DEUTERONOMI 11

Ka jingkhraw jong U Blei

1“To men ieit, namar kata, ïa U Trai uba U Blei jong me, bad to sumar ïa ka kam jong u, bad ïa ki aiñ jong u, bad ïa ki jingbishar jong u, bad ïa ki hukum jong u, ha la ka sngi. 2To tip ma phi ha kane ka sngi: naba ngam kren bad ki khun jong phi, ki bym shym la tip, bad ki bym shym la ïohi ïa ka jingsneng saja jong U Trai uba U Blei jong phi, ïa ka jingkhraw jong u, ïa ka kti badonbor jong u, bad ïa ka ksang'ti ba la kner jong u, 3#Eks. 7:8—12:13.bad ïa ki kam phylla jong u, bad ïa ki jingleh jong u, ïa kiba u la leh ha ka ri Ijipt ha u Pharaoh u syiem ka ri Ijipt, bad ha ka ri jong u baroh; 4#Eks. 14:28.ïa kaba u la leh ruh ha u paidïapom jong ka ri Ijipt, ha ki kulai jong ki, bad ha ki kali ïapom jong ki; kumno u la pyntap lup ïa ki da ka um ka Duriaw Basaw katba ki dang ïabeh hadien jong phi, bad kumno ruh U Trai u la pynjot noh ïa ki haduh kane ka sngi; 5bad ïa kaei ruh ba u la leh ïa phi ha kata ka ri khlaw, haduh ba phi la ïapoi sha kane ka jaka; 6#Jkñ. 16:31,32.bad ïa kaei ruh de ba u la leh ha u Dathan, bad ha u Abiram, ki khun shynrang u Eliab, u khun u Reuben; kumno ba ka khyndew ka la ang ïa la ka shyntur, bad ka la nguid tylli ïa ki, lem bad ki ba-ha-ïing jong ki, bad ïa ki ïingjaiñ jong ki, bad ïa ki spah baroh katba ki la don, hapdeng ki Israel baroh: 7hynrei, ki khmat jong phi ki la ïohi ïa kita ki jingleh bakhraw baroh jong U Trai ïa kiba u la leh keiñ.

Ki jingkyrkhu ka ri ka jingkular

8“Namar kata, to phin sumar ïa ki hukum baroh ïa kiba nga hukum ïa phi ha kane ka sngi, ba phin long kiba khlaiñ, bad ba phin ïoh ïaleit hapoh ban ïoh ïa kata ka ri, sha kaba phin sa ïaleit ban ïoh ïa ka; 9bad ba phi lah ban pynslem ïa ki sngi jong phi ha kata ka ri, ïa kaba U Trai u la smai ha ki kpa jong phi ban ai ha ki, bad ha u symbai jong ki, ka ri kaba tuid da ka dud bad ka ngap keiñ. 10Namar kata ka ri, sha kaba me leit ban ïoh ïa ka, kam long kum ka ri Ijipt, ha kaba phi la wan noh, ha kaba me la bet ïa la u symbai, bad me la ai um da la ka sla'jat, kum ïa ka kper jhur: 11hynrei, kata ka ri, sha kaba phin ïaleit ban ïoh ïa ka, ka long ka ri lum, bad ka ri them, kaba dih um na u slap bneng: 12ka ri keiñ ïa kaba U Trai uba U Blei jong me u sumar; ki khmat jong U Trai uba U Blei jong me, ki ïadon halor jong ka ha la ka sngi, naduh kaba sdang ka snem haduh ka bakut jong ka ruh.

13 # Leb. 26:3-5; Deu. 7:12-16; 28:1-14. “Bad kan jia, lada phin shahshkor biang biang ruh ïa ki hukum jong nga, ïa kiba nga hukum ïa phi ha kane ka sngi, ban ieit ïa U Trai uba U Blei jong phi, bad ban shakri ruh ïa u da la ka dohnud baroh, bad da la ka mynsiem baroh, 14ba ngan ai ïa u slap ha ka ri jong phi ha la ka aïom ba bit, ïa u slap u banyngkong, bad u bakhatduh, khnang ba men ïoh ïalum ïa la u Kew, bad ïa la ka Waiñ, bad ïa la ka umphniang. 15Bad ngan pynmih phlang ha ki lyngkha jong me ïa ki jingri jong me, ba men dup ïoh bam bad ban kdang ruh. 16To sumar ïa lade, ba ïoh yn shukor ïa ka dohnud jong phi, bad ba phi ïaphai noh lyndet, bad shakri ïa kiwei pat ki blei, bad mane ïa ki; 17kumta te, ka jingbitar U Trai kan meh pyrshah ïa phi, bad un khang khop ïa ka bneng, ba yn ym don slap shuh, bad ba ka khyndew kan ym sei ïa la u soh shuh; bad phin jot noh shen na kata ka ri babha ïa kaba U Trai u ai ha me.

18 # Deu. 6:6-9. “Namar kata, to buh khop ïa kine ki ktien jong nga ha ka dohnud jong phi, bad ha ka mynsiem jong phi, bad to teh ïa ki kum ka dak ha ka kti jong phi, bad kin long kum ki jingdeng shyllangmat hapdeng ki khmat jong phi. 19To phin ïaihikai ruh de ïa ki ha ki khun jong phi, da kaba kren shaphang jong ki, haba me shong ha la ïing, bad haba me ïaid ha lynti, bad haba me thiah, bad haba me khie ruh. 20Bad men thoh ïa ki ha ki shawkad jingkhang ka ïing jong me, bad ha ki khyrdop jong me: 21ba ki sngi jong phi kin man bun, bad ki sngi ki khun jong phi ruh, ha kata ka ri ïa kaba U Trai u la smai ha ki kpa jong phi ban ai ha ki, kum ki sngi ka bneng keiñ halor ka khyndew. 22Namar lada phin sumar biang biang ruh ïa kine ki hukum baroh ïa kiba nga hukum ïa phi, ban leh ïa ki; ban ieit ïa U Trai uba U Blei jong phi, ban ïaid ha ki lynti jong u baroh, bad ban ïaineh skhem ha u; 23ynda kumta, U Trai un beh noh ïa kine ki jaid bynriew baroh na khmat jong phi, bad phin ïoh ruh ïa ki jaid bynriew kiba kham khraw, bad ba kham don bor ban ïa phi hi. 24#Jos. 1:3-5.Ka jaka baroh ha kaba kin ïuh ki poh'jat jong phi kan long ka jong phi: naduh ka ri khlaw, bad u Lebanon, naduh kata ka wah, ka wah Ïuphratis keiñ, haduh ka bakut tam eh ka duriaw, kan long ki pud jong phi keiñ. 25Yn ym don briew uba lah ban ïeng ha khmat jong phi: U Trai uba U Blei jong phi un buh ïa ka jingsheptieng ïa phi, bad ïa ka jingsngewshyrkhei ïa phi halor kata ka ri baroh ha kaba phin ïuh, kumba u la ong ha phi.

26“Ha khmih, nga buh ha khmat jong phi ha kane ka sngi, ïa ka jingkyrkhu, bad ïa ka jingtim; 27ïa ka jingkyrkhu keiñ, lada phin kohnguh ïa ki hukum U Trai uba U Blei jong phi, ïa kiba nga hukum ïa phi ha kane ka sngi; 28bad ïa ka jingtim keiñ, lada phim kohnguh ïa ki hukum U Trai uba U Blei jong phi, hynrei, phin phai noh lyndet na kata ka lynti ïa kaba nga hukum ïa phi ha kane ka sngi, ïa ka ban leit hadien kiwei pat ki blei, ïa kiba phim ju la tip. 29#Deu. 27:11-14; Jos. 8:33-35.Kan jia te, ynda U Trai U Blei jong me u la wallam ïa me ha kata ka ri sha kaba me leit ban ïoh ïa ka, ba men buh ïa kata ka jingkyrkhu ha u lum Gerisim, bad ïa kata ka jingtim ha u lum Ebal. 30Kine kim don mo sha shiliang ka Jordan, shaphang kaba sep ka sngi, ha ka ri ki Kanaan kiba shong sah ha kata ka pyntha, kaba marpyrshah ka Gilgal, hajan ki madan Moreh? 31Namar phin ïaleit sha shiliang ka Jordan, ïa ka ban leit ban ïoh ïa kata ka ri, ïa kaba U Trai uba U Blei jong phi u ai ha phi, bad phin ïoh ïa ka, bad phin ïashongneh ha ka ruh. 32To sumar te ïa ka ban leh ïa kita ki hukum, bad ïa ki jingbishar baroh ïa kiba nga buh ha khmat jong phi ha kane ka sngi.

Currently Selected:

DEUTERONOMI 11: KHB

Highlight

Copy

Compare