ESTHER 3
3
Ka buit u Haman ban pynjot ïa ki Jiw
1Hadien kine kiei kiei ruh, u Ahasueros syiem u la kyntiew burom ïa u Haman u khun u Hammedatha u nong Agag, bad u la kyntiew ïa u, bad u la buh ïa ka jingshong jong u halor ki rangbah baroh kiba la don lem bad u. 2Te ki shakri baroh ki jong u syiem, kiba la don ha ka khyrdop u syiem, ki la dem ngon, bad ki la ai burom ïa u Haman: naba u syiem u la hukum kumta shaphang jong u. Hynrei, u Mordekai um shym dem, lymne lehburom ïa u. 3Ynda kumta, kita ki shakri ki jong u syiem, kiba la don ha ka khyrdop u syiem, ki la ong ha u Mordekai, “Balei me ryngkang ïa ka hukum u syiem?” 4Te haba ki la kren ha la ka sngi ha u, bad um shym shahshkor ha ki, ki la ïathuh ha u Haman, ban khmih la ki jingleh jong u Mordekai kin ïeng ne em: namar u la lah ïathuh ha ki ba u la long u Jiw. 5Te haba u Haman u la ïohi ba u Mordekai um shym dem, lymne lehburom ïa u, ynda kumta, u Haman u la dap da ka jingbitar. 6Hynrei, u la ñiewbeiñ ban ktah kti tang ha u Mordekai hi; namar ki la lah ïathuh ha u shaphang ki briew ki jong u Mordekai: namar kata, u Haman u la thew ban pynjot ïa ki Jiw baroh, ki briew ki jong u Mordekai keiñ kiba la don kylleng ka hima u Ahasueros baroh kawei.
7Ha u bnai u banyngkong, uba long u 'nai Nisan, ha ka bakhat-ar snem ka jong u Ahasueros syiem, ki la noh Pur, kata ka long ka jingkhalai nusib, ha khmat u Haman man la ka sngi, bad man la u bnai, haduh u bnai u bakhat-ar, uba long u 'nai Adar. 8Te u Haman u la ong ha u Ahasueros syiem, “Don kawei ka jaid bynriew ba saphred bad ba phriang hapdeng ki jaid bynriew ha ki shnat baroh jong ka hima jong me; bad ki aiñ jong ki, ki pher na ki jong ki briew baroh; lymne kim sumar ïa ki aiñ u syiem: namar kata, kam long ka jingmyntoi ïa u syiem ban shah ïa ki. 9Lada u syiem u ibit, ai ba yn thoh ba yn pynjot noh ïa ki; bad ngan siew ma nga shiphew hajar ki talent rupa ha ki kti kita kiba sumar ïa ka kam u syiem, ban wallam ïa ka ha ki jingkynshew u syiem.” 10Te u syiem u la law noh ïa la ka sa'ti na la ka kti, bad u la ai ïa ka ha u Haman u khun u Hammedatha u nong Agag, u nongshun jong ki Jiw. 11Bad u syiem u la ong ha u Haman, “Ïa kata ka rupa la ai ha me, bad ïa kita ki briew ruh, ban leh ïa ki katba me ibit.”
12Ynda kumta, la khot ïa ki nongthoh jong u syiem ha u bnai u banyngkong, ha ka bakhatlai tarik jong u, bad hangta la thoh katba kum kata baroh kaba u Haman u la hukum sha ki lyngskor ki jong u syiem, bad sha ki nongsynshar kiba la long halor kawei pa kawei ka shnat, bad sha ki rangbah jong kawei pa kawei ka kynja bynriew; sha kawei pa kawei ka shnat katba kum ka jingthoh jong ka, bad sha kawei pa kawei ka kynja bynriew katba kum ka ktien jong ka; ha ka kyrteng u Ahasueros syiem la thoh ïa ka, bad la shon ïa ka, da ka sa'ti ka jong u syiem. 13Bad la phah ïa ki shithi da ki nongphet-dak sha ki shnat ki jong u syiem baroh, ban pynjot, ban pynïap, bad ban pynduh noh, ïa ki Jiw baroh, bad samla bad tymmen, bad khynnah bad kynthei, ha kawei ka sngi, ha ka bakhatlai tarik u bnai u bakhat-ar keiñ, uba long u 'nai Adar, bad ban lute ïa ka spah jong ki. 14Ïa ka nokol#3:14 ka nokol: Kane ka mut ka kopi. jong kata ka jingthoh, ba ka dei ban pyntip ïa kata ka hukum ha ka shnat baroh, la pynbna sha ki kynja bynriew baroh, ba ki dei ban long kiba la khreh hamar kata ka sngi. 15Ki nongphet-dak ki la leit noh kyrkieh da ka hukum u syiem, bad ïa kata ka hukum la pynbna ha Shushan ka ïingsyiem: bad u syiem bad u Haman ki la ïashong dih kyiad: hynrei, ïa ka nongbah Shushan la pynlyngngoh.
The Bible Society of India