DEUTERONOMI 19

Ki nongbah jaka rieh bad shaphang kaba pynkynriah pud

(Jkñ. 35:9-28; Jos. 20:1-9)

1 # Jos. 20:1-9; Eks. 21:12-14; Jkñ. 35:1-34. “Ynda U Trai uba U Blei jong me u la ot noh ïa kita ki jaid bynriew, kiba U Trai uba U Blei jong me u ai ha me ïa ka ri jong ki, bad me la ïoh ïa ki ruh, bad me la shongneh ha ki nongbah jong ki, bad ha ki ïing jong ki; 2to men buh kyrpang ha lade lai tylli ki nongbah hapdeng ka ri jong me, ïa kaba U Trai uba U Blei jong me u ai ha me ban ïoh ïa ka. 3Men shna ka lynti ïa lade, bad men pynïabynta lai bynta ïa ki pud ka ri jong me, ïa kaba U Trai uba U Blei jong me u ai ha me ban ïoh ïa ka, ba u nongpynïap briew baroh un ïoh phet ïap shata.

4“Te kane long ka hukum jong uta u nongpynïap briew u ban phet ïap shata, khnang ba un ïoh im: ‘Uno uno ruh uba kum pynïap ïa la u paramarjan, ïa uba um shym la shun mynshuwa; 5kumba haba u briew u leit sha khlaw, lem bad la u paramarjan ban thoh dieng, bad hamar ba u rah ïa la ka kti ban khet dieng, ba u sdie u sliah noh na u sping, bad u phalang ha u paramarjan jong u, bad kumta u ïap; un phet ïap sha kawei na kita ki nongbah ba un ïoh im: 6ïoh ba u nongpynhiar kput jong kata ka snam u beh ïa uta u nongpynïap briew, katba dang shit ka dohnud jong u, bad ba un lap ïa u, namar ba kata ka lynti ka jngai, bad ba un pynïap ïa u, haba um dei ban ïap, namar um shym la shun ïa u mynshuwa keiñ.’ 7Namar kata, nga hukum ïa me, da kaba ong, ‘Men buh kyrpang ha lade lai tylli ki nongbah.’ 8Te haba U Trai uba U Blei jong me un pynkhraw ïa ki pud jong me, kumba u la smai ha ki kpa jong me, bad un ai ruh ha me ïa kata ka ri baroh ïa kaba u la kular ban ai ha ki kpa jong me: 9‘Lada men sumar ban leh ïa kine ki hukum baroh, ïa kiba nga hukum ïa me ha kane ka sngi, ban ieit ïa U Trai uba U Blei jong me, bad ban ïaid ruh ha la ka sngi ha ki lynti jong u; ynda kumta, men nang buh shuh sa lai tylli ki nongbah ha lade, nalor kine lai tylli: 10ban ym theh keiñ ïa ka snam balui lui ha ka ri jong me, ïa kaba U Trai uba U Blei jong me u ai ha me ban long ka jingïoh pateng, bad kumta ka snam kan long halor jong me.’

11“Hynrei, lada uno uno u briew u shun ïa la u paramarjan, bad ba u ap thap ïa u, bad ba u ïeng ïaleh ïa u, bad u da shoh ïap ïa u ba kumta u ïap noh; bad un phet ïap sha kawei na kine ki nongbah: 12te kumta ki tymmen basan ka nongbah jong u, kin ïaphah shaw, bad kin wallam ïa u nangta, bad kin aiti noh ïa u ha ka kti u nongpynhiar kput jong ka snam, ba un ïap noh. 13Ka khmat jong me kan ym isynei ïa u, hynrei, men pyndam noh ïa ka jingrem jong ka snam balui lui na Israel, ba kan ïoh long bha ïa me. 14#Deu. 27:17.Men ym pynkynriah ïa ka pud u paramarjan jong me, ïa kaba la buh kita kiba mynbarim ha ka bynta pateng jong me, ïa kaba men ïoh pateng ha kata ka ri ïa kaba U Trai uba U Blei jong me u ai ha me ban ïoh ïa ka.

Shaphang ki nongsakhi

15 # Jkñ. 35:30; Deu. 17:6; Mat. 18:16; 2 Kor. 13:1; 1 Tim. 5:19; Heb. 10:28. “Wat shah ïa u nongsakhi ba tang uwei, ban ïeng ïaleh pyrshah ïa u briew namar kano kano ruh ka jingpalat, lane namar kano kano ruh ka pop, ha kano kano ka pop baroh ba u leh pop: da ka shyntur ar ngut ki nongsakhi, lane da ka shyntur lai ngut ki nongsakhi, yn pynskhem ïa kata ka kam. 16#Eks. 20:16; 23:1; Leb. 19:16; Deu. 5:20.Lada u nongsakhi lamler u ïeng ïaleh ïa uno uno u briew da kaba ïathuh ka bymdei pyrshah ïa u; 17ynda kumta, kita baroh ar ngut hapdeng kiba don kata ka jingïania, kin ïaïeng ha khmat U Trai, ha khmat kita ki lyngdoh keiñ bad kita ki nongbishar, ki ban long ha kita ki sngi; 18te kita ki nongbishar, kin ïa-pynlong ïa ka jingtohkit babiang: te lada uta u nongsakhi u long u nongsakhi balamler, uba la ïathuh lamler pyrshah ïa la u para; 19#1 Kor. 5:13.ynda kumta, phin leh ïa u kumba u la thmu ban leh ïa la u para: kumta keiñ, phin pynduh noh ïa kata ka basniew napdeng jong phi. 20Kita kiwei pat te kin ïohsngew, bad kin sheptieng ruh, bad naduh kata, kin ym leh shuh ïa ka basniew kat kata napdeng jong phi. 21#Eks. 21:23-26; Leb. 24:20; Mat. 5:38.Bad ka khmat jong me kan ym sngewsynei ïa u; hynrei, long ka jingim namar ka jingim, ka khmat namar ka khmat, ka bniat namar ka bniat, ka kti namar ka kti, ka kjat namar ka kjat.

Currently Selected:

DEUTERONOMI 19: KHB

Highlight

Copy

Compare