DEUTERONOMI 20

Ki aiñ kiba ïadei shaphang ka thma

1“Haba me leit ïaleh thma ïa ki nongshun jong me, bad ba me ïohi ïa ki kulai, bad ïa ki kali ïapom, bad u paidbah uba kham bun ban ïa me, to wat sheptieng ïa ki: namar U Trai uba U Blei jong me, uba la wallam noh ïa me na ka ri Ijipt, u long ryngkat bad me. 2Kan jia te, ynda phi la ïashur ban ïaleh thma, ba uta u lyngdoh un wan jan bad un kren ruh ha uta u paidbah, 3bad un ong ha ki, ‘To sngap, A Israel, ha kane ka sngi phi la ïawan hajan ban ïaleh thma ïa ki nongshun jong phi: wat ai ba ka dohnud jong phi kan sngewsyier, lymne wat sheptieng, bad wat sngewkyiuh ruh, lymne wat sngewshyrkhei namar jong ki; 4namar U Trai uba U Blei jong phi, ma u hi u leit lem bad phi, ïa ka ban ïaleh thma na ka bynta jong phi pyrshah ïa ki nongshun jong phi, ïa ka ban pynim ïa phi.’ 5Te ki rangbah kin kren ha uta u paidbah, da kaba ong, ‘Uno uba la tei ïa ka ïing thymmai, bad u bym pat la pynkyntang ïa ka? to un leit phai pat sha la ïing, ïoh ba un ïap ha kata ka thma, bad ba uwei pat u briew un pynkyntang ïa ka. 6Bad uno uba la thung ïa ka brisoh Waiñ, bad u bym pat ïoh bam na ka? to un leit phai pat sha la ïing, ïoh ba un ïap ha kata ka thma, bad ba uwei pat u briew un bam na ka. 7Bad uno uba la ïatehktien bad ka briew, bad u bym pat la shim ïa ka? To un leit phai pat sha la ïing, ïoh ba un ïap ha kata ka thma, bad ba uwei pat u briew un shim ïa ka.’ 8Kita ki rangbah ruh kin nang kren shuh ha uta u paidbah, bad kin ong, ‘Don mano uba pud pud bad uba sngewsyier dohnud? to un leit phai pat sha la ïing, ba ïoh ka dohnud ki para jong u kan jem noh kum ka dohnud jong u hi.’ 9Kan jia te, ynda kita ki rangbah ki la ïawai la ki jingkren ha uta u paidbah, ba kin ïathung da ki nongïalamphrang ki paidïapom ïa ka ban ïalam ïa uta u paidbah.

10“Haba me poi hajan ïa ka nongbah ban ïaleh thma ïa ka, te men pyrta ka jingsuk ïa ka. 11Te lada kan phai ktien ïasuk ha me, bad kan plie lynti ruh ïa me, te kan long, ba ki briew baroh kat kiba shem ha ka kin ïalong kiba hap khajna ha me, bad kin ïashakri ruh ïa me. 12Hynrei, lada kan ym ïasuk bad me, hynrei, kan ïaleh thma bad me, ynda kumta, men ker kut ïa ka. 13Bad haba U Trai uba U Blei jong me u la ai ïa ka ruh ha ka kti jong me, to men shoh ïap noh ïa ki shynrang jong ka baroh da ka syrti waitlam: 14hynrei, ïa ki kynthei, bad ïa ki khynnah, bad ïa ki jingri ruh, bad ïa baroh kaba don ha kata ka nongbah, ïa ka jinglute jong ka baroh keiñ, to shim ha lade; bad men ïoh bam ïa ka jinglute ki nongshun jong me, ïa kaba U Trai uba U Blei jong me u la ai ha me. 15Kumne men leh ha kita ki nongbah baroh kiba sha jngai eh na me, ki bymdei na ki nongbah jong kine ki jaid bynriew. 16Hynrei, na ki nongbah kine ki briew, kiba U Trai uba U Blei jong me u ai ha me ban long ka jingïoh pateng, men ym pynsah im ei ei ruh em ba pynhiar mynsiem: 17hynrei, men pynduh noh khoit ïa ki; ïa ki Hit, bad ïa ki Amor, ïa ki Kanaan, bad ïa ki Peris, ïa ki Hib, bad ïa ki Jebus; kumba U Trai uba U Blei jong me u la hukum ïa me: 18ba kin ym hikai ïa phi ban leh katba kum ki jingijli jong ki baroh, ïa kiba ki la leh ha la ki blei; kumta ba phin leh pop pyrshah ïa U Trai uba U Blei jong phi.

19“Haba men ker kut slem ïa ka nongbah, ha kaba ïaleh thma ban jop ïa ka, me wat pynduh noh ïa ki dieng jong ka, da kaba pom ïa ki da ka wait; naba me lah ban bam na ki, to wat pom te ïa ki; namar hato u dieng ka lyngkha u long u briew, ba men leit ker kut ïa u? 20Tang kita ki dieng ïa kiba phi tip ba kim long ki dieng ka jingbam, ïa kita keiñ me lah ban pynduh bad ban khet noh; te men tei ki kynton pyrshah ïa kata ka nongbah kaba ïaleh thma bad me, haduh ban da kyllon thiaw.

Currently Selected:

DEUTERONOMI 20: KHB

Highlight

Copy

Compare