DEUTERONOMI 13

1“Lada u nongïathuhlypa u la mih hapdeng jong phi, lane u nongphohsniew ïa ki jingphohsniew, bad u ai ha me ka dak, lane ka jingphylla, 2bad lada kata ka dak, lane kata ka jingphylla, ka urlong, ïa kaba u la kren ha me, u da ong, ‘To ïa, ngin ïamane ïa kiwei pat ki blei,’ ïa kiba mem ju tip, ‘bad to ngin ïashakri ïa ki;’ 3to wat shahshkor me ïa ki ktien jong uta u nongïathuhlypa, lane ïa uta u nongphohsniew ïa ki jingphohsniew, namar U Trai uba U Blei jong phi u tynjuh ïa phi, ïa ka ban tip la phi ieit ne em ïa U Trai uba U Blei jong phi da la ka dohnud baroh, bad da la ka mynsiem baroh. 4To phin ïabud ïa U Trai uba U Blei jong phi, bad phin sheptieng ïa u, bad phin sumar ïa ki hukum jong u, bad phin kohnguh ruh ïa ka ktien jong u, bad phin ïashakri ïa u, bad phin ïaineh ruh ha u. 5Ïa uta u nongïathuhlypa, lane ïa uta u nongphohsniew ïa ki jingphohsniew, te ka dei ban pynïap noh; namar ba u la kren ïa ka ban pynphai noh ïa phi na U Trai uba U Blei jong phi, uba la wallam noh ïa phi na ka ri Ijipt, bad uba la pyllait noh ïa phi na ka ïing ka jinglongmraw, ïa ka ban ñiat noh ïa me na kata ka lynti na kaba U Trai uba U Blei jong me u la hukum ïa me ban ïaid. Kumta keiñ, men pynduh noh ïa kata ka basniew napdeng jong me.

6“Lada u para jong me, uba u khun ka kmie jong me, lane u khun jong me, lane ka khun jong me, lane ka tnga bashong lem jong me, lane u lok jong me, uba long kum ka mynsiem jong me hi, u ïapah ïa me ha kaba rieh, u da ong, ‘Ïa ngin ïaleit shakri ïa kiwei pat ki blei,’ ïa kiba mem ju ithuh, ma me, lymne ki kpa jong me; 7kita keiñ, kiba na ki blei jong kita kiba sawdong ïa phi, ba hajan ïa me, ne ba jngai na me, naduh ka bakut jong ka pyrthei haduh ka bakut pat jong ka pyrthei; 8wat kohnguh me ïa u, lymne wat shahshkor ïa u; lymne wat ai ba ka khmat jong me kan isynei ïa u, lymne me wat riej ïa u, lymne buhrieh ïa u: 9hynrei shisha men pynïap noh ïa u; ka kti jong me kan long nyngkong ha u ïa ka ban pynïap noh ïa u, te hadien kata, sa ka kti u paidbah baroh. 10Bad men lynthem ïa u da ki maw, ba un ïap keiñ; namar ba u la thew ban ñiat noh ïa me na U Trai uba U Blei jong me, uba la wallam noh ïa me na ka ri Ijipt, na ka ïing ka jinglongmraw keiñ. 11Ki Israel baroh te kin ïohsngew, bad kin ïasheptieng, bad kin ym leh shuh ïa ka bymman kat kane, hapdeng jong phi.

12“Lada men ïohsngew shaphang kawei na ki nongbah jong me, ïa kiba U Trai uba U Blei jong me u la ai ha me, ban shongneh ha ki, da kaba ong, 13‘Ba don ki briew, ki khun u Belial, ki la ïaleit mih noh napdeng jong phi, bad ki la ïa-pynkynriah noh ïa ki trai-shnong ka nongbah jong ki, da kaba ong, “Ïa ngin ïaleit shakri ïa kiwei pat ki blei,” ’ ïa kiba phim ju la ithuh keiñ; 14te men wad, bad men tohkit, bad men kylli biang biang ruh; te ha khmih, lada ka long kaba shisha, bad ka skhem ruh, ba la leh kaba ijli kat kane, hapdeng jong phi; 15shisha men pynduh ïa ki trai-shnong kata ka nongbah, da ka syrti waitlam, to da pynduh noh khoit ïa ka, bad ïa kiei kiei baroh kiba don ha ka, bad ïa ki jingri jong ka ruh, da ka syrti waitlam. 16Bad to men ïalum lang ïa ka jinglute jong ka baroh hapdeng ka lynti shnong jong ka, bad men thang ruh da ka ding ïa kata ka nongbah, bad ïa ka jinglute jong ka baroh phar, ïa U Trai uba U Blei jong me: te kan long ïa kaba la iehnoh ha la ka rta, yn ym ïoh tei shuh ïa ka keiñ. 17Te kan ym snoh ei ei ruh na kata ïa kaba la tim, ha ka kti jong me: ba U Trai un phai noh na kaba shit lep ka jingbitar jong u, bad un pyni ïa ka jingisynei ïa me, bad un isynei ïa me, bad un pynroi ruh ïa me, kumba u la smai ha ki kpa jong me; 18ynda men shahshkor ïa ka ktien U Trai uba U Blei jong me, da kaba sumar ïa ki hukum jong u baroh, ïa kiba nga hukum ïa me ha kane ka sngi, da kaba ïai-leh ïa kata kaba dei ha khmat U Trai uba U Blei jong me.

Currently Selected:

DEUTERONOMI 13: KHB

Highlight

Copy

Compare