DEUTERONOMI 21

Ka rukom ka jingsait kuna haba jia ka jingpynïap briew

1“Lada yn shem ïano ïano ruh ïa uba la pynïap ha kata ka ri ïa kaba U Trai uba U Blei jong me u ai ha me ban ïoh ïa ka, ba u da thiah ha lyngkha, khlem da tip uei ba la pynïap ïa u: 2ynda kumta, ki tymmen basan jong me bad ki nongbishar jong me kin ïamih noh, bad kin ïathew haduh kita ki nongbah kiba sawdong ïa uta ba la pynïap: 3te kan long ha kata ka nongbah kaba kham jan ïa uta u briew ba la pynïap, ba ki tymmen basan jong kata ka nongbah kin shim da ka masi lud, ïa kaba ym shym la pyntrei, bad ka bym shym la ring hapoh ka lyngkor; 4te ki tymmen basan jong kata ka nongbah, kin ïawallam ïa kata ka masi lud ha ka them ba sah khlaw, ïa kaba ym ju lur lymne bet, bad kin khrai khlieh ïa kata ka masi lud hangta ha kata ka them: 5bad ki khun shynrang u Lebi, ki lyngdoh kin ïawan hajan; namar U Trai uba U Blei jong me u la jied ïa ki ban shakri ha u, bad ban kyrkhu ha ka kyrteng U Trai; bad kat ka ktien jong ki kan long ka jingïania baroh bad ka jingïashoh baroh: 6te ki tymmen basan jong kata ka nongbah baroh, kaba kham jan ïa uta ba la pynïap, kin thet ïa la ki kti halor kata ka masi lud ba la khrai khlieh ha kata ka them; 7kin ïathuh te bad kin ïa-ong, ‘Ki kti jong ngi kim shym la pynmih ïa kane ka snam, lymne ki khmat jong ngi kim shym la ïohi. 8To sngewsynei, A Trai, ïa ki Israel ki briew jong me, ïa kiba me la siewspah, bad wat da ñiew ruh ïa ka snam balui lui ha ki Israel ki briew jong me.’ Te yn sa map ïa ki, ïa kata ka snam. 9Kumta keiñ, men pynduh noh ïa ka jingrem ka snam balui lui napdeng jong phi, haba men leh ïa kata kaba dei ha khmat U Trai.

Kumno ban leh haba poikha bad ka mraw

10“Haba me leit ban ïaleh thma ïa ki nongshun jong me, bad ba U Trai uba U Blei jong me u la ai ïa ki ha ki kti jong me, bad me la ring mraw ïa ki, 11bad me ïohi hapdeng kita ki mraw ïa ka kynthei ba-ibhabriew, bad ba me la mon ban shim ïa ka, ban long ka tnga jong me; 12te men wallam ïa ka sha la ïing hapoh ka ïing jong me; bad kan khi ïa la ka khlieh, bad kan ot ïa la ki tyrsim; 13bad kan loit noh ïa la ki jaiñkup mraw, bad kan shongneh ha ïing jong me, bad kan ïambriew ïa la u kpa bad ïa la ka kmie, shi bnai tylli: bad hadien kata, men sa leit sha ka, bad men long u tnga jong ka, ka ruh kan long ka tnga jong me. 14Hynrei, kan long, lada mem sngewbha bad ka, ba men pyllait noh ïa ka kat shaei ba ka mon; hynrei, men ym die ïa ka da lei lei ban ïoh sbai, lymne men ym wad ka jingmyntoi na ka, namar me la shukor ïa ka.

Ka hok u khun nyngkong

15“Lada u briew u don ar ngut ki tnga, kawei kaba u ieit, bad kawei pat kaba u isih, bad ba kata ïa kaba u ieit bad kata ïa kaba u isih ki la kha khun ïa u; bad ba u khun nyngkong u long u jong kata ïa kaba u isih; 16te kan long, haba un pynïabynta ha la ki khun shynrang ïa kata kaba u don, ba um lah ban pynlong khun nyngkong ïa u khun jong kata ïa kaba u ieit ha ka jaka u khun jong kata kaba u isih, uba long shisha u khun nyngkong keiñ: 17hynrei, un kohnguh khun nyngkong ïa u khun jong kata ïa kaba u isih, da kaba u ai ha u ïa kaba ar shah na kaba u don baroh: namar une u long kaba sdang keiñ ka bor jong u; ka hok u khun nyngkong ka dei ka jong u.

Kumno ka dei ban leh ïa u khun bymkohnguh

18 # Eks. 20:12; 21:15,17; Leb. 20:9; Deu. 5:16; 27:16. “Lada u briew u don u khun uba mutlop bad uba kiat, u bymkohnguh ïa ka ktien u kpa jong u, lane ïa ka ktien ka kmie jong u, bad haba ki la sneng ïa u ruh, um sngap ïa ki: 19ynda kumta, u kpa jong u bad ka kmie jong u kin ïashim ïa u, bad kin ïawallam ïa u ruh sha ki tymmen basan ka nongbah jong u, bad ha ka khyrdop ka jaka jong u; 20bad kin ïa-ong te ha ki tymmen basan ka nongbah jong u, ‘Une u khun jong ngi u long uba mutlop bad uba kiat, um kohnguh ïa ka ktien jong ngi; u long uba kangar bad uba buaid.’ 21Ynda kumta, ki briew baroh ka nongbah jong u, kin ïalynthem maw ïa u, ba un ïap: kumta men pynduh noh ïa ka basniew napdeng jong phi; bad ki Israel baroh kin ïohsngew, bad kin ïasheptieng.

Kiwei pat ki hukum

22 # Ki Kam. 5:30; 10:39. “Te lada u briew u leh ïa ka pop kaba dei ban ïap, bad ba me pynïap ïa u, bad ba me phasi ruh ïa u ha u dieng; 23#Gal. 3:13.kan ym sah ka met jong u ha u dieng baroh shi miet, hynrei, la kumno kumno men tep ïa u ha kata ka sngi; namar ka jingtim U Blei ka don halor uta ba la phasi; ba yn ym pyntngit ïa ka ri jong me ïa kaba U Trai uba U Blei jong me u ai ha me kum ka jingïoh pateng.

Currently Selected:

DEUTERONOMI 21: KHB

Highlight

Copy

Compare