DEUTERONOMI 32

1“To shahshkor, phi ki bneng,

te ngan kren;

to sngap ruh, ka khyndew,

ïa ki ktien ka shyntur

jong nga:

2Ka jinghikai jong nga

kan hap kum u slap,

ka jingkren jong nga ruh

kan jaw kum ka umjer;

kum u 'lap phñiup phñiup

ha u jingthung balung,

bad kum u 'lap praw

ha u phlang:

3Namar ngan pynbna

ïa ka kyrteng U Trai:

to pynkhraw phi

ïa U Blei jong ngi.

4“U Mawsiang, ka jingleh jong U

ka bajanai;

namar ki lynti jong U baroh

ki long ka jingbishar:

U Blei ka jingshisha

bad khlem ka jingbymhok,

u bahok bad uba beit u long.

5 # Php. 2:15. Ki la pynsniew ïa lade,

ba kim long ki khun

jong u,

kata ka long ka pop

jong ki;

ki long ka pateng bynriew

bamutlop bad bakynriang.

6Kumne mo phi siew kylliang

ïa U Trai,

A u paidlang ba-bieit

bad bymnang?

um long ma U, U kpa jong me

uba la siewspah ïa me?

Um shym la thaw ïa me,

bad la pynneh ïa me?

7To kynmaw ïa kita ki sngi

kiba mynbarim,

to pyrkhat ïa ki snem

la bun ki pateng bynriew:

to kylli ïa la u kpa,

te un pyntip ïa me;

ïa la ki tymmen basan,

te kin ïathuh ha me.

8Mynba U Bahakhlieh Tam Eh

u la pynïabynta

ha ki jaid bynriew

ïa ka bynta pateng jong ki,

mynba u la pynïakhlad

ïa ki khun u Adam,

u la buh ki pud

ïa ki jaid bynriew

katba kum ka jingkheiñ

ki khun Israel.

9Namar ka bynta jong U Trai

long u paidlang jong u;

u Jakob ruh u long

ka pakai jong U.

10“U la shem ïa u

ha ka ri bakynjah,

bad ha ka ri khlaw

kaba jlew bakynsha;

U te U la ïalam baroh sawdong

ïa u,

U la hikai ïa u,

U la sumar ïa u

kum ïa i briew khmat

jong U:

11Kumba ka pukni ka pynkhih

ïa la ka skum,

ka kah halor la ki khun,

ka pyiar la ki thapniang,

ka rah ïa ki,

ka kit ïa ki ruh

halor la ki thapniang:

12kumta U Trai hi keiñ

U la ïalam ïa u,

bad ym don u blei bakhyllah

lem bad u.

13U la pynïaid ïa u

ha ki jaka kiba jrong

jong ka pyrthei,

ba un ïoh bam

ïa ka jingmih jong

ki lyngkha;

bad U la ai ïa u ban kjit

ïa ka ngap na u mawsiang,

bad ïa ka umphniang

na u mawsiang shamok;

14ka makhon ki masi,

bad ka dud ki langbrot,

lem bad ka khleiñ

ki khun langbrot,

bad ki langbrot shynrang

na ki kynja Bashan,

bad ki blang ruh,

lem bad ka babha jong u Kew;

bad ïa ka um basngur

u soh Waiñ me la dih.

15“Hynrei, u Jeshurun

u la man sngaid,

bad u la kynjat:

me la man sngaid,

me la dap, me la khleiñ ruh:

ynda kumta, u la kyntait noh

ïa U Blei uba la thaw ïa u,

bad u la ñiewbeiñ

ïa U Mawsiang ka jingpynim

jong u.

16Ki la kynshuiñ ïa U

da kiwei pat ki blei,

da ki jingijli ki la pynbitar

ïa U.

17 # 1 Kor. 10:20. Ki la kñia ha ki ksuid,

ym ha U Blei keiñ,

ha ki blei ïa kiba

kim ju tip,

ha ki blei thymmai

ba dang mih shen,

ïa kiba ki kpa jong phi

kim shym la sheptieng.

18Ïa U Mawsiang

uba la pynkha ïa me

mem kynmaw shuh,

bad me la klet noh

ïa U Blei ba la pynlong dur

ïa me.

19“Te haba U Trai u la ïohi,

U la isih ïa ki,

namar ba la pynbitar ïa U

da ki khun shynrang jong U

bad da ki khun kynthei jong U.

20U la ong ruh,

‘Ngan buhrieh ïa la ka khmat

na ki,

ngan khmih te

ïa ka bakut jong ki

kan long kumno;

namar ki long

ka pateng bynriew

bamutlop eh,

ki khun ha kiba ym don

ka jingïaineh.

21 # Rom. 10:19; 11:11; 1 Kor. 10:22. Ki la kynshuiñ ïa nga

da kata ka bymlong blei;

ki la pynbitar ïa nga

da ki jingthala jong ki:

nga de ngan pynkynshuiñ

ïa ki

da kita ki bymlong

u paidlang;

ngan pynbitar ïa ki

da ka jaid bynriew ba-bieit.

22Namar la pynmeh ïa ka ding

ha ka jingbitar jong nga,

bad kan pyningkhong

haduh ka trai dujok,

bad kan bam duh

ïa ka khyndew

lem bad ka jingmih jong ka,

bad kan thang ruh

ïa ki nongrim ki lum bah.

23“ ‘Ngan kynton

ïa ki jingpynsniew

halor jong ki;

ngan pynlut noh

ïa la ki khnam ha ki:

24Yn pyning ïa ki da

ka jingthngan,

bad yn bam duh ïa ki

da ka jingshit ba-ing

bad da ka jingpynjot

ba kthang;

ngan phah ruh halor

jong ki

ïa ki bniat ki mrad khlaw,

lem bad ka bih

jong ki bseiñ ka khyndew.

25Ka waitlam na shabar,

bad ka jingshyrkhei na shapoh,

kin ïa-pynduh ïa u rangsotti

lem bad ka theisotti,

ïa iba dang buiñ

lem bad u tymmen ba

la phuh 'ñiuhlieh.

26Nga la ong,

“Ngan da pynsakma ïa ki

haduh ki kyndong khoit,

bad ngan ym pynsah shuh

ïa ka jingkynmaw ïa ki

hapdeng ki briew:”

27lymda nga tieng

ïa ka jingbitar ki nongshun,

ïoh ba ki nongïaleh pyrshah

jong ki

kin da ïaleh khyllah,

ïoh ba kin ïa-ong de,

“Ka kti badonbor jong ngi hi

ka la leh ïa kane baroh,

te ym U Trai.” ’ ”

28“Naba ka long ka jaid bynriew

ba khlem ka jingsngewthuh,

lymne ym don ka jingshemphang

shuh ha ki.

29A ban da ki la stad,

ba kin sngewthuh ïa kane,

ba kin da pyrkhat

ïa la ka bakut!

30Kumno uwei un beh

ïa ki shi hajar,

bad ar ngut kin ïa-pynphet ïap

ïa ki shiphew hajar,

lymda U Mawsiang jong ki

u la die noh ïa ki,

bad U Trai u la aiti noh

ïa ki?

31Namar u mawsiang jong ki

um long kum U Mawsiang

jong ngi;

wat ki nongshun jong ngi hi

ki long kiba bishar.

32Naba u dieng soh Waiñ

jong ki

u long u dieng soh Waiñ

uba na Sodom,

bad na ki lyngkha Gomorra:

ki soh Waiñ jong ki,

ki long ki soh Waiñ

ka umksang,

ki tyrjup jong ki,

ki long kiba kthang.

33Ka Waiñ jong ki

ka long ka bih ki ïakjakor,

bad ka bih basniew

ki 'seiñpuh.

34“Ym shym la buh kynshew

ïa kane lem bad nga,

bad ba la buh skhem ïa ka

hapdeng ki jingkynshew

jong nga?

35 # Rom. 12:19; Heb. 10:30. Ka jingpynhiar kput

ka long ka jong nga,

bad ka jingleh kylliang ruh,

ka sla'jat jong ki kan tyrsiang

ha ka Ïa kaba dei:

namar ka sngi ka jingjynjar

jong ki

ka la jan,

bad kita kiei kiei ruh

ki ban ngat ha ki,

ki nang stet nang stet.

36Namar U Trai un bishar

ïa la u paidlang,

bad un kylla-ka-bamut

na ka bynta la ki shakri;

haba u ïohi ba ka bor

jong ki

ka la duh lehnohei,

bad ba ym don

ba la ker kut

lane ba la pynsah.

37Te un ong, ‘Shaei ki blei

jong ki,

uta u mawsiang ha uba

ki la shaniah,

38kiba la bam

ïa ka khleiñ ki jingkñia

jong ki,

bad kiba la dih ïa ka Waiñ

ki jingainguh dih jong ki?

to ai kin ïamih ban ïarap

ïa phi,

to ai kin long ka jingïada

ïa phi.

39“ ‘To khmih mynta, ba ma nga,

ma nga keiñ long ma U,

bad ym don u blei

nalor jong nga;

ma nga uba pynïap,

bad ma nga uba

pynim ruh:

ma nga uba pynmong,

bad ma nga uba

pynkhiah ruh:

lymne ym don uba lah

ban pyllait noh

na ka kti jong nga.

40Naba nga rah ïa la ka kti

sha bneng,

bad nga ong,

“Nga im ha la ka rta.”

41Lada nga shut ïa la

ka waitlam baphyrnai,

bad ka kti jong nga

ka bat ïa ka jingbishar;

nga ngan pynhiar kput

ha ki nongshun jong nga

bad ngan ai nong ha kita

kiba isih ïa nga.

42Ngan pynbuaid ïa ki khnam

jong nga da ka snam,

bad ka waitlam jong nga

kan bam ka doh;

lem bad ka snam jong kita

ïa kiba la pynïap

bad jong kita ïa kiba

la kem mraw,

naduh kaba sdang

ki jingpynhiar kput

halor ki nongshun.’ ”

43 # Rom. 15:10; Heb. 1:6; Jpw. 6:10; 19:2. To leh kmen, “A phi

ki jaid bynriew,

lem bad u paidlang jong U:

namar un pynhiar kput

na ka bynta ka snam

ki shakri jong U,

bad un ai ka jingpynhiar kput

halor ki nongshun jong U,

hynrei, un isynei ïa la ka ri,

bad ïa la u paidlang.”

44Te u Moses u la wan, bad u la kren ïa ki ktien kane ka jingrwai baroh, ha ki shkor uta u paidbah, ma u, bad u Joshua u khun u Nun. 45Bad u Moses u la wai noh kaba kren ïa kine ki ktien baroh, ha ki Israel baroh: 46u la ong ruh ha ki: “To phin pyrkhat biang ha la ka dohnud ïa kine ki ktien baroh, ïa kiba nga phla ha phi ha kane ka sngi; ïa kiba phin hukum ha la ki khun, ïa ka ban sumar ban leh ïa ki ktien jong kane ka hukum baroh. 47Naba kane kam long ka ktien bathala ïa phi; namar ki long ka jingim jong phi, da kane ka ktien ruh, phin pynslem ïa ki sngi ka rta jong phi ha kata ka ri, sha kaba phi ïaleit sha shiliang ka Jordan ban ïoh ïa ka.”

La phah ïa u Moses ban khmih ïa ka ri Kanaan

48Bad U Trai u la kren ha Moses ha kata kajuh ka sngi, u da ong, 49“To leit kiew sha une u lum Abarim, u lum Nebo keiñ, uba ha ka ri Moab, uba dei marpyrshah ïa ka Jerikho; bad to khmih ruh ïa ka ri Kanaan, ïa kaba nga ai ha ki khun Israel ban long ka jingïoh pateng: 50bad to ïap ruh ha uta u lum, sha uba me leit kiew, bad yn ïalum lang ïa me sha ki briew jong me; kumba u Aaron u hynmen jong me u la ïap ha u lum Hor, bad la ïalum lang ïa u sha la ki briew: 51naba phi la leh palat pyrshah ïa nga hapdeng ki khun Israel ha ki um Meribah Kadesh, ha ka ri khlaw Sin; namar phim shym la pynkyntang ïa nga hapdeng ki khun Israel. 52Pynban, men ïohi ïa kata ka ri ha khmat jong me; hynrei, men ym ïoh leit shata sha kata ka ri ïa kaba nga ai ha ki khun Israel.”

Currently Selected:

DEUTERONOMI 32: KHB

Highlight

Copy

Compare