ESTHER 4
4
Ka Esther ka kular ban ïasaid na ka bynta la ki briew
1Te haba u Mordekai u la tip ïa kata baroh ba la leh, u Mordekai u la kad ïa la ki jaiñ, bad u la phong ïa ka jaiñ khain bad ka dpei, bad u la mih noh shapdeng kata ka nongbah, bad u la lynñiar da ka jinglynñiar kaba jam bad kaba kthang: 2bad u la wan wad ha khmat ka khyrdop u syiem: namar ym ju don uba kup jaiñ khain uba lah ban rung hapoh ka khyrdop u syiem. 3Bad ha kawei pa kawei ka shnat, sha kaba ka hukum u syiem bad ka jingrai jong u ki la poi, ka la don ka jingsngewsih bakhraw hapdeng ki Jiw, bad ka jingshah jingit, bad ka jingïam, bad ka jinglynñiar; bad bun ki la thiah ha ka jaiñ khain bad ka dpei.
4Bad ki 'thei samla jong ka Esther bad ki ïunukh jong ka, ki la wan ïathuh ïa kata ha ka; bad ka syiem ka la khuslai shikatdei eh: te ka la phah ïa ki jaiñ ban pynkup ïa u Mordekai, bad ban law noh ïa ka jaiñ khain jong u na u: hynrei, u, um shim ïa ki: 5Ynda kumta, ka Esther ka la khot ïa u Hathak, uwei na ki ïunukh u syiem, ïa uba u la thung ban shakri ïa ka, bad ka la hukum ïa u ban leit sha u Mordekai, ban tip kaei kane, bad balei ka la long. 6Kumta, u Hathak u la leit sha u Mordekai sha kata ka lad bah ka shnong, kaba la don ha khmat ka khyrdop u syiem. 7Bad u Mordekai u la ïathuh ha u shaphang kata baroh kaba la lah jia ha u, bad ïa ka jingkheiñ thik jong kita ki sbai kiba u Haman u la kular ban siew sha ki jingkynshew u syiem na ka bynta ki Jiw, ban pynjot ïa ki. 8Bad u la ai ruh ha u ïa ka nokol#4:8 ka nokol: Kane ka mut ka kopi. ka jingthoh jong kata ka hukum ïa kaba la pynbna ha Shushan ban pynjot noh ïa ki, ban pyni ïa ka ha ka Esther, bad ban pyntip ïa ka ha ka; bad ban hukum ïa ka ba kan leit shapoh sha u syiem, ban duwai ha u, bad ban kyrpad ha khmat jong u, na ka bynta ki briew jong ka. 9Bad u Hathak u la wan bad u la ïathuh ha ka Esther ïa ki ktien jong u Mordekai. 10Ynda kumta, ka Esther ka la kren ha u Hathak, bad ka la ai ktien ha u sha u Mordekai ka da ong, 11“Ki shakri baroh ki jong u syiem, bad ki briew ki shnat ki jong u syiem, ki tip, ba mano mano baroh, u briew lane ka briew, u ban leit sha u syiem sha ka phyllaw ba kham hapoh, ïa uba ym shym la khot, don tang kawei ka aiñ ïa u, ba yn pynïap ïa u, hynrei, tang uta uba u syiem un pyni ïa uta u dieng synshar ksiar sha u, ba un im: hynrei, ym shym la khot ïa nga ban leit sha u syiem ha kine laiphew sngi.” 12Bad ki la ïathuh ha u Mordekai ïa ka ktien ka Esther. 13Ynda kumta, u Mordekai u la hukum ïa ki ban pynphai ktien ha ka Esther, “To wat pyrkhat ha lade ba pha phan kham lait ha ka ïing u syiem ban ïa ki Jiw baroh. 14Namar lada pha phan sngap jar noh ha kane ka por, te ka jingïarap bad ka jingpyllait kan mih ïa ki Jiw na kawei pat ka jaka, hynrei, pha bad ka ïing u kpa jong pha phin jot noh: bad ei ba tip lehse pha la wan sha kata ka hima khnang na ka bynta kaba kum kane ka por?” 15Ynda kumta, ka Esther ka la hukum ïa ki ban pynphai ktien ha u Mordekai, 16“Khie leit, ïalum lang ïa ki Jiw baroh kiba don ha Shushan, bad to ïashah jingit na ka bynta jong nga, bad wat bam lymne dih, lai sngi, mynmiet lane mynsngi: nga ruh bad ki 'thei samla jong nga ngin ïashah jingit kumjuh; bad kumta, ngan leit shapoh sha u syiem, ka bymlong katba kum ka aiñ: bad lada ngan ïap, ai ngan ïap.” 17Kumta, u Mordekai u la leit noh, bad u la leh katba kum kata baroh katba ka Esther ka la lah hukum ïa u.
The Bible Society of India