DEUTERONOMI 24

Shaphang kaba ïakhlad tnga

1 # Mat. 5:31; 19:7; Mrk. 10:4. “Haba u briew u la shim ïa ka tnga, bad u la shongkurim ïa ka, te lada kam shem ka jingsngewbha ha khmat jong u, namar ba u la shem ïa kaei kaei ruh kaba tngit ha ka, to ai te ba un thoh ha ka, ïa ka kot iehnoh, bad ban ai ha ka kti jong ka, bad un pyllait noh ïa ka na ka ïing jong u. 2Te haba ka la mih noh na ka ïing jong u, ka lah ban leit, ban long ka tnga jong uwei pat. 3Te lada uta u tnga u bakhatduh un isih ïa ka, bad un thoh ha ka, ïa ka kot iehnoh, bad u ai ha ka kti jong ka, bad u phah noh ïa ka na ka ïing jong u; lane lada ïap uta u tnga u bakhatduh, uba la shim ïa ka ban long ka tnga jong u; 4uta u tnga u banyngkong jong ka, uba la phah noh ïa ka, um lah keiñ ban shim pat ïa ka ban long ka tnga jong u, hadien ba ka la tngit; naba kata ka long kaba ijli ha khmat U Trai: te men ym pynlong pop ïa kata ka ri, ïa kaba U Trai uba U Blei jong me u ai ha me kum ka jingïoh pateng.

5“Ynda u briew u la shim ïa ka tnga thymmai, un ym leit sha ka thma, lymne wat buh kano kano ka kam ha u: un ïoh laitluid ha la ïing shi snem, bad un pynsngewbha ïa la ka tnga ïa kaba u la shim.

Shuh shuh kiwei pat ki aiñ

6 # Eks. 22:26,27. “Ym bit ïa u briew ban shim bynda ïa u mawtylliat uba hapoh ne halor: naba u shim bynda ïa ka jingim u briew keiñ.

7 # Eks. 21:16; 1 Kor. 5:13. “Lada shem ïa u briew ba u da tuh ïano ïano ruh na ki para jong u ki khun Israel, bad u da pynlong jingkhaïi da u, ne u die ïa u; te ïa uta u nongtuh yn pynïap: kumta, men pynduh noh ïa kata ka basniew napdeng jong phi.

8 # Leb. 13:1—14:57. “To sumar shaphang ka pang 'thohlieh, ba men khmih bniah, bad men leh ruh baroh kat kumba ki Lebi ki lyngdoh keiñ kin hikai ïa phi: kumba nga la hukum ïa ki, kumta phin sumar ban leh. 9#Jkñ. 12:10.To kynmaw aïu ba U Trai uba U Blei jong me u la leh ïa ka Miriam ha lynti, hadien ba phi la mih noh na ka ri Ijipt.

10 # Eks. 22:26,27. “Haba me ai kylliang ïa kaei kaei ruh ïa la u para, men ym rung hapoh ka ïing jong u ban shim ïa ka bynda jong u. 11Men ïeng shabar, bad uta u briew ha uba me ai kylliang un wallam ïa kata ka bynda shabar ha me. 12Te lada uta u briew u long u baduk, men ym pynsah miet ïa ka bynda jong u: 13haba kumno kumno ruh, men ai pat ha u ïa kata ka bynda, haba sep ka sngi, ba un ïohthiah ha la ka jaiñkup hi, bad un kyrkhu ïa me: te ïa kane, yn ñiew ka hok ïa me ha khmat U Trai uba U Blei jong me.

14 # Leb. 19:13; Jak. 5:4. “Men ym banbeiñ ïa u shakri babylla u baduk, bad u bakyrduh, la u long na ki para jong me, lane na ki nongwei jong me kiba ha ka ri jong me hapoh ki khyrdop jong me: 15ha kata ka sngi jong u hi keiñ ba u la trei, men ai ka bainong jong u, lymne wat ai kan sep noh ka sngi haba ka dang sah; namar u long u baduk, bad ïa kane u khmih lynti eh: ba ïoh un lynñiar sha U Trai pyrshah ïa me, bad kan long pop ha me.

16 # 2 Syiem. 14:6; 2 Khrn. 25:4; Ese. 18:20. “Kam dei ban pynïap ïa ki kpa na ka bynta ki khun, lymne wat pynïap ïa ki khun na ka bynta ki kpa: ïa uwei uwei baroh yn pynïap na ka bynta ka pop la ka jong hi keiñ.

17 # Eks. 22:21-24; 23:9; Leb. 19:33,34; Deu. 27:19. “Men ym pynbakla ïa ka jingbishar ïa u nongwei, lymne ïa ki khunswet; lymne wat shim bynda ïa ka jaiñkup ka riewkynthei: 18hynrei, men kynmaw ba me la ju long u mraw ha ka ri Ijipt, bad ba U Trai uba U Blei jong me u la pyllait noh ïa me nangta: namar kata, nga hukum ïa me ban leh ïa kane.

19 # Leb. 19:9,10; 23:22. “Haba me ot ïa la ka jingot ha la ka lyngkha, bad ba me la klet shi song ha kata ka lyngkha, men ym leit phai pat, ban shim ïa ka: kan long ïa u nongwei, ïa ki khunswet, bad ïa ka riewkynthei: ba U Trai uba U Blei jong me un kyrkhu ïa me ha ka jingtrei ki kti jong me baroh. 20Haba me khynñiuh pynhap ïa u soh Olib jong me, men ym leit kiew shuh ban kheit: kan long ïa u nongwei, ïa ki khunswet, bad ïa ka riewkynthei. 21Haba me ïalum ïa ki soh Waiñ ka brisoh jong me, men ym khar ïa kaba sah hadien: kan long ïa u nongwei, ïa ki khunswet, bad ïa ka riewkynthei. 22To men kynmaw ruh, ba me la long u mraw ha ka ri Ijipt: namar kata, nga hukum ïa me ban leh ïa kane.

Currently Selected:

DEUTERONOMI 24: KHB

Highlight

Copy

Compare