DEUTERONOMI 6

Ka hukum kaba khraw

1“Kine te ki long kita ki hukum, kita ki aiñ, bad kita ki jingbishar, ïa kiba U Trai uba U Blei jong phi u la hukum ban hikai ïa phi, khnang ba phin leh ïa ki ha kata ka ri, sha kaba phin sa leit sha shiliang ban ïoh ïa ka: 2Ba men sheptieng ïa U Trai uba U Blei jong me, da kaba sumar ïa ki aiñ jong u baroh, bad ïa ki hukum jong u, ïa kiba nga hukum ïa me, ma me, bad u khun jong me, bad u khun u khun jong me, baroh ki sngi ka rta jong me; bad ba yn ïoh pynslem ruh ïa ki sngi jong me. 3To sngew, namar kata, A Israel, to sumar ruh ïa ka ban leh; ba kan long bha keiñ ïa me, bad ba phin nang roi ruh shibun eh, kumba U Trai, uba U Blei jong ki kpa jong me, u la kular ïa me, ha kata ka ri kaba tuid da ka dud, bad ka ngap.

4 # Mat. 22:37; Mrk. 12:29,30; Luk. 10:27. “To sngew, A Israel: U Trai uba U Blei jong ngi u long uwei U Trai: 5#Mat. 22:37; Mrk. 12:30; Luk. 10:27.te men ieit ïa U Trai uba U Blei jong me da la ka dohnud baroh, bad da la ka mynsiem baroh, bad da la ka bor baroh. 6#Deu. 6:20-25; 11:18-20.Bad to ai ba kine ki ktien, ïa kiba nga hukum ïa me ha kane ka sngi, kin ïalong ha ka dohnud jong me: 7bad men ïaihikai ïa ki ha la ki khun, te men kren shaphang jong ki haba me shong ha la ïing, bad haba me ïaid ha ka lynti, bad haba me thiah ruh, bad haba me khie ruh. 8#Eks. 13:9,16; Deu. 11:18.Bad men teh ïa ki kum ka dak ha ka kti jong me, bad kin long kum ki jingteh shyllangmat hapdeng ki khmat jong me. 9Bad men thoh ïa ki ha ki shawkad jingkhang ka ïing jong me, bad ha ki khyrdop jong me.

Ka jingmaham pyrshah ïa ka jingbymkohnguh

10 # Jen. 12:7; 26:3; 28:13. “Kan jia te, ynda U Trai uba U Blei jong me u la wallam ïa me sha kata ka ri ïa kaba u la smai ha ki kpa jong me, ha u Abraham, ha u Isaak, bad ha u Jakob keiñ, ban ai ha me; ki nongbah bakhraw bad ba-itynnad, ïa kiba mem shym la tei, 11bad ïa ki ïing kiba dap da kiei kiei ruh ki babha baroh, ïa kiba mem shym la pyndap, bad ïa ki pukri ba la tih, ïa kiba mem shym la tih, ïa ki brisoh Waiñ bad ki dieng Olib, ïa kiba mem shym la thung; ynda me la bam, bad me la kdang ruh; 12to da sumar te ba ïoh men klet noh ïa U Trai, uba la wallam noh ïa me na ka ri Ijipt, na kata ka ïing ka jinglongmraw. 13#Mat. 4:10; Luk. 4:8.To men sheptieng ïa U Trai uba U Blei jong me; bad to shakri ïa u, bad da ka kyrteng jong u men smai. 14Phin ym leit hadien kiwei kiwei pat ki blei, na ki blei jong ki briew kiba baroh sawdong ïa phi. 15Naba U Trai uba U Blei jong me u long U Blei u bathut shen hapdeng jong phi; ba ïoh kan meh ka jingbitar U Trai uba U Blei jong me pyrshah ïa me, bad un pynjot noh ïa me na khmat ka khyndew.

16 # Mat. 4:7; Luk. 4:12. “Phin ym tynjuh ïa U Trai uba U Blei jong phi, kumba phi la tynjuh ha Massah. 17To phin sumar biang biang ruh ïa ki hukum U Trai uba U Blei jong phi, bad ïa ki jingphla jong u, bad ïa ki aiñ jong u, ïa kiba u la hukum ïa me. 18To men leh ruh ïa kaba beit, bad ïa ka babha ha khmat U Trai: ba kan long bha ïa me, bad ba men dup leit hapoh, bad ïoh ruh ïa kata ka ri babha ïa kaba U Trai u la smai ha ki kpa jong me; 19da kaba beh noh ïa ki nongshun jong me baroh na khmat jong me, kumba U Trai u la kren.

20“Haba u khun jong me u kylli ïa me lashai lashisngi, u da ong, ‘Ki mut aïu kita ki jingphla, bad kita ki aiñ, bad kita ki jingbishar, ïa kiba U Trai uba, U Blei jong ngi u la hukum ïa phi?’ 21Te men ong ha la u khun, ‘Ngi la long ki mraw u Pharaoh ha ka ri Ijipt; bad U Trai u la ïalam noh ïa ngi na ka ri Ijipt da ka kti badonbor: 22U Trai u la pyni ruh ïa ki dak, bad ïa ki jingphylla, kiba khraw bad ki bajynjar sat, halor ka Ijipt, halor u Pharaoh, bad halor ka ïing jong u baroh, ha khmat jong ngi keiñ: 23bad u la ïalam noh ïa ngi nangta, ba un dup wallam ïa ngi hapoh, ïa ka ban ai ha ngi ïa kane ka ri, ïa kaba u la smai ha ki kpa jong ngi. 24Bad U Trai u la hukum ïa ngi ban rakhe ïa kine ki aiñ baroh, ban sheptieng ïa U Trai uba U Blei jong ngi, na ka bynta ka jingbha ïa ngi ha la ka sngi, khnang ba un ri pynim ïa ngi, kumba ha kane ka sngi. 25Te kan long ka hok ïa ngi, lada ngin rakhe ïa kine ki hukum baroh ha khmat U Trai uba U Blei jong ngi, kumba u la hukum ïa ngi.’

Currently Selected:

DEUTERONOMI 6: KHB

Highlight

Copy

Compare