DEUTERONOMI 23

Kiba kumno ki bym lah ban wan sha ka jingïaseng

1“Uta uba la mong ha ki pylleng, lane ba la puid, wat ai ba un rung ha ka jingïaseng U Trai.

2“Wat ai ïa u khun pongka ban rung sha ka jingïaseng U Trai; haduh ka bashiphew pateng jong u, un ym ïoh rung sha ka jingïaseng U Trai.

3 # Neh. 13:1,2. “U Ammon, lane u Moab, un ym ïoh rung sha ka jingïaseng U Trai; haduh ka bashiphew pateng jong ki ruh, kin ym ïoh rung sha ka jingïaseng U Trai ha la ka rta: 4#Jkñ. 22:1-6.namar ba kim shym la wan tan ïa phi bad u kpu bad ka um ha kata ka lynti, mynba phi la wan mih noh na ka ri Ijipt; bad namar ba ki la ïawai, ban ïaleh pyrshah ïa me, ïa u Balaam u khun u Beor na Pethor ha Mesopotamia, ïa ka ban tim ïa me. 5#Jkñ. 23:7—24:9.Pynban, U Trai uba U Blei jong me um mon ban shahshkor ïa u Balaam; hynrei, U Trai uba U Blei jong me u la pynkylla ka jingkyrkhu ha me ïa kata ka jingtim, namar U Trai uba U Blei jong me u la ieit ïa me. 6Men ym wad ïa ka jingsuk jong ki, lymne ïa ka jingbha jong ki, baroh ki sngi ka rta jong me.

7“Men ym isaitmet ïa u kynja Edom, naba u long u para jong me: men ym isaitmet ïa u Ijipt, namar ba me la shong nongwei ha ka ri jong u. 8Ki khun ba la pynkha na ki, kin ïoh rung sha ka jingïaseng U Trai, ha ka balai pateng jong ki.

Kam dei ban shah ïa ka bymkhuid hapoh ka dara

9“Haba uta u paidïapom un leit ïaleh pyrshah ïa ki nongshun jong me, te men sumar ïa lade na ka basniew baroh.

10“Lada don mano mano ruh hapdeng jong phi, u bymkhuid da kaba shu jia ryngkhat ïa u mynmiet, te un mih noh shabar ka jaka shong dara, un ym wan hapoh kata ka jaka shong dara: 11hynrei, ynda la janmiet, te un sum ïa lade ha ka um: bad haba la sep ka sngi, un ïoh wan sha kata ka jaka shong dara.

12“Ka dei ba men don ka jaka ruh shabar kata ka jaka shong dara, sha kaba men leit rud: 13ka dei ba men don ruh i khun mohkhiew hapdeng ki jingbuh jong me; bad haba men leit rud, to tih thliew da ita, bad men phai bad men tep ruh ïa ka rud jong me: 14naba U Trai uba U Blei jong me u ïaid hapdeng ki dara jong me, ban pynim ïa me, bad ban aiti ïa ki nongshun jong me ha khmat jong me; namar kata, kita ki dara jong me kin long bakhuid; ba un ym ïohi kaei kaei ruh kaba tngit ha me, bad un phai noh na me.

Kiwei pat ki aiñ

15“Men ym aiti ha u kynrad jong u ïa u mraw uba la phet ïap na la u kynrad: 16un shong sah bad me, hapdeng jong phi keiñ, ha kata ka jaka ïa kaba un jied ha kawei na ki khyrdop jong me, ha kaba u sngewbha hi: wat pynshitom ïa u.

17 # Leb. 19:29. “Kan ym long ka nuti na ki khun kynthei ki Israel, lymne u riew awria u kynja Sodom na ki khun shynrang ki Israel. 18Men ym wallam ïa ka bainong jong ka nuti, lane ïa ka dor u ksew, sha ïing U Trai uba U Blei jong me ha kano kano ka jingkular niam: naba kine baroh ar, ki long kiba ijli ha khmat U Trai uba U Blei jong me.

19 # Eks. 22:26; Leb. 25:35-37; Deu. 15:7-11. “Wat ai sut ha la u para, kaba ai sut da u sbai, kaba ai sut da ka jingbam, kaba ai sut da kiei kiei ruh ba ju shim sut: 20ha u nongwei me lah ban ai sut; hynrei, ha la u para, men ym ai sut: ba U Trai uba U Blei jong me un kyrkhu ïa me ha kiei kiei baroh ba men leh da la ka kti, ha kata ka ri sha kaba me leit ban ïoh ïa ka.

21 # Jkñ. 30:2-16; Mat. 5:33. “Haba me kular ïa ka jingkular kyntang sha U Trai uba U Blei jong me, wat pyntud, ïa ka ban pyndep noh ïa ka: naba U Trai uba U Blei jong me shisha un pan ïa kata na me; te kan long pop ha me keiñ. 22Hynrei, lada men ym kular, kata kan ym long pop ha me. 23Men rakhe bad men pyndep ruh ïa kata kaba la mih noh na ka shyntur jong me; katba me la kular ha U Trai uba U Blei jong me, ïa ka jingainguh sngewbha, ïa kaba me la kular da la ka shyntur.

24“Haba me leit sha ka brisoh u paramarjan jong me, te me lah ban bam soh haduh ba men da ngiah, katba me sngewbha hi; hynrei, men ym thep ha la ka jingdiang. 25Haba me wan sha ka lyngkha Kew u paramarjan jong me, te me lah ban kheit soh Kew da la ka kti; hynrei, men ym lah ban buh ïa ka rashi ha u Kew u paramarjan jong me.

Currently Selected:

DEUTERONOMI 23: KHB

Highlight

Copy

Compare