ESTHER 6
6
La pynbor ïa u Haman ban lehburom ïa u Mordekai
1Ha kata ka miet, u syiem um lah ban ïohthiah; bad u la hukum ban wallam ïa Ki Kitab Ka Jingthoh Shaphang Ki Jingjia, bad la pule ïa ki ha khmat u syiem. 2#Est. 2:21,22.Bad la shem ba la thoh, ba u Mordekai u la lah ïathuh shaphang u Bigthana bad u Teres, ar ngut na ki ïunukh u syiem, na kiba la ju ap ïa ka jingkhang, kiba la thew ban ktah kti ïa u Ahasueros syiem. 3Bad u syiem u la ong, “Ka burom aïu bad ka nam aïu la leh ïa u Mordekai namar kane?” Ynda kumta, kita ki shakri ki jong u syiem kiba la ju shakri ïa u ki la ong, “Ym shym leh ei ei ïa u.” 4Bad u syiem u la ong, “Don mano ha ka phyllaw?” Ha kata ka por u Haman u la wan sha ka phyllaw ba kham habar ka ïing u syiem, ban kren ha u syiem ban phasi ïa u Mordekai ha kata ka dieng phasi kaba la lah pynkhreh ïa u. 5Bad ki shakri u syiem ki la ïathuh ha u, “Ha khmih, u Haman u ïeng ha phyllaw.” Bad u syiem u la ong, “Ai ba un wan shapoh.” 6Kumta, u Haman u la wan shapoh. Bad u syiem u la ong ha u, “Yn leh aïu ïa uta u briew ïa uba u syiem u sngewbha ban pyndonburom?” Te u Haman u la ong ha la ka dohnud, “Ïano pat u syiem u sngewbha ban pyndonburom kham tam ban ïa nga?” 7Bad u Haman u la ong ha u syiem, “Ïa uta u briew ïa uba u syiem u sngewbha ban pyndonburom, 8ai ba yn wallam ïa ka jaiñkup syiem ïa kaba u syiem u ju kup, bad ïa uta u kulai ha uba u syiem u ju shong, bad yn pynphong ïa ka pansngiat syiem ha ka khlieh jong u: 9bad ai ba ïa kata ka jaiñkup bad ïa uta u kulai yn aiti noh ha ka kti uwei na ki rangbah ba kham donburom tam ki jong u syiem, ba kin pynkup ïa uta u briew ïa uba u syiem u sngewbha ban pyndonburom da ki, bad ban pynshong kulai ïa u lyngba ka lynti bah ka nongbah, bad ban pyrta ha shuwa jong u, ‘Kumne yn leh ïa uta u briew uba u syiem u sngewbha ban pyndonburom ïa u.’ ” 10Ynda kumta, u syiem u la ong ha u Haman, “To pynkloi, bad to shim ïa kata ka jaiñkup bad ïa uta u kulai, kumba me la ong, bad to leh kumta keiñ, ïa u Mordekai u Jiw, uba shong ha ka khyrdop u syiem: wat ai ban duna ei ei ruh em na kata baroh kaba me la kren.” 11Ynda kumta, u Haman u la shim ïa kata ka jaiñkup bad ïa uta u kulai, bad u la pynphong ïa u Mordekai, bad u la pynshong kulai ïa u lyngba ka lynti bah ka nongbah, bad u la pyrta ha shuwa jong u, “Kumne yn leh ïa uta u briew uba u syiem u sngewbha ban pyndonburom ïa u.”
12Te u Mordekai u la wan pat sha ka khyrdop u syiem. Hynrei, u Haman u la leit kyrkieh sha la ïing, u da sngewsih bad u da tap noh ïa la ka khlieh. 13Bad u Haman u la ïathuh ha ka Seres ka tnga jong u bad ha ki lok jong u baroh ïa kaei kaei baroh kaba la lah jia ïa u. Ynda kumta, ki riewstad jong u bad ka Seres ka tnga jong u ki la ong ha u, “Lada u Mordekai, uba me la sdang ban dem ha khmat jong u, u long na u symbai jong ki Jiw, men ym lah ïa u, hynrei, men hap ha khmat jong u da shisha.”
14Haba ki la dang ïakren bad u, ki la wan ki ïunukh u syiem, bad ki la pynkyrkieh ban wallam ïa u Haman sha kata ka jingkhawai ïa kaba ka Esther ka la lah khreh.
The Bible Society of India