ESTHER 2
2
La jied ïa ka Esther ban long ka tnga u syiem
1Hadien kine kiei kiei ruh, haba la jem ka jingbitar u syiem, u la kynmaw ïa ka Phasti, bad ïa kata kaba ka la leh, bad ïa kaba la rai pyrshah ïa ka. 2Ynda kumta, ki shakri syiem kiba ju shakri ïa u ki la ong, “Ai ba yn wad ïa ki theisotti babhabriew kiba dang khynraw ïa u syiem: 3bad ai ba u syiem un thung ïa ki nongkam ha ki shnat baroh jong ka hima jong u, ba kin ïalum lang ïa ki theisotti babhabriew kiba dang khynraw baroh sha Shushan ka ïingsyiem, sha ka ïing ki kynthei, hapoh ka jingsumar u Hegai u ïunukh u syiem, u nongsumar jong ki kynthei; bad ai ha ki, ïa kiei kiei ban pynkhuid ïa ki: 4bad ai ba kata ka 'thei samla kaba pynsngewbha ïa u syiem kan long ka syiem ha ka jaka ka Phasti.” Te kata ka la pynsngewbha ïa u syiem; bad u la leh kumta.
5La don uwei u Jiw ha Shushan ka ïingsyiem uba kyrteng “u Mordekai”, u khun u Jair, u khun u Shimei, u khun u Kish, u nong Benjamin; 6#2 Syiem. 24:10-16; 2 Khrn. 36:10.ïa uba la lam noh na Jerusalem ryngkat bad kita kiba la ring mraw, ïa kiba la lam noh lem bad u Jekoniah u syiem ka Judah, ïa uba u Nebukhadnessar u syiem ka Babilon u la lam noh. 7Bad u la ri ïa ka Hadassa, kaba long, ka Esther, ka khun u kñi jong u: namar kam shym don lymne u kpa lymne ka kmie, bad kata ka 'thei samla ka la long kaba ibhabriew bad kaba itynnad; bad mynba ki kmie ki kpa jong ka ki la ïap noh, u Mordekai u la shimti ïa ka kum ka khun jong u hi. 8Kumta, haba la ïohsngew ïa ka hukum u syiem bad ïa ka jingrai jong u, bad haba ki la lum lang shibun ki theisotti sha ka Shushan ka ïingsyiem, hapoh ka jingsumar u Hegai, te la shim ïa ka Esther hapoh ka ïing u syiem, ha ka jingsumar jong u Hegai, u nongsumar jong ki kynthei. 9Te kata ka 'thei samla ka la pynsngewbha ïa u, bad ka la ïoh jingleh ieit na u; bad u la ai shisyndon ha ka, ïa kita kiei kiei ban pynkhuid ïa ka, lem bad ki bynta jong ka, bad ïa ki hynñiew ngut ki 'thei samla, kiba ibit ban ai ha ka, na ka ïing u syiem: bad u la pynkynriah noh ïa ka bad ïa ki 'thei samla jong ka sha ka jaka ba kham bha ha ka ïing ki kynthei. 10Ka Esther kam shym la ïathuh ïa ki briew jong ka lymne ïa ki kur jong ka: namar u Mordekai u la hukum ïa ka ba kan ym ïathuh ïa kata. 11Te u Mordekai u la ïaid kai ha la ka sngi ha khmat ka phyllaw ka ïing ki kynthei, ban tip ka Esther ka la leh kumno, bad kumno kan jia ïa ka.
12Te haba ka por jong kawei pa kawei ka 'thei samla ka la poi ban leit shapoh sha u Ahasueros syiem, ynda la lah leh ïa ka, khat-ar bnai, katba kum ka rukom ïa ki kynthei, (naba kumta ïa ki sngi ka jingpynkhuid jong ki la pyndep, kata ka long, hynriew bnai, da ka umphniang mirr, bad hynriew bnai da ki jingiwbih, bad da kita kiei kiei ruh ïa ka jingpynkhuid ïa ki kynthei,) 13ynda kumta, ha kane ka rukom ka 'thei samla ka la wan sha u syiem, ïa kaei kaei ruh kaba ka kwah la ai ha ka ban leit ryngkat bad ka na ka ïing ki kynthei sha ka ïing u syiem. 14Ha kaba la janmiet ka la leit, bad ha kaba mynstep ka la phai pat shapoh ka ïing ka ba-ar jong ki kynthei, hapoh ka jingsumar u Sasgas u ïunukh jong u syiem, uba la sumar ïa kita ki tnga kliar: kam shym wan shuh sha u syiem, lymda u syiem u sngewbha ïa ka, bad ba la khot ïa ka da ka kyrteng.
15Te haba ka por ka Esther, ka khun u Abihail u kñi jong u Mordekai, uba la shim ïa ka kum ka khun jong u, ka la poi ban leit hapoh sha u syiem, kam shym pan ei ei, hynrei, tang kaba u Hegai u ïunukh jong u syiem, u nongsumar jong ki kynthei, u la buh. Bad ka Esther ka la ïoh jingsngewbha ha khmat kita baroh kiba la khmih ïa ka. 16Kumta, la shim ïa ka Esther sha u Ahasueros syiem hapoh ka ïingsyiem jong u ha u bnai u bashiphew, uba long u 'nai Tebeth, ha ka snem ka bahynñiew ka jingsynshar jong u. 17Bad u syiem u la ieit ïa ka Esther nalor kita ki kynthei baroh, bad ka la ïoh burom bad ka jingsngewbha ha khmat jong u kham tam ban ïa kita ki theisotti baroh; katba u la pynphong ïa ka pansngiat syiem halor ka khlieh jong ka, bad u la pynlong syiem ïa ka ha jaka ka Phasti. 18Ynda kumta, u syiem u la thaw ka jingkhawai kaba khraw ïa ki rangbah jong u baroh bad ïa ki shakri jong u, ka jingkhawai jong ka Esther keiñ; bad u la pynlong ka jingpyllait ïa kita ki shnat, bad u la ai ki jingai sngewbha katba kum ka jingai kylluid u syiem.
U Mordekai u pynpaw shaphang ka jingshetkylla ïa u syiem
19Te haba la ïalum lang ïa ki theisotti ha ka ba-ar sien, ha kata, u Mordekai u la shong ha ka khyrdop u syiem. 20Ka Esther kam pat shym la ïathuh ïa ki kur jong ka lymne ïa ki briew jong ka, kumba u Mordekai u la lah hukum ïa ka: namar ka Esther ka la leh ïa ka hukum u Mordekai, kumjuh kumba mynba la ri ïa ka bad u. 21Ha kita ki sngi, katba u Mordekai u la shong ha ka khyrdop u syiem, ar ngut na ki ïunukh jong u syiem: u Bigthan bad u Teres, na kita kiba la ju ap ïa ka jingkhang, ki la bitar lep, bad ki la thew ban ktah kti ïa u Ahasueros syiem. 22Bad ïa kata, u la tip u Mordekai, uba la pynpaw ïa ka ha ka Esther syiem; bad ka Esther ka la ïathuh ha u syiem shaphang kata ha ka kyrteng u Mordekai. 23Te haba la tohkit ïa kata, bad ba la shem ba ka la long kumta, la phasi ïa ki baroh ar ngut ha u dieng: bad la thoh ïa kata ha Ka Kitab Ki Khronikl ha khmat u syiem.
The Bible Society of India