DEUTERONOMI 1

U Moses u ïathuhkhana lyngkot ïa ka jingkular U Blei ha Horeb

1Kine ki long kita ki ktien ïa kiba u Moses u la kren ha ki Israel baroh, ha ka liang shane ka Jordan ha ka ri khlaw, ha kata ka madan, marpyrshah ïa ka Suph, hapdeng ka Paran, bad ka Tophel, bad ka Laban, bad ka Haseroth, bad ka Disahab de. 2Ka long khatwei sngi lynti naduh Horeb na ka lynti u lum Seir haduh Kadesh-barnea. 3Ka la jia te, ha ka basawphew snem, ha ka bakhatwei bnai#1:3 ha ka bakhatwei bnai: Ha u bnai bakhatwei., ha ka sngi ka banyngkong jong uta u bnai, ba u Moses u la kren ha ki khun Israel, ïa baroh katba U Trai u la lah hukum ïa u ban ong ha ki; 4#Jkñ. 21:21-30; 21:31-35.hadien ba u la lah pynïap ïa u Sihon u syiem ki Amor, uba la shong sah ha Heshbon, bad ïa u Og u syiem ka Bashan, uba la shong sah ha Ashtaroth ha Edrei: 5ha ka liang shane ka Jordan ha ka ri Moab, u la sdang u Moses ban pynpaw ïa kane ka hukum, u da ong, 6“U Trai uba U Blei jong ngi u la kren ha ngi ha Horeb, u da ong, ‘La biang katta ba phi la shong ha une u lum: 7to phai phi, to nang ïaid ruh, bad to leit sha u lum ki Amor, bad sha ki jaka baroh kiba marjan ïa u, ha kata ka madan, ha kita ki lum, bad ha kata ka them, bad shaphang shathie ruh, bad sharud ka duriaw, sha ka ri ki Kanaan, bad sha u Lebanon, sha kata ka wah ka bakhraw, ka wah Ïuphratis keiñ. 8Ha khmih, nga la ai ïa kata ka ri ha khmat jong phi: to leit, to shimti ruh ïa kata ka ri ïa kaba U Trai u la smai ha ki kpa jong phi, ha u Abraham, ha u Isaak, bad ha u Jakob de, ban ai ha ki, bad ha ki symbai jong ki hadien jong ki.’

Kaba thung ïa ki nongsynshar

(Eks. 18:13-27)

9 # Jkñ. 11:10-25. “Te nga la kren ha phi ha kata ka por, nga da ong, ‘Nga ngam lah marwei ban bah ïa phi: 10U Trai U Blei jong phi u la pynroi ïa phi, te ha khmih, mynta phi long paidbah kat ki khlur bneng. 11To ai ba U Trai U Blei ki kpa jong phi, un pynroi ïa phi shi hajar shah nalor kaba phi long mynta, bad un kyrkhu ruh ïa phi, kumba u la kular ïa phi! 12Kumno nga lah tang marwei hi ban bah ïa ka jingkhuslai jong phi, bad ïa ka jingkit jong phi, bad ïa ka jingïakajia jong phi ruh? 13To jied phi ïa ki briew ki bastad, bad ki bashemphang, bad kiba donnam hapdeng ki jaid jong phi, bad ngan pynlong ïa ki, ki nongsynshar halor jong phi.’ 14Te phi la ïathuh ha nga, phi la ïa-ong ruh, ‘Kane ïa kaba phi la kren ka babha ban leh.’ 15Kumta, nga la shim ïa ki rangbah ki jaid jong phi, ki briew ki bastad, bad kiba donnam, bad nga la pynlong nongbishar ïa ki halor jong phi, ki rangbah halor ki hajar, bad ki rangbah halor ki spah, bad ki rangbah halor ki sanphew, bad ki rangbah halor ki shiphew, bad ki nongsynshar hapdeng ki jaid jong phi. 16#Eks. 18:25,26.Bad nga la hukum skhem ïa ki nongbishar jong phi ha kata ka por, da kaba ong, ‘To sngap ïa ki daw hapdeng ki para jong phi, bad to bishar hok ruh hapdeng u briew bad la u para, bad u nongwei uba don lem bad u. 17Wat ñiew shiliang khmat ha ka jingbishar; hynrei, phin sngap ïa u barit kum ïa u bakhraw; phin ym sheptieng ïa ka khmat u briew; namar kata ka jingbishar ka long ka jong U Blei: te ïa ka kam kaba kham eh ïa phi to wallam ha nga, bad nga ngan sngap ïa kata keiñ.’ 18Bad nga la hukum ïa phi ha kata ka por ïa kiei kiei baroh ïa kiba phi dei ban leh.

Kaba phah ïa ki nongsyntiat ban khmih ïa ka ri

(Jkñ. 13:1-33)

19“Te ynda ngi la ïamih noh na Horeb, ngi la ïaid lyngba ïa kata ka ri khlaw baroh kaba khraw, bad kaba itieng ïa kaba phi la ïohi, ha kata ka lynti u lum ki Amor, kumba U Trai uba U Blei jong ngi u la hukum ïa ngi; bad ngi la ïawan poi ha Kadesh-barnea. 20Te nga la ong ha phi, ‘Phi la ïawan poi sha u lum ki Amor, ïa kaba U Trai U Blei jong ngi u ai ha ngi. 21Ha khmih, U Trai U Blei jong me u la aiti ïa kata ka ri ha khmat jong me: to leit kiew, to shimti ruh ïa ka, kumba U Trai U Blei ki kpa jong me u la ong ha me; wat sheptieng, lymne duh jingkyrmen.’ 22#Jkñ. 13:1—14:45; 32:8-13.Te phi baroh phi la ïawan sha nga, bad phi la ong, ‘To ngin ïaphah ki briew ha shuwa jong ngi, bad kin ïajngoh ïa kata ka ri na ka bynta jong ngi, bad kin wan ïathuh pat sha ngi na kano ka lynti ka dei ba ngin ïaleit kiew, bad shaphang ki nongbah ruh sha kiba ngin sa wan.’ 23Kata ka ktien te ka la pynsngewbha eh ïa nga: bad nga la jied na phi khat-ar ngut ki rangbah, uwei uwei shi jaid. 24Te haba kita ki la ïaleit phai, bad ba ki la ïaleit kiew sha uta u lum, bad ki la ïapoi sha ka them Eshkol, ki la ïajngoh ïa ka. 25Ki la shim ruh na u soh jong kata ka ri ha la ki kti, bad ki la ïawallam arsut ha ngi, bad ki la wan ïathuh pat ha ngi, bad ki la ong, ‘Kata ka ri ka long ka babha ïa kaba U Trai U Blei jong ngi u ai ha ngi.’

26 # Deu. 9:23; Heb. 3:16. “Pynban, phim treh ban ïaleit kiew, hynrei, phi la ïaleh pyrshah ïa ka hukum jong U Trai U Blei jong phi: 27bad phi la ïakhñium ruh ha la ki ïingjaiñ, bad phi la ïa-ong, ‘Namar ba U Trai u la shun ïa ngi keiñ, u la ïalam noh ïa ngi na ka ri Ijipt, ban ai ïa ngi ha ka kti ki Amor, ïa ka ban pynjot noh ïa ngi. 28Ngin ïaleit kiew shano? ki para jong ngi ki la ïa-pyntieng ïa ngi, da kaba ong, “Kita ki briew ki kham heh, bad ki kham jrong rynïeng ban ïa ngi; ki nongbah ruh kiba khraw bad ba la tei kynroh haduh ka bneng; nalor kane ruh, ngi la ïohi ïa ki khun shynrang ki Anak hangta.” ’ 29Te nga la ong ha phi, ‘Wat sngewshyrkhei, lymne wat tieng ïa ki. 30U Trai uba U Blei jong phi uba ïaid ha shuwa jong phi, un ïaleh thma ma u na ka bynta jong phi, katba kum kata baroh kaba u la leh na ka bynta jong phi ha ka ri Ijipt ha khmat jong phi; 31#Ki Kam. 13:18.bad ha kata ka ri khlaw ruh, ha kaba phi la ïohi kumno ba U Trai uba U Blei jong me u la bah ïa me, kumba u briew u bah ïa la u khun, ha kata ka lynti baroh ba phi la ïaid, haduh ba phi la ïawan poi sha kane ka jaka.’ 32#Heb. 3:19.Pynban, ha kane ruh phim shym la ngeit ïa U Trai uba U Blei jong phi, 33uba la ïaid ha shuwa jong phi ha kata ka lynti, ïa ka ban wad jaka ïa phi, ban pynshong dara ïa phi, mynmiet ha ka ding ïa ka ban pyni ïa phi da kano ka lynti ba phin ïaid, bad mynsngi ha u lyoh.

Shaphang ka jingbitar U Blei ïa ki Israel

(Jkñ. 14:20-35)

34 # Heb. 3:18. “U Trai te u la ïohsngew ïa ka jingsawa ki ktien jong phi, bad u la bitar eh, bad u la smai ruh, u da ong, 35‘Da shisha keiñ uwei na kine ki briew jong kane ka pateng bynriew bymman, un ym ïohi ïa kata ka ri ka babha, kaba nga la smai ban ai ïa ka ha ki kpa jong phi, 36hynrei, tang u Kaleb u khun u Jephunneh, u keiñ un ïohi ïa ka; bad ha u ruh ngan ai ïa kata ka ri kaba u la ïaid ha ka, bad ha ki khun jong u de: namar u la bud biang ïa U Trai.’ 37U Trai u la bitar ïa nga ruh na ka bynta jong phi, u da ong, ‘Ma me ruh men ym ïoh leit shapoh shata: 38u Joshua u khun u Nun, uba ïeng ha khmat jong me, u keiñ, un ïoh leit shapoh shata: to pynshlur ïa u; naba ma u un pynïoh kynti ïa ka ha ki Israel. 39Ki khun rit jong phi ruh de, kiba phi la ong ba kin long ka jinglute, bad ki khun jong phi ruh, kiba ha kane ka sngi kim tip ïa ka babha lymne ïa ka basniew, kita keiñ, kin ïoh leit shapoh shata, bad ha ki ngan aiti ruh ïa ka, bad kin ïoh ïa ka. 40Hynrei, ma phi, to phin phai, to ïaid ruh sha kata ka ri khlaw da ka lynti ka Duriaw Basaw.’

Ka jingshahjop ki Israel ha Hormah

(Jkñ. 14:39-45)

41“Phi te phi la ïathuh, bad phi la ïa-ong ha nga, ‘Ngi la ïaleh pop pyrshah ïa U Trai, ngin ïaleit kiew ban ïaleh thma, katba kum kata baroh ïa kaba U Trai uba U Blei jong ngi u la hukum ïa ngi.’ Te haba phi la kieng uwei uwei baroh ïa la ki atiar ïapom, phi la kloi ban ïaleit kiew sha uta u lum. 42Te U Trai u la ong ha nga, ‘To ong ha ki, wat leit kiew, lymne wat ïaleh thma; naba nga ngam don hapdeng jong phi; ïoh ba yn jop ïa phi ha khmat ki nongshun jong phi.’ 43Kumta, nga la kren ha phi, pleng phi phim shym la sngap; hynrei, phi la ïaleh pyrshah ïa ka hukum U Trai, te da kaba sngewmeng, phi la ïaleit kiew ruh sha uta u lum. 44Te kita ki Amor, kiba la ïashong sah ha uta u lum, ki la ïamih noh pyrshah ïa phi, bad ki la ïabeh ïa phi, kumba beh ki ngap, bad ki la ïa-pynjot thiaw ïa phi ha Seir, haduh Hormah keiñ. 45Te ynda phi la phai pat, phi la ïam ha khmat U Trai; hynrei, U Trai um sngew ïa ka jinglynñiar jong phi, lymne shahshkor ïa phi. 46Kumta, phi la ïaisah ha Kadesh bun sngi, katba kum kita ki sngi ba phi la ïaisah hangta.

Currently Selected:

DEUTERONOMI 1: KHB

Highlight

Copy

Compare