta, kaei ka long ka jingpan jong pha? bad yn sa ai ïa ka ha pha: lane sa kaei ka jingkyrpad jong pha? bad yn sa leh ïa ka.” 13Ynda kumta, ka Esther ka la ong, “Lada u syiem u sngewbha, to shah ïa ki Jiw kiba don ha Shushan ban leh sa lashai ruh katba kum ka jingrai ha kane ka sngi, bad ai ba yn phasi ïa ki shiphew ngut ki khun u Haman ha ki dieng phasi.” 14Bad u syiem u la hukum ba yn leh kumta: bad ïa ka rai la pynbna ha Shushan; bad ki la phasi ïa ki shiphew ngut ki khun u Haman. 15Bad kita ki Jiw kiba la don ha Shushan ki la ïalang ha ka bakhatsaw tarik ruh u 'nai Adar, bad ki la pynïap noh laispah ngut ki rangbah ha Shushan; hynrei, ha ka spah kim shym buh la ka kti.
Ka Jingkhawai Niam ki Pur
16Bad kita kiwei pat ki Jiw kiba la don ha ki shnat ki jong u syiem ki la ïalang, bad ki la ïeng na ka bynta ïa la ki jingim, bad ki la ïoh shongthait na ki nongshun jong ki, bad ki la pynïap na kita kiba la shun ïa ki, hynñiewphew san hajar; hynrei, ha ka spah kim shym buh la ka kti. 17Ïa kane la leh ha ka bakhatlai tarik u 'nai Adar; bad ha ka bakhatsaw tarik jong uta ki la shongthait, bad ki la pynlong ïa ka, ka sngi jingkhawai bad jingkmen. 18Hynrei, ki Jiw kiba la don ha Shushan ki la ïaseng lang ha ka bakhatlai tarik jong u, bad ha ka bakhatsaw tarik jong u; bad ha ka bakhatsan tarik de ki la shongthait, bad ki la pynlong ïa ka, ka sngi jingkhawai bad jingkmen. 19Namar kata, kita ki Jiw kiba ha ki shnong rit, bad kiba la shong ha ki shnong ba khlem ker kynroh, ha ka bakhatsaw tarik u 'nai Adar ki pynlong ka sngi jingkmen bad jingkhawai, bad ka sngi babha, bad ban phah ïa ki jingai sngewbha paralok.
20Bad u Mordekai u la thoh ïa kine kiei kiei ruh, bad u la phah ki shithi ha ki Jiw baroh kiba la don ha ki shnat baroh jong u Ahasueros syiem, ha kiba jan bad ha kiba jngai, 21ban hukum ïa ki, ba ïa ka bakhatsaw tarik u 'nai Adar, bad ïa ka bakhatsan tarik jong uta, kin sumar man la ka snem, 22kum kita ki sngi ha kiba ki Jiw ki la ïoh shongthait na ki nongshun jong ki, bad ïa uta u bnai ïa uba la pynkylla ha ki ka jingkmen na ka jingsngewsih, bad ka sngi babha na ka jingïam: ba kin pynlong ïa ki, ki sngi jingkhawai bad jingkmen, bad ban phah ïa ki jingai sngewbha paralok, bad ïa ki jingai sha ki baduk.
23Bad ki Jiw ki la shimti ban leh kumba ki la lah sdang, bad kumba u Mordekai u la lah thoh sha ki; 24#Est. 3:7.namar u Haman u khun u Hammedatha, u nong Agag, u nongshun jong ki Jiw baroh, u la lah pyrkhat sniew ïa ki Jiw ban pynjot noh ïa ki, bad u la lah noh Pur, kata ka long, “ka jingkhalai Nusib”, ban pynduh noh ïa ki; 25hynrei, haba kata ka la wan ha khmat u syiem, u la hukum da ki shithi ba kata ka jingpyrkhat sniew, ïa kaba u la pyrkhat ïa ki Jiw, kan phai kylla halor ka khlieh jong u hi: bad ba yn phasi ïa u bad ïa ki khun jong u ha ki dieng phasi. 26Namar kata, ïa kine ki sngi ki la khot, “ki Pur”, ha ka kyrteng “ka Pur.” Namar ki ktien baroh kane ka shithi bad haba ki la lah ïohi shaphang kane ka kam, bad kata kaba la lah jia ha ki, 27namar kata keiñ, ki Jiw ki la thung, bad ki la shimti ha lade, bad ha u symbai jong ki, bad ha baroh kat kiba la pynïasoh ïa lade ha ki, ba kan ym duh noh, ba kin sumar ïa kine ar sngi, katba kum ka jingthoh jong ka, bad katba kum kata ka por ba la buh ïa ka, man la ka snem; 28bad ba yn kynmaw ïa kine ki sngi bad ba yn sumar ïa ki pateng la pateng baroh, man la ka ïing, man la ka shnat, bad man la ka nongbah; bad ba kine ki sngi jong ki Pur kin ym duh noh napdeng ki Jiw, lymne ka jingpynkynmaw ïa ki kan ym duh noh na u symbai jong ki.
29Ynda kumta, ka Esther syiem, ka khun u Abihail, bad u Mordekai u Jiw, ki la ïathoh da ka bor jong ki baroh ban pynskhem ïa kane ka shithi ba ar jong ki Pur. 30Bad u la phah ki shithi sha ki Jiw baroh, sha kita ki shispah arphew hynñiew ki shnat jong ka hima u Ahasueros, da ki ktien ka jingsuk bad ka jingshisha, 31ban pynskhem ïa kine ki sngi jong ki Purim ha ka por ba la buh ïa ki, kumba u Mordekai u Jiw bad ka Esther syiem ki la hukum ïa ki, bad kumba ki hi ruh, ki la lah thung na ka bynta ïa lade bad na ka bynta u symbai jong ki, shaphang kita ki jingshah jingit bad ka jinglynñiar jong ki. 32Bad ka hukum jong ka Esther ka la pynskhem ïa kine kiei kiei ki jong ki Pur; bad la thoh ïa ka ha kata ka kitab.
The Bible Society of India