DEUTERONOMI 10

Ar tylli kiwei pat ki maw lyngkniap

(Eks. 34:1-10)

1“Ha kata ka por, U Trai u la ong ha nga, ‘To shtah ar tylli ki maw lyngkniap kum kita ki banyngkong; ynda kumta, to wan kiew sha nga ha uta u lum, bad to thaw ha me ïa ka synduk dieng. 2Bad ngan thoh ha kita ki maw lyngkniap ïa kita ki ktien, kiba la don ha kita ki maw lyngkniap ki banyngkong ïa kiba me la pynpait, bad men buh ïa ki ha kata ka synduk.’ 3Kumta te, nga la thaw ïa ka synduk da u dieng Shittim, bad nga la shtah ruh ar tylli ki maw lyngkniap kum ki banyngkong, bad nga la leit kiew sha uta u lum, bad kita ki ar tylli ki maw lyngkniap ha ka kti jong nga. 4Bad u la thoh ha kita ki maw lyngkniap, katba kum kata ka jingthoh ka banyngkong, ïa ki shiphew hukum keiñ, ïa kiba U Trai u la kren ha phi ha uta u lum, napdeng kata ka ding, ha ka sngi kata ka jingïaseng; bad U Trai u la ai ïa ki ha nga. 5Ynda kumta, nga la phai, bad nga la wan hiar na uta u lum, bad nga la buh ïa kita ki maw lyngkniap ha kata ka synduk ïa kaba nga la thaw; hangta ruh ki don, kumba U Trai u la hukum ïa nga.”

6 # Jkñ. 20:28; 33:38. (Te ki khun Israel ki la ïaleit noh na Beeroth jong ki khun u Jaakan sha Mosera: hangta, u Aaron u la ïap, bad hangta ruh, la tep ïa u; bad u Eleasar u khun jong u, u la kam ha ka kam lyngdoh ha ka jaka jong u. 7Nangta keiñ, ki la leit jingleit sha Gudgodah; bad na Gudgodah sha Jotbathah, ka ri ki wah um. 8#Jkñ. 3:5-8.Ha kata ka por, U Trai u la pynkyrpang ïa ka jaid Lebi, ïa ka ban bah ïa ka synduk ka jutang U Trai, ïa ka ban ïeng ha khmat U Trai, ïa ka ban shakri ïa u, bad ïa ka ban kyrkhu ha ka kyrteng jong u, haduh kane ka sngi. 9Namar kata, u Lebi um don ka bynta, lane ka jingïoh pateng lem bad ki para jong u; U Trai u long keiñ ka bynta pateng jong u, kat kumba U Trai uba U Blei jong me u la kular ha u.)

10 # Eks. 34:28. “Bad nga la sah ha uta u lum, sawphew sngi bad sawphew miet, kumba ha ki sngi ki banyngkong: bad U Trai u la shahshkor ïa nga ha kata ka por ruh, bad U Trai um shym la sngewbha ban pynjot noh ïa me. 11Bad U Trai u la ong ha nga, ‘To ïeng, to nang ïaid ha shuwa une u paidlang; ba kin ïoh ïaleit hapoh bad kin ïoh ïa kata ka ri, ïa kaba nga la smai ha ki kpa jong ki ban ai ha ki.’

U Blei u kwah aïu na me

12“Mynta te, ko Israel, U Trai uba U Blei jong me u kwah aïu na me, tang ba men sheptieng ïa U Trai uba U Blei jong me, bad men ïaid ha ki lynti jong u baroh, bad men ieit ïa u, bad men shakri ïa U Trai uba U Blei jong me da la ka dohnud baroh, bad da la ka mynsiem baroh, 13bad men sumar ïa ki hukum jong U Trai, bad ïa ki aiñ jong u, ïa kiba nga hukum ïa me ha kane ka sngi na ka bynta ka jingbha jong me? 14Ha khmih, ka bneng bad ka bneng jong ki bneng, ki long ki jong U Trai uba U Blei jong me, ka khyndew ruh, bad baroh katba don ha ka. 15Tang ba U Trai u la don ka jingsngewbha ha ki kpa jong me ban ieit ïa ki, bad u la jied ïa u symbai jong ki hadien jong ki, ïa phi keiñ nalor ki kynja bynriew baroh, kumba long ha kane ka sngi. 16To phin otsher, namar kata, ïa ka jingbym-otsher ka dohnud jong phi, bad wat long shuh kiba eh ryndang. 17#Ki Kam. 10:34; Rom. 2:11; Gal. 2:6; Eph. 6:9; Jpw. 17:14; 19:16.Namar U Trai uba U Blei jong phi, u long U Blei jong ki blei, bad U Trai jong ki trai, U Blei u bakhraw, u badonbor, bad ba-itieng, u bymñiew shiliang khmat, lymne um bamsap. 18U bishar hok ïa ki khunswet, bad ïa ki riewkynthei, bad u ieit ïa u nongwei, da kaba u ai ha u ka jingbam, bad ki jaiñkup jaiñsem. 19#Eks. 22:21; 23:9; Leb. 19:34.To ieit ma phi, namar kata, ïa ki nongwei: namar phi keiñ, phi la ju long ki nongwei ha ka ri Ijipt. 20Men sheptieng ïa U Trai uba U Blei jong me; ïa u hi men shakri; bad ha u men snoh, bad ha ka kyrteng jong u ruh men smai. 21U ruh u long ka jingïaroh jong me, bad u long U Blei jong me, uba na ka bynta jong me u la leh ïa kine kiei kiei kiba khraw bad ba-itieng, ïa kiba me la ïohi da la ki khmat. 22#Jen. 46:27; 15:5; 22:17; Ki Kam. 7:14.Ki kpa jong me ki la ïaleit hiar sha ka ri Ijipt bad tang hynñiewphew ki mynsiem; hynrei, mynta, U Trai uba U Blei jong me u la pynlong ïa me u paidbah kat ki khlur ki bneng.

Currently Selected:

DEUTERONOMI 10: KHB

Highlight

Copy

Compare