DEUTERONOMI 22

1 # Eks. 23:4,5. “Haba me ïohi ba leit sakma u masi, lane ka langbrot u para jong me, wat shu rieh ïa lade na ki; la kumno kumno ruh, men wallam pat ïa ki ha la u para. 2Te lada u para jong me um long hajan jong me, lane lada mem ithuh ïa u, kumta te men wallam ïa ka sha ïing jong me, bad kan sah ruh bad me tad ynda ba u para jong me un wan wad ïa ka, te men ai pat ïa ka ha u. 3Kumjuh ruh men leh bad ka kadda jong u; bad kumjuh men leh bad ka jaiñkup jong u; bad kiei kiei baroh kiba la jah kiba dei ki jong u paramarjan jong me ïa kiba u la jah noh, haba me la shem ruh, men leh kumjuh keiñ: mem lah ban rieh ïa lade. 4Haba me ïohi ïa ka kadda u para jong me, lane ïa u masi jong u, ba ki la ïakyllon ha lynti, wat shu rieh ïa lade na ki; shisha men ïarap lem ïa u ban khyllie ïa ki pat.

5“Wat ai ba ka kynthei kan kup ïa kaba dei ka jong u shynrang, lymne ba u shynrang un kup ïa ka jaiñkup ka jong ka kynthei, namar baroh kiba leh kumta, ki long ka jingijli ha U Trai uba U Blei jong me.

6“Lada ka skum sim ka jia ban don ha khmat jong me ha lynti, ha u dieng, ne ha tbian, la ki long ki khun sim, ne ki pylleng, bad ba ka kmie ka dang shong dem halor kita ki khun, ne halor kita ki pylleng, wat shim keiñ ïa kata ka kmie lem bad kita ki khun: 7la kumno kumno ruh, men pyllait noh ïa kata ka kmie, ïa kita ki khun, toi me lah ban shim ha me, ba kan long bha ïa me, bad ba yn pynslem ïa ki sngi ka rta jong me.

8“Haba me tei ka ïing thymmai, to buh ïa ka jingker baroh sawdong ïa ka jingsop jong me, ba men ym pynwan ïa ka snam halor la ka ïing, haba da hap mano mano nangta.

9 # Leb. 19:19. “Men ym bet ïa la ka bri da ki symbai ba bun jaid: ba ïoh yn pynsniew ïa u soh u symbai ba me la bet, bad ïa u soh ka bri jong me. 10Men ym pynlur lang bad u masi bad ka kadda. 11Men ym kup jaiñkup bakhleh rukom, kum da ka banat bad ka 'saihon.

12 # Jkñ. 15:37-41. “Men jyrthiaw ïa ki saw ki rmiang ka jaiñkup jong me, ïa kaba me kup.

Ka aiñ shaphang ka jinglong sotti

13“Lada u briew u shim ka tnga, bad ynda u la leit sha ka, u isih ïa ka, 14bad u ai ki daw ban kren pyrshah ïa ka, bad u pynbudnam ïa ka, bad u ong, ‘Nga la shim ïa kane ka kynthei, te mynba nga la leit sha ka, ngam shem ha ka ki dak ka jinglong sotti’: 15ynda kumta, u kpa jong kata ka samla, bad ka kmie jong ka, kin ïashim bad kin ïa-pyni ki dak ka jinglong sotti jong kata ka samla ha ki tymmen basan kata ka nongbah ha ka khyrdop: 16te u kpa jong kata ka samla un ong ha kita ki tymmen basan, ‘Nga la ai ka khun jong nga ha une u briew ban long ka tnga jong u, bad u isih ïa ka; 17te, ha khmih, u la ai daw ban kren pyrshah ïa ka, da kaba ong, “Ngam shym la shem ïa ki dak ka jinglong sotti ha ka khun jong me;” te pleng kine long ki dak ka jinglong sotti ka khun jong nga.’ Te kin ïasiang ïa kata ka jaiñ ha khmat kita ki tymmen basan jong kata ka nongbah. 18Te kita ki tymmen basan jong kata ka shnong, kin ïashim ïa uta u briew, bad kin ïa-pynshitom ïa u; 19bad kin daiñ kuna ïa u, shispah ki shekel rupa, bad kin ai ruh ïa ki ha u kpa jong kata ka samla, namar u la pynbudnam ïa ka theisotti na Israel: bad kan long ka tnga jong u; um lah ban beh noh ïa ka, baroh ki sngi ka rta jong u. 20Hynrei, lada kane ka long kaba shisha, bad ba ym shym la shem kita ki dak ka jinglong sotti ha kata ka samla: 21#1 Kor. 5:13.ynda kumta, kin ïawallam shabar ïa kata ka samla ha ka jingkhang ka ïing u kpa jong ka, bad ki briew jong ka shnong jong ka kin ïalynthem da ki maw ïa ka, ba kan ïap; namar ba ka la leh ka jingthala ha Israel, da kaba leh nuti ha ïing u kpa jong ka: kumta, men pynduh noh ïa kata ka basniew na Israel.

22 # Eks. 20:14; Leb. 18:20; 20:10; Deu. 5:18. “Lada yn shem ïa u briew ba u thiah bad ka kynthei kaba long ka tnga briew, te kin ïap baroh ar ngut, uta u briew keiñ uba la thiah bad kata ka kynthei, bad kata ka kynthei ruh: kumta, men pynduh noh ïa kata ka basniew na Israel.

23“Lada don ka samla kaba la ïatehktien bad u tnga, bad ba u briew u shem ïa ka ha shnong, bad ba u thiah bad ka; 24#1 Kor. 5:13.te phin ïawallam shabar ïa ki baroh ar ngut ha ka khyrdop jong kata ka shnong, bad phin ïalynthem maw ïa ki, ba kin ïap; ïa kata ka samla keiñ, namar kam shym la kyang, haba ka don hapoh kata ka shnong; bad ïa uta briew, namar ba u la pynjahburom ïa ka tnga u paramarjan jong u: kumta, men pynduh noh ïa kata ka basniew napdeng jong phi.

25“Hynrei, lada ha lyngkha, u briew u la shem ïa ka samla ba la ïatehktien, bad u briew u la leh jubor ïa ka, bad u la thiah bad ka; te un ïap tang uta u briew uba la thiah bad ka: 26hynrei, ïa kata ka samla wat leh ei ei ruh; ha kata ka samla ym don ka pop ba dei ban ïap: namar kumba u briew u ïeng ïaleh ïa u paramarjan, bad u pynïap ïa u, kumta hi long kane ka kam: 27namar u la shem ïa ka ha lyngkha, bad kata ka samla ba la ïatehktien ka la kyang, hynrei, ym don ban pyllait ïa ka.

28 # Eks. 22:16,17. “Te lada u briew u shem ïa ka samla kaba sotti, khlem da ïatehktien, bad u bat ïa ka, bad u thiah ruh bad ka, bad ba la lap ïa ki; 29uta u briew te uba la thiah bad ka, un ai ha u kpa jong kata ka samla, sanphew ki shekel rupa, bad kan long ka tnga jong u, namar u la pynjahburom ïa ka; um lah ban beh noh ïa ka, baroh ki sngi ka rta jong u.

30 # Leb. 18:8; 20:11; Deu. 27:20. “Kam dei ïa u briew ban shim ïa ka tnga u kpa jong u, lymne ban khyndied ïa ka jaiñpoh u kpa jong u.

Currently Selected:

DEUTERONOMI 22: KHB

Highlight

Copy

Compare