DEUTERONOMI 8

Ka ri babha ïa kaba U Blei un ai

1“Ïa ki hukum baroh ïa kiba nga hukum ïa me ha kane ka sngi, to sumar phi ban leh, ba phin ïoh im, bad phin ïoh ïaroi, bad ba phin ïoh leit hapoh ruh ban ïoh ïa kata ka ri ïa kaba U Trai u la smai ha ki kpa jong phi. 2To men kynmaw ruh ïa kata ka lynti baroh ïa kaba U Trai uba U Blei jong me u la ïalam ïa me ha kine sawphew snem ha kata ka ri khlaw, ïa ka ban pynrit ïa me, bad ïa ka ban tynjuh ïa me, ïa ka ban tip kaei kaba ha ka dohnud jong me, la men sumar ne em ïa ki hukum jong u. 3#Mat. 4:4; Luk. 4:4.U la pynrit te ïa me, bad u la shah ïa me ban sngewthngan, bad u la bsa ïa me da ka manna, ïa kaba mem ju tip, lymne ki kpa jong me kim ju tip; khnang ba un pyntip ïa me ba u briew um im tang da u kpu, hynrei, ba u briew u im da ka ktien baroh kaba mih noh na ka shyntur jong U Trai. 4Ki jaiñkup jaiñsem jong me kim shym la man rim halor jong me, lymne ka sla'jat jong me kam shym la at, ha kine sawphew snem. 5Ka dei ba men pyrkhat ruh ha la ka dohnud, ba kumba u briew u sneng ïa la u khun, kumta keiñ, U Trai uba U Blei jong me u sneng ïa me. 6To men sumar, namar kata, ïa ki hukum U Trai uba U Blei jong me, ïa ka ban ïaid ha ki lynti jong u, bad ban sheptieng ïa u. 7Namar U Trai uba U Blei jong me u wallam ïa me sha ka ri babha, sha ka ri ki wah um, ki pukri bad ki umpohliew, kiba ïamih na ki them, bad na ki lum keiñ; 8ka ri u Kew bad u Kew Barli, bad ki dieng soh Waiñ bad ki dieng soh Dumbur bad ki dieng soh Pong, ka ri ka dieng umphniang Olib, bad ka ngap; 9ka ri keiñ ha kaba men ïoh bam kpu khlem da kyrduh, men ym duna ei ei ruh em ha ka; ka ri ba ki maw jong ka ki long nar, bad na ki lum jong ka me lah ban tih tama. 10Ynda me la bam, bad me la kdang, te men kyrkhu ïa U Trai uba U Blei jong me na ka bynta kata ka ri babha ïa kaba u la ai ha me.

Ka jingmaham ban ym klet ïa U Blei

11 # Hos. 13:5,6. “To sumar ïa lade ba ïoh men klet ïa U Trai uba U Blei jong me, da kaba khlem da sumar ïa ki hukum jong u, bad ïa ki jingbishar jong u, bad ïa ki aiñ jong u, ïa kiba nga hukum ïa me ha kane ka sngi: 12ba ïoh ynda me la lah bam, bad me la kdang, bad me la thaw ki ïing ki babha, bad la shong sah ha ki; 13bad haba ki la ïaroi ki masi jong me, bad ki langbrot jong me, bad ba la man bun ka rupa, bad ka ksiar jong me, bad ba la man bun baroh katba me don; 14te hadien kata ba ka dohnud jong me ka da sngewkhraw, bad men klet te ïa U Trai uba U Blei jong me, uba la wallam noh ïa me na ka ri Ijipt, na kata ka ïing ka jinglongmraw; 15uba la ïalam ïa me lyngba kata ka ri khlaw bakhraw bad ba-itieng, ha kaba la don ki bseiñ ba-meh ding, bad ki 'ñianglartham, bad kaba rang ryngkhiang ha kaba ym don um: uba la pynmih te ka um ïa me na u mawshamok; 16uba la bsa ïa me ha kata ka ri khlaw da ka manna, ïa kaba ki kpa jong me kim ju tip; ba un ïoh pynrit ïa me, bad ba un ïoh tynjuh ïa me, khnang keiñ bad leh bha ïa me ha ka bakut jong me; 17bad ba me ong ha la ka dohnud, ‘Ka bor jong nga hi, bad ka bor ka kti jong nga, ka la pynïoh ïa nga ïa kane ka spah.’ 18Hynrei, to men kynmaw ïa U Trai uba U Blei jong me, namar long ma u keiñ, uba ai bor ïa me ban ïoh ka spah; ba un ïoh pynskhem ïa la ka jutang ïa kaba u la smai ha ki kpa jong me, kumba ha kane ka sngi. 19Te kan long, lada men klet jynduh ïa U Trai uba U Blei jong me, bad men bud hadien kiwei pat ki blei, bad shakri ïa ki, bad mane ruh ïa ki, nga phla pyrshah ïa phi ha kane ka sngi ba phin ïajot noh da shisha. 20Kumba kita ki jaid bynriew ïa kiba U Trai u pynjot noh ha shuwa jong phi, kumta keiñ, phi ruh phin ïajot noh; namar ba phim shym kohnguh ïa ka ktien U Trai uba U Blei jong phi.

Currently Selected:

DEUTERONOMI 8: KHB

Highlight

Copy

Compare