ESTHER 7
7
La lap ïa ka buit u Haman bad la sdien phasi ïa u
1Kumta, u syiem bad u Haman ki la ïawan ban ïakhawai bad ka Esther syiem. 2#Mrk. 6:23.Bad u syiem u la ong pat ha ka Esther ha ka sngi ka ba-ar ha ka jingkhawai Waiñ, “Kaei ka long ka jingpan jong pha, ko Esther syiem? Bad yn ai ïa ka ha pha: bad kaei ka long ka jingkyrpad jong pha? wat haduh kaba shiteng ka hima yn pyndep ïa ka.” 3Ynda kumta, ka Esther syiem ka la ïathuh bad ka la ong, “Lada nga la ïoh ka jingsngewbha ha khmat jong me, ko syiem, bad lada u syiem u sngewbha, to yn ai ha nga ïa ka jingim jong nga ha ka jingpan jong nga, bad ïa ki briew jong nga ha ka jingkyrpad jong nga: 4namar la die noh ïa ngi, ma nga bad ki briew jong nga, ban pynjot, ban pynïap, bad ban pynduh noh ïa ngi. Hynrei, lada la lah die mraw ïa ngi shynrang bad kynthei, nga la sngap noh jar, la uta u nongïaleh pyrshah un ym lah ban buria ïa ka jingduh u syiem.” 5Ynda kumta, u Ahasueros syiem u la kren bad u la ong ha ka Esther syiem, “Uei uta, bad hangno u don, uba la nud ban pyrkhat ha la ka dohnud ban leh kum ïa kata?” 6Bad ka Esther ka la ong, “U nongïaleh pyrshah bad u dusmon, une u Haman bymman keiñ.” Ynda kumta, u Haman u la sheptieng ha khmat u syiem bad ka syiem. 7Te u syiem u la ïeng ha la ka jingbitar na kata ka jingkhawai Waiñ bad u la leit shapoh kata ka kper ka ïingsyiem: bad u Haman u la ïeng ban kyrpad na ka bynta la ka jingim ha ka Esther syiem: namar u la ïohi ba la don ka jingsniew ba la thew pyrshah ïa u da u syiem. 8Ynda kumta, u syiem u la wan phai pat na ka kata ka kper ka ïingsyiem sha kata ka jaka ka jingkhawai Waiñ; bad u Haman u la kyllon halor kata ka jingshong ha kaba ka Esther ka la don. Ynda kumta, u syiem u la ong, “Un leh bor mo ïa ka syiem ha khmat jong nga ha ïing?” Te tang shu mih noh kata ka ktien na ka shyntur u syiem, ki la tap ïa ka khmat u Haman. 9Ynda kumta, u Harbonah, uwei na ki ïunukh, kiba la don ha khmat u syiem, u la ong, “Ha khmih ruh, kata ka dieng phasi kaba sanphew pruh ka jingjrong, ïa kaba u Haman u la thaw ïa u Mordekai, uba la kren bha na ka bynta u syiem, ka ïeng ha ka ïing u Haman.” Bad u syiem u la ong, “To phasi ïa u ha kata.” 10Kumta, ki la phasi ïa u Haman ha kata ka dieng phasi kaba u la khreh ïa u Mordekai. Kumta, la pynjem ïa ka jingbitar u syiem.
The Bible Society of India