DEUTERONOMI 15

Ka snem ka jingpyllait ïa ki baduk

1“Ha ka bakut ki hynñiew snem, men pynlong ïa ka jingpyllait noh. 2Kane te, ka long ka rukom jong kata ka jingpyllait: ‘u nongshah ram baroh uba ai kylliang ha la u paramarjan, un pyllait noh; un ym pan shuh ïa ka, na la u paramarjan, lane na la u para; namar ba la pynbna ïa ka jingpyllait jong U Trai. 3Na u nongwei me lah ban dawa ïa ka pat: hynrei, kaba ka jong me kaba don ha u para jong me, to ai ba ka kti jong me kan pyllait noh. 4Khnang keiñ, ban ym don u baduk hapdeng jong phi’; (namar U Trai un kyrkhu ïa me shikatdei eh, ha kata ka ri ïa kaba U Trai uba U Blei jong me u ai ha me, ban ïoh pateng ïa ka kum ka bynta;) 5‘tang ba men shahshkor biang biang ruh ïa ka ktien U Trai uba U Blei jong me, da kaba sumar ïa ka ban leh ïa kine ki hukum baroh, ïa kiba nga hukum ïa me ha kane ka sngi.’ 6Namar U Trai uba U Blei jong me un kyrkhu ïa me, kumba u la kular ïa me: te men sa ai kylliang ha ki bun ki jaid bynriew, hynrei, men ym shim kylliang; te men synshar ruh halor bun ki jaid bynriew, hynrei, kin ym ïoh synshar keiñ halor jong me.

7 # Leb. 25:35. “Lada don hapdeng jong phi, u briew u baduk, uwei na ki para jong me, hapoh ki khyrdop jong me ha ka ri jong me ïa kaba U Trai uba U Blei jong me u ai ha me, wat pyneh ïa la ka dohnud, lymne wat khang ïa la ka kti na la u para u baduk: 8hynrei, shisha men plie kylluid ïa la ka kti ha u, bad men ai kylliang ruh ha u kaba biang ïa kaba u donkam ha kata kaba u kyrduh. 9To sumar, ba kan ym jia ka jingmut bymman ha ka dohnud jong me, da kaba ong, ‘Kata ka snem ka bahynñiew, ka snem ka jingpyllait keiñ, ka la jan;’ bad ka khmat jong me ka long sniew pyrshah ïa u para jong me u baduk, ïa ka ban ym ai satia ha u; bad ba un lynñiar ha U Trai pyrshah ïa me, te kan long pop ha me. 10Shisha men ai ha u, bad wat leh sngewsih ha la ka dohnud haba me ai ha u: namar na ka bynta kane, U Trai uba U Blei jong me un kyrkhu ïa me ha ki jingleh jong me baroh, bad ha kaei kaei baroh kaba men ktah da la ka kti. 11#Mat. 26:11; Mrk. 14:7; Ïoan. 12:8.Namar ki baduk kin ym duh noh na kata ka ri: namar kata, nga hukum ïa me, da kaba ong, ‘Shisha men plie kylluid ïa la ka kti ha u para jong me, ha ki baduk jong me, bad ha ki bakyrduh jong me, ha ka ri jong me.’

Ka snem ka jingpyllait ïa la ki mraw

(Eks. 21:1-11)

12 # Eks. 21:2-11; Leb. 25:39-46. “Te lada la die ha me ïa u para jong me, u Hebru, shynrang ne kynthei, bad lada u la shakri ïa me, hynriew snem; te ha ka snem ka bahynñiew, men pyllait noh sngewbha ïa u na me. 13Bad haba me phah noh ïa u na me, wat phah noh ïa u suda: 14To men ai kylluid sngewbha ha u, na ki jingri jong me, bad na ka thiar jong me, bad na ka Waiñ jong me: bad na kiei kiei ruh da kiba U Trai uba U Blei jong me u la kyrkhu ïa me, to men ai ha u. 15Bad men kynmaw, ba me hi me la ju long u mraw ha ka ri Ijipt, bad ba U Trai uba U Blei jong me u la siewspah ïa me: namar kata, nga hukum ha me ïa kane mynta. 16Kan jia te, lada un ong ha me, ‘Ngan ym leit noh na me;’ namar ba u ieit ïa me bad ïa ka ïing jong me, naba u la suk ryngkat bad me; 17te men shim da u jingsam, bad to sam lyngba ïa ka shkor jong u ha ka jingkhang, te un ïoh long u shakri jong me ha la ka rta. Ha ka shakri kynthei jong me ruh, men leh kumjuh. 18Wat bynnud haba me pyllait noh ïa u na me; namar u la pynmyntoi ha me ar shah, ban ïa u shakri uba bylla keiñ, haba u la shakri ïa me, hynriew snem: te U Trai uba U Blei jong me un kyrkhu ïa me ha kaei kaei baroh ba me leh.

Kaba pynkyntang ïa kiba la kha nyngkong

19 # Eks. 13:11,12; 22:30; 34:19; Jkñ. 18:17,18. “Ïa ki shynrang baroh ba la kha nyngkong na ki masi jong me, bad na ki blang jong me, men pynkyntang ha U Trai uba U Blei jong me; wat pyntrei ïa uba kha nyngkong jong ki masi dab jong me, lymne wat ot shñiuh ïa uba kha nyngkong na ki langbrot jong me. 20Men ïoh bam ïa u ha khmat U Trai uba U Blei jong me man la ka snem ha kata ka jaka ïa kaba U Trai un jied, ma me bad la ka ïing keiñ. 21Lada don ha u kano kano ruh ka jingduna sniew, kum ka ba-dkoh, lane bamatlah, kaei kaei ruh ka jingduna basniew, wat kñia ainguh ïa u ha U Trai uba U Blei jong me. 22Men ïoh bam ïa uta hapoh ki khyrdop jong me: u bymkhuid, bad u bakhuid, kin bam ïa u kumjuh, kum ïa u 'keirang, bad kum ïa ka khiat. 23#Jen. 9:4; Leb. 7:26,27; 17:10-14; 19:26; Deu. 12:16,23.Tang ba men ym ïoh bam ïa ka snam jong u; to men theh noh ïa ka ha ka khyndew kum ka um.

Currently Selected:

DEUTERONOMI 15: KHB

Highlight

Copy

Compare