ESTHER 5
5
Ka Esther ka khot sngewbha ïa u syiem bad ïa u Haman sha ka jingkhawai jong ka
1Te ha ka sngi ka balai, ka Esther ka la phong ïa la ki jaiñ syiem, bad ka la ïeng ha ka phyllaw ba kham shapoh ka ïing u syiem, kaba marpyrshah ïa ka ïing u syiem: bad u syiem u la shong halor ka khet jong u ha ka ïingsyiem, marpyrshah ka jingkhang jong kata ka ïing. 2Bad ka la long kumta, haba u syiem u la ïohi ïa ka Esther syiem ba ka ïeng ha ka phyllaw, ka la ïoh ïa ka jingsngewbha ha khmat jong u: bad u syiem u la pyni sha ka Esther ïa uta u dieng synshar ksiar uba la don ha ka kti jong u. Kumta, ka Esther ka la wan hajan, bad ka la ktah na khmut uta u dieng synshar. 3#Mrk. 6:23.Ynda kumta, u syiem u la ong ha ka, “Pha kwah aïu, ko Esther syiem? Bad kaei ka long ka jingkyrpad jong pha? Yn ai ïa ka ha pha wat haduh kaba shiteng ka hima.” 4Bad ka Esther ka la ong, “Lada u syiem u ibit, ai ba u syiem bad u Haman kin ïawan ha kane ka sngi sha ka jingkhawai kaba nga la khreh ïa u.” 5Ynda kumta, u syiem u la ong, “To pynwan kloi ïa u Haman, ba yn dup leh kumba ka Esther ka la ong.” Kumta, u syiem bad u Haman ki la ïawan sha ka jingkhawai kaba ka Esther ka la lah khreh. 6Te u syiem u la ong ha ka Esther ha ka jingkhawai Waiñ, “Kaei ka long ka jingpan jong pha? bad yn ai ïa ka ha pha; bad kaei ka long ka jingkyrpad jong pha? wat haduh kaba shiteng ka hima yn pyndep ïa ka.” 7Ynda kumta, ka Esther ka la ïathuh, bad ka la ong, “Ka jingpan jong nga bad ka jingkyrpad jong nga ka long: 8lada nga la shem ïa ka jingsngewbha ha khmat u syiem, bad lada u syiem u sngewbha ban ai ïa ka jingpan jong nga, bad ban pyndep ïa ka jingkyrpad jong nga, ai ba u syiem bad u Haman kin ïawan sha ka jingkhawai kaba ngan sa khreh ïa ki, bad ngan leh lashai kumba u syiem u la ong.”
Ka dieng phasi ïa u Mordekai
9Ynda kumta, u Haman u la leit noh ha kata ka sngi da kaba kmen bad da ka dohnud kaba sngewbha: hynrei, haba u Haman u la ïohi ïa u Mordekai ha ka khyrdop u syiem, ba um shym ïeng joit lymne kynriah burom ïa u, la pyndap ïa u da ka jingbitar ïa u Mordekai. 10Pynban, u Haman u la shu kun ha lade, bad u la leit sha la ïing; bad u la phah khot ïa ki lok jong u bad ïa ka Seres ka tnga jong u. 11Bad u Haman u la ïathuh ha ki ïa ka burom ka spah jong u, bad ïa ka jingbun ki khun jong u, bad ïa kita baroh ha kiba u syiem u la kyntiew ïa u, bad kumno u la lah kyntiew burom ïa u halor ki rangbah bad ki shakri u syiem. 12U Haman u la ong nalor kata, “Shisha keiñ, ka Esther syiem kam shym la shah ïano ïano ban wan shapoh ryngkat bad u syiem sha ka jingkhawai kaba ka la lah khreh, hynrei, tang ïa nga hi, bad lashai ruh ka la khot sngewbha ïa nga ryngkat bad u syiem. 13Pynban, kane baroh kam pynmyntoi ei ei ruh em ïa nga, katba nga dang ïohi ïa u Mordekai uta u Jiw ba u da shong ha ka khyrdop u syiem.” 14Ynda kumta, ka la ong ka Seres ka tnga jong u bad ki lok jong u baroh ha u, “Ai ba yn thaw ïa ka dieng phasi kaba sanphew pruh ka jingjrong, bad ha kaba mynstep to kren ma me ha u syiem ba yn phasi ïa u Mordekai ha kata; ynda kumta, to leit shapoh, da kaba kmen ryngkat bad u syiem sha kata ka jingkhawai.” Bad kane ka la pynsngewbha ïa u Haman; bad u la phah thaw ïa ka dieng phasi.
The Bible Society of India