DEUTERONOMI 12

Ka jaka mane blei tang kawei

1 # Eks. 20:24. “Kine ki long kita ki hukum bad ki jingbishar, ïa kiba phin sumar ban leh ha kata ka ri ïa kaba U Trai, uba U Blei ki kpa jong phi, u ai ha phi ban ïoh ïa ka, baroh ki sngi katba phin im ha ka pyrthei. 2Phin pynjot noh khoit ïa kita ki jaka baroh, ha kiba kita ki jaid bynriew ïa kiba phin sa ïoh, ki la ïashakri ïa ki blei jong ki, ha ki lum bah bajrong, bad ha ki lum rit, bad hapoh ki dieng bajyrngam baroh: 3#Deu. 7:5.to phin pynpra ïa ki duwan jong ki, bad phin ïa-pynkheiñ ïa ki mawblei jong ki, bad phin ïathang ïa ki 'law kyntang jong ki da ka ding; bad phin ïa-pynkyllon ïa ki bleithaw ba la mutdur jong ki; bad phin ïa-pynduh noh ïa ki kyrteng jong ki na kata ka jaka. 4To phin ym leh kumta, ïa U Trai uba U Blei jong phi. 5Hynrei, phin ïawad ïa kata ka jaka, ha kaba U Trai uba U Blei jong phi un jied na ki jaid jong phi baroh, ïa ka ban buh ïa la ka kyrteng hangta, ïa ka jaka shongneh jong u keiñ, bad hangta, phin wan ruh: 6Bad hangta, phin ïawallam ïa ki jingainguh thang jong phi, bad ïa ki jingkñia jong phi, bad ïa kiba shiphew jong phi, bad ïa ki jingainguh kyntiew ka kti jong phi, bad ïa ki jingkular skhem jong phi, bad ïa ki jingainguh basngewbha jong phi, bad ïa kiba kha nyngkong na ki masi jong phi, bad na ki langbrot jong phi ruh: 7Hangta ruh, phin ïabam ha khmat U Trai uba U Blei jong phi, bad phin ïalehkmen ha kiei kiei baroh kiba phin ktah da la ka kti, ma phi bad ki ba-ha-ïing jong phi, ha kiba U Trai uba U Blei jong me u la kyrkhu ïa me. 8Phin ym leh katba kum ïa kiei kiei baroh ba ngi leh hangne ha kane ka sngi, uwei uwei baroh keiñ ïa kaei kaei kat kaba u imat dei hi: 9naba phim pat ïawan poi ha kata ka jingshongthait, bad ha kata ka bynta pateng, ïa kaba U Trai uba U Blei jong phi u ai ha phi. 10Hynrei, ynda phi la leit sha shiliang ka Jordan, bad ba phi la ïashongneh ha kata ka ri ïa kaba U Trai uba U Blei jong phi u ai ha phi ban ïoh pateng, bad haba u la ai ha phi ïa ka jingshongthait na ki nongshun jong phi baroh sawdong kylleng, ba kumta keiñ, phi ïashongneh ha kaba suk; 11ynda kumta, kan long ka jaka ïa kaba U Trai uba U Blei jong phi un jied ïa ka ban pynshong ïa la ka kyrteng hangta, shata keiñ, phin wallam ïa baroh ba nga hukum ïa phi: ïa ki jingainguh thang jong phi, bad ïa ki jingkñia jong phi, ïa kiba shiphew jong phi, bad ïa ka jingainguh kyntiew jong ka kti jong phi, bad ïa ki jingkular skhem ba jied bha baroh jong phi ïa kiba phi kular ha U Trai: 12bad phin ïalehkmen ha khmat U Trai uba U Blei jong phi, ma phi, bad ki khun shynrang jong phi, bad ki khun kynthei jong phi, bad ki shakri jong phi shynrang bad kynthei, bad u Lebi ruh uba hapoh ki khyrdop jong phi, namar ba um don ka bynta lane ka jingïoh pateng lem bad phi. 13To sumar biang ïa lade ba men ym kñia ainguh ïa la ki jingkñia ainguh thang ha kano kano ka jaka baroh ba me ibit hi: 14hynrei, tang ha kata ka jaka ïa kaba U Trai un sa jied ha kawei na ki jaid jong me, hangta keiñ, men kñia ainguh ïa la ki jingkñia ainguh thang, bad hangta ruh, men leh ïa kita baroh ba nga hukum ïa me.

15“La kumta ruh, me lah ban pynïap#12:15 pynïap: Hangne ka mut ka jingshoh doh. bad bam doh ha la ki khyrdop baroh, kat kaei kaei ruh ba ka dohnud jong me ka kwah, katba kum ka jingkyrkhu U Trai uba U Blei jong me ïa kaba u la ai ha me: u bymkhuid, bad u bakhuid keiñ, u lah ban bam na ka, kumba na u bthong, bad kumba na u 'keirang. 16#Jen. 9:4; Leb. 7:26,27; 17:10-14; 19:26; Deu. 15:23.Tang ba phin ym bam ïa ka snam; to phin theh ïa ka ha khyndew kum ka um. 17Kam dei ïa me, ban bam hapoh ki khyrdop jong me, ïa kiba shiphew na u Kew jong me, lane na ka Waiñ jong me, lane na ka umphniang jong me, lane ïa kiba la kha nyngkong jong ki masi jong me, lane na ki jong ki langbrot jong me, lane ïa ki jingkular skhem jong me baroh ïa kiba me kular, lane ïa ki jingainguh sngewbha jong me, lane ïa ki jingainguh kyntiew jong ka kti jong me: 18hynrei, dei ba men bam ïa ki ha khmat U Trai uba U Blei jong me, ha kata ka jaka ïa kaba U Trai uba U Blei jong me un sa jied, ma me, bad u khun jong me, bad ka khun jong me, bad u shakri jong me, bad ka shakri jong me, lem bad u Lebi ruh uba hapoh ki khyrdop jong me: bad men ïoh leh kmen ha khmat U Trai uba U Blei jong me, ha kiei kiei baroh kiba men ktah da la ki kti. 19To sumar biang ïa lade ba men ym klet ïa u Lebi katba me dang im ha ka pyrthei.

20“Haba U Trai uba U Blei jong me un pynïar ïa ka pud jong me, kumba u la kular ïa me, bad ba men ong, ‘Ngan bam doh’, namar ba ka dohnud jong me ka kwah eh ban bam doh; me lah ban bam doh, ïa kaei kaei ruh katba ka dohnud jong me ka kwah eh. 21Lada kata ka jaka ïa kaba U Trai uba U Blei jong me u la jied ban buh ïa la ka kyrteng ha ka, ka long kham jngai na me, te kumta, men ïoh pynïap na ki masi jong me, bad na ki langbrot jong me, ïa kiba U Trai u la ai ha me, kumba nga la hukum ïa me, bad men ïoh bam ha la ki khyrdop ïa kaei kaei ruh, katba ka dohnud jong me ka kwah eh. 22Kumba bam ïa u bthong, bad ïa u 'keirang, kumta keiñ, men ïoh bam ïa ki: u bymkhuid, bad u bakhuid un ïoh bam na ki kumjuh. 23#Leb. 17:10-14.Tang ba men sumar bha ban ym bam ïa ka snam: namar ka snam ka long ka jingim; kam dei keiñ ïa me, ban bam ïa ka jingim lem bad ka doh. 24Men ym ïoh bam ïa ka; to men theh noh ïa ka ha khyndew kum ka um. 25Men ym ïoh bam ïa ka keiñ; ba kan ïoh long bha ïa me, bad ïa ki khun jong me hadien jong me, haba men leh hok ha khmat U Trai. 26Tang ïa kiba la kyntang jong me kiba me don, bad ki jingkular skhem jong me, ïa kita men shim, bad men leit sha kata ka jaka ïa kaba U Trai un jied: 27Bad men ai ïa la ki jingkñia ainguh thang, ïa ka doh bad ïa ka snam, halor ka duwan U Trai uba U Blei jong me: bad ïa kata ka snam jong ki jingkñia jong me yn theh noh halor ka duwan U Trai uba U Blei jong me, ïa ka doh te men ïoh bam. 28To rakhe, bad to sngap ruh ïa kine ki ktien baroh ïa kiba nga hukum ïa me, ba kan long bha ïa me, bad ïa ki khun jong me hadien jong me ha la ka rta, haba me leh ïa ka babha bad kaba dei ha khmat U Trai uba U Blei jong me.

Ka jingmaham pyrshah ïa kaba mane bleithaw

29 # Eks. 23:24; 34:12-14; Jkñ. 33:52. “Ynda U Trai uba U Blei jong me u la pynjot noh ïa kita ki jaid bynriew na khmat jong me, sha kiba me leit ban ïoh ïa ki, bad me bud pateng ïa ki, bad me shongneh ha ka ri jong ki; 30to sumar ïa lade ba ïoh yn riam ïa me ban bud ïa ki, hadien ba la pynjot noh ïa ki na khmat jong me; bad ba men ym ïakylli shuh shaphang ki blei jong ki, da kaba ong, ‘Kumno kine ki jaid bynriew ki la ïashakri ïa ki blei jong ki? kumta keiñ, ma nga ruh ngan leh kumjuh.’ 31Men ym leh kumta, ïa U Trai uba U Blei jong me: namar ïa ka jingijli baroh ïa kaba U Trai u isih, ki la leh ha ki blei jong ki; namar wat ïa ki khun jong ki, shynrang bad kynthei, ki la ïathang ha ka ding ha ki blei jong ki.

32 # Deu. 4:2; Jpw. 22:18,19. “Ïa ka ktien baroh ba nga hukum ïa phi, to sumar ban leh ïa ka: men ym pyntam ha ka, lymne pynduna na ka.

Currently Selected:

DEUTERONOMI 12: KHB

Highlight

Copy

Compare