DEUTERONOMI 9

U Blei un pynjot ïa ki jaid bynriew sha shiliang ka Jordan

1“To sngew, A Israel: Ha kane ka sngi men sa leit sha shiliang ka Jordan, ban ïoh leit hapoh ïa ka ban ïoh ïa ki jaid bynriew kiba kham khraw, bad kiba kham don bor ban ïa me, ïa ki nongbah bakhraw, bad ba la ker haduh ki bneng, 2ki briew bakhraw bad bajrong rynïeng, ki khun ki Anak keiñ, ïa kiba me tip, bad shaphang jong ki me la bna, da kaba ong, ‘Uei ba lah ban ïeng ha khmat ki khun u Anak?’ 3#Heb. 12:29.To sngewthuh namar kata ha kane ka sngi, ba U Trai uba U Blei jong me u long uba ïaid sha shiliang ha shuwa jong me kum ka ding babam duh; un pynjot noh ïa ki, bad un pynkyllon ruh ïa ki ha khmat jong me; kumta keiñ, men beh noh ïa ki, bad men pynjot noh shen ïa ki, kumba U Trai u la ong ha me.

4“Wat ong ha la ka dohnud, hadien ba U Trai uba U Blei jong me u la beh noh ïa ki na khmat jong me, da kaba ong, ‘Namar ka hok jong nga U Trai u la wallam ïa nga ïa ka ban ïoh ïa kane ka ri:’ hynrei, namar ka jingsniew jong kine ki jaid bynriew, U Trai u beh noh ïa ki na khmat jong me. 5Ym namar ka hok jong me, lane namar ka jinglong beit ka dohnud jong me, ba me leit ban ïoh ïa ka ri jong ki: hynrei, namar ka jingsniew keiñ jong kine ki jaid bynriew, U Trai uba U Blei jong me u beh noh ïa ki na khmat jong me, bad khnang ba un ïoh pyndep ïa kata ka ktien ïa kaba U Trai u la smai ha ki kpa jong me, ha u Abraham, u Isaak, bad u Jakob.

6“To sngewthuh, namar kata, ba U Trai uba U Blei jong me um aiti ha me ïa kane ka ri babha ban ïoh ïa ka namar ka hok jong me; namar me long u paidlang ba-eh ryndang.

Ka jingïaleh pyrshah ki Israel ha Horeb

(Eks. 31:18—32:35)

7“To da kynmaw, wat klet keiñ, kumno ba me la pynbitar ïa U Trai uba U Blei jong me ha kata ka ri khlaw: naduh kata ka sngi ba phi la wan mih noh na ka ri Ijipt, haduh ba phi la ïawan poi sha kane ka jaka, phi la ïaleh kiat pyrshah ïa U Trai. 8#Eks. 32:7-20.Ha Horeb ruh, phi la ïa-pynbitar ïa U Trai, kumta, U Trai u la bitar lep ïa phi ïa ka ban pynjot noh ïa phi. 9#Eks. 24:18.Mynba nga la leit kiew sha uta u lum ban pdiang ïa kita ki maw lyngkniap, ki maw lyngkniap kata ka jutang keiñ ïa kaba U Trai u la thaw bad phi, te nga la ïaisah ha uta u lum, sawphew sngi bad sawphew miet; ngam shym la bam kpu lymne dih um. 10U Trai te u la ai ha nga ïa kita ki ar tylli ki maw lyngkniap ba la thoh da ka shynriah'ti U Blei; bad ha ki, la thoh katba kum kita ki ktien baroh, ïa kiba U Trai u la kren ha phi ha uta u lum napdeng kata ka ding ha ka sngi kata ka jingïaseng. 11Ka la jia te haba la kut kita ki sawphew sngi bad sawphew miet, ba U Trai u la aiti ha nga ïa kita ki ar tylli ki maw lyngkniap, ki maw lyngkniap kata ka jutang keiñ. 12Bad U Trai u la kren ha nga, ‘To ïeng, to hiar noh kloi nangne; namar une u paidbah jong me, ïa uba me la wallam noh na ka ri Ijipt, u la pynsniew ïa lade; ki la ïaphai noh kloi na kata ka lynti ïa kaba nga la hukum ïa ki; ki la ïathaw ha lade ïa ka durblei ba la saiñ.’

13“Nalor kata, U Trai u la kren ha nga, u da ong, ‘Nga la ïohi ïa une u paidbah, bad ha khmih, u long u paidbah ba-eh ryndang: 14to shah ïa nga, ba ngan ïoh pynjot noh ïa ki, bad pyndam noh ïa ka kyrteng jong ki napoh ki bneng; te ngan pynlong ïa me ka jaid bynriew kaba kham don bor, bad kaba kham khraw ruh ban ïa ki.’ 15Kumta, nga la phai, bad nga la wan hiar na uta u lum, bad uta u lum u la dang ing da ka ding: bad kita ki ar tylli ki maw lyngkniap kata ka jutang ki la don ha ki kti jong nga baroh ar. 16Nga la khmih ruh, te ha khmih, phi la lah leh pop pyrshah ïa U Trai uba U Blei jong phi; phi la lah thaw ha phi ka dur khun masi ba la saiñ: phi la phai noh kloi na kata ka lynti ïa kaba U Trai u la lah hukum ïa phi. 17Nga la shim te ïa kita ki ar tylli ki maw lyngkniap, bad nga la bred noh ïa ki na ki kti jong nga baroh ar, bad nga la pynpait ruh ïa ki ha khmat jong phi. 18Te nga la dem ngon ha khmat U Trai, kum ha ka banyngkong, sawphew sngi bad sawphew miet; ngam shym la bam kpu, lymne dih um; namar ki pop jong phi baroh ïa kiba phi la lah leh, da kaba leh bymman ha khmat U Trai, ïa ka ban pynbitar ïa u. 19#Heb. 12:21.Namar nga la sheptieng ïa ka jingbitar, bad ïa ka jingsngewsih sat, da kiba U Trai u la bitar pyrshah ïa phi ïa ka ban pynjot noh ïa phi. Hynrei, U Trai u la shahshkor ïa nga ha kata ka por ruh. 20Ïa u Aaron ruh, U Trai u la bitar eh ïa ka ban pynjot noh ïa u: te nga la duwai na ka bynta u Aaron ruh ha kata kajuh ka por. 21Ïa ka pop jong phi ruh, ïa kata ka dur khun masi keiñ ïa kaba phi la lah ïathaw, nga la shim, bad nga la thang ha ding, bad nga la shoh ïa ka, bad nga la pynlwet jin, tad ynda ka la long ni kat u shyiap: bad nga la ber de ïa uta u shyiap ksiar ha kata ka wah duid kaba hiar na uta u lum.

22 # Jkñ. 11:3; Eks. 17:7; Jkñ. 11:34. “Bad ha Taberah, bad ha Massah, bad ha Kibroth-hattaabah, phi la ïakynshuiñ ïa U Trai ïa ka ban bitar. 23#Jkñ. 13:17; Deu. 1:21; Jkñ. 13:31; Deu. 1:26; Heb. 3:16.Kumjuh ruh, mynba U Trai u la phah ïa phi na Kadesh-barnea, u da ong, ‘To leit kiew ban ïoh ïa kata ka ri ïa kaba nga la ai ha phi;’ te phi la ïaleh kiat pyrshah ïa ka hukum U Trai uba U Blei jong phi, bad phim shym la ngeit ïa u, lymne shahshkor ïa ka ktien jong u. 24Phi la long kiba ïaleh kiat pyrshah ïa U Trai naduh kata ka sngi ba nga la ithuh ïa phi.

25 # Eks. 32:11-14. “Kumta keiñ, nga la dem ngon ha khmat U Trai, sawphew sngi bad sawphew miet, kumba nga la dem ngon mynshuwa; namar ba U Trai u la lah ong ba un pynjot noh ïa phi. 26Nga la duwai te ha U Trai, nga la ong, ‘A Trai uba U Blei, wat pynjot noh ïa la u paidlang, bad ïa la ka bynta pateng, ïa kiba me la siewspah da ka bor khraw jong me, ïa kiba me la wallam noh na ka ri Ijipt da ka kti badonbor. 27To kynmaw ïa ki shakri jong me, ïa u Abraham, ïa u Isaak, bad ïa u Jakob; wat khmih ïa ka jingleh kiat une u paidlang, lymne ïa ka jingleh bymman jong ki, lymne ïa ka pop jong ki: 28ïoh ba kata ka ri na kaba me la wallam noh ïa ngi kan ong, “Namar ba U Trai um lah keiñ ban wallam ïa ki sha kata ka ri ïa kaba u la lah kular ha ki, bad namar ba u la isih ïa ka ruh, u la wallam noh ïa ki, ïa ka ban pynïap ïa ki ha kata ka ri khlaw.” 29Pynban, ki long u paidlang jong me, bad ka bynta pateng jong me, ïa kiba me la wallam noh da ka borbah jong me, bad da la ka ksang'ti ba la kner.’

Currently Selected:

DEUTERONOMI 9: KHB

Highlight

Copy

Compare