KI KAM 9

Ka jingpynkylla ïa u Saul

(Ki Kam. 22:6-16; 26:12-18)

1 # Ki Kam. 22:4-16; 26:9-18. Te u Saul, haba u dang pyrsad ki jingbyrngem bad ka jingpynïap ïa ki synran jong U Trai, u la leit ha u rangbah lyngdoh, 2bad u la pan na u ki shithi sha Damaskos sha ki synagog, ba lada un shem ïa kino kino ruh kiba na kane “ka Lynti”, la ki shynrang ne ki kynthei, un ïoh leit lam ïa ki ba la khum sha Jerusalem. 3Te katba u dang leit, ka la jia ba u la poi hajan Damaskos, bad kyndit kyndit la tyngshaiñ lep sawdong ïa u ka jingshai na bneng: 4te u la kyllon kram ha khyndew, bad u la ïohsngew ïa ka ktien kaba ong ha u, “A Saul, Saul, balei me pynshitombeiñ ïa nga?” 5U te u la ong, “Me long uei, A Trai?” Te U la ong, “Nga long U Jisu, ïa uba me pynshitombeiñ: ka long kaba eh ïa me ban kynjat pyrshah ïa ki dieng tyndung.” 6Haba u la khynñiuh bad la sngewmaïan, u la ong, “A Trai, aïu me mon ïa nga ban leh?” Ynda kumta U Trai u la ong ha u, “To ïeng, khie leit ruh shapoh kata ka shnong, te yn sa ïathuh ha me aïu ba ka dei ïa me ban leh.” 7Ki rangbah te kiba la leit jingleit ryngkat bad u, ki la ïaïeng khlem nang kren, ki da ïohsngew ïa ka jingsawa, hynrei, kim da ïohi ïano ïano ruh. 8Te u Saul u la ïeng na ka khyndew, bad ynda u la khyllie la ki khmat, um ïohi ei ei shuh; bad ki la btin ïa u na ka kti, ki la ïalam ruh ïa u shapoh Damaskos. 9Te u la long lai sngi khlem imat, bad um shym la bam lymne dih.

10Te la don uwei u synran ha Damaskos, uba kyrteng “u Ananias”; bad U Trai u la ong ha u ha ka jingithuhpaw, “Ko Ananias.” U ruh u la ong, “Ha khmih, nga hangne, ko Trai.” 11Te U Trai u la ong ha u, “To ïeng, khie leit ruh sha kata ka lynti shnong ïa kaba khot ‘Ba-beit’, to wad ruh ha ka ïing u Judas, ïa u briew uba kyrteng ‘u Saul’, u nong Tarsos; naba, ha khmih, u duwai, 12bad u la ïohi ïa u briew uba kyrteng ‘u Ananias’ ba u wan hapoh, bad ba u buh ïa la ki kti ha u, ba un ïoh peit pat.” 13Hynrei, u Ananias u la ïathuh, “A Trai, nga la ïohsngew na kiba bun shaphang une u briew, kaba katno ka basniew ba u la leh ïa ki riewkhuid jong me ha Jerusalem! 14Hangne ruh putet u la ïoh ka bor na ki rangbah lyngdoh, ban khum ïa baroh kiba khot kyrpad ha ka kyrteng jong me!” 15Hynrei, U Trai u la ong ha u, “To khie leit noh; naba uta u long u atiar ba la jied ha nga, ïa ka ban kit ïa ka kyrteng jong nga ha khmat ki Jentil, bad ki syiem, bad ki khun Israel de; 16namar ngan pyni ha u kaba katno bun kiei kiei ba u dei ban shah na ka bynta ka kyrteng jong nga.” 17Kumta u Ananias u la leit noh, bad u la rung hapoh kata ka ïing; te haba u la buh ïa la ki kti ha u, u la ong, “Ko Saul, u para jong nga, uta U Trai, U Jisu keiñ, uba la mihpaw ha me ha kata ka lynti ha kaba me la wan, U la phah ïa nga ba men ïoh peit pat, bad ba yn pyndap ïa me da U Mynsiem Bakhuid.” 18Te kumne kumne ruh la hap noh na ki khmat jong u kum ki sarew, bad u la ïoh peit pat; te u la ïeng joit, bad la pynbaptis ïa u. 19Te ynda u la bam jingbam, la pynshait ïa u.

U Saul u ïalap ha Damaskos

Te u la don katto katne ki sngi ryngkat bad ki synran kiba ha Damaskos. 20Te kumne kumne ruh u la ïalap ïa U Khrist ha ki synagog, ba u long U Khun U Blei. 21Baroh te kiba la ïohsngew ïa u, ki la sngewkyndit, bad ki la ïa-ong, “Une um dei uta uba la pynjot ha Jerusalem ïa kita kiba la ju khot kyrpad ha kane ka Kyrteng? Bad u la wan hangne ruh ïa kane khnang, ba un ïoh ïalam noh ïa ki ba la khum ha khmat ki rangbah lyngdoh.” 22Hynrei, u Saul u la nang khraw bor, bad u la pynduh nia ïa kita ki Jiw kiba shong ha Damaskos, u da pyni biang biang ba une u long U Khrist.

U Saul u lait im na ki Jiw

23Te haba la dap bun sngi, ki Jiw ki la ïasylla lang ban pynïap noh ïa u; 24#2 Kor. 11:32-33.hynrei, u Saul u la ïoh tip ïa ka jingïashet jong ki. Te ki la ïa-ap ïa ki khyrdop ruh mynsngi bad mynmiet, ba kin ïoh pynïap noh ïa u. 25Hynrei, ki synran jong u ki la shim ïa u mynmiet, bad ki la ïa-pynhiar noh lyngba ka kynroh, ki da ïa-pynhiar ïa u ha ka tukri.

U Saul ha Jerusalem

26Te haba u la poi ha Jerusalem, u la pyrshang ban pynïasoh ïa lade bad ki synran; te baroh ki la sheptieng ïa u, ba kim ngeit satia ba u long u synran. 27Hynrei, u Barnabas u la shim ïa u, bad u la wallam ïa u ha ki apostol, bad u la ïathuh ha ki kumno ba u la lah ïohi ïa U Trai ha kata ka lynti, bad ba U la lah kren bad u, bad kumno ha Damaskos ba u la lah ïalap shlur ha ka kyrteng U Jisu. 28Bad u la long ryngkat bad ki, u da ïarung hapoh bad u da ïamih habar ruh ha Jerusalem, 29u da ïalap shlur ha ka kyrteng U Trai, u la ïakren ruh bad u la ïasaid bad kita ki Jiw Grik; hynrei, ki la wad lad ban pynïap noh ïa u. 30Te haba ki parabangeit ki la tip ïa kata, ki la ïalam noh arsut ïa u sha Kaisaria, bad ki la phah noh ïa u sha Tarsos.

31Kumta, ka balang ha Judia bad Galilaïa bad Samaria baroh ka la suk, ba la tei ïa ka; bad da kaba ïaid ha ka jingsheptieng ïa U Trai, bad ha ka jingpyntngen U Mynsiem Bakhuid, ka la roi kyrhai.

La pynkhiah ïa u Inias

32Ka la jia ruh, katba u Petros u la leit lyngba ïa ki phang baroh, ba u la wan hiar ruh ha kita ki riewkhuid kiba shong ha Lydda. 33Te u la shem hangta ïa uwei u briew, uba kyrteng “u Inias”, uba la thiah ha ka jingthiah la phra snem, naba u la pang ïapshiliang. 34Te u Petros u la ong ha u, “Ko Inias, U Jisu Khrist u pynkhiah ïa me; to ïeng joit, bad shna ïa la ka jingthiah.” Te kumne kumne ruh u la ïeng joit. 35Baroh te kiba shong ha Lydda bad ha Sharon ki la ïohi ïa u, bad ki la phai sha U Trai.

La pynim pat ïa ka Dorkas

36Te la don ha Joppa kawei ka synran, kaba kyrteng “ka Tabitha”, kaba haba la batai, la khot “ka Dorkas”; kane ka kynthei, ka la dap da ki jingleh babha bad ki jingai isynei kiba ka la ju leh. 37Te ka la jia ha kita ki sngi, ba ka la pang, bad ka la ïap noh; bad ynda ki la ïa-pynsum ïa ka, ki la ïabuh ïa ka ha kawei ka kamra kaba haneng. 38Te namar ba ka Lydda ka long hajan Joppa, kita ki synran haba ki la ïohsngew ba u Petros u don hangta, ki la phah ar ngut ki briew sha u, ki da kyrpad ïa u, “Wat pyntud ban wan haduh ha ngi.” 39Te u Petros u la ïeng joit, bad u la leit lem bad ki. Bad ynda u la poi, ki la ïalam ïa u sha kata ka kamra kaba haneng; ki riewkynthei baroh te ki la ïaïeng hajan jong u, ki da ïaïam, bad ki da ïa-pyni ïa ki sopti, bad ïa ki jaiñkup, kiba ka Dorkas ka la thaw, mynba ka dang don bad ki. 40Hynrei, u Petros, u la pynmih noh shabar ïa ki baroh, bad u la dem khohsiew, bad u la duwai; bad haba u la phai sha kata ka met, u la ong, “Ko Tabitha, to ïeng.” Te ka la khyllie ïa la ki khmat; bad haba ka la ïohi ïa u Petros, ka la khie shong. 41Te u la ai la ka kti ha ka, bad u la pynïeng ïa ka; te ynda u la khot ïa kita ki riewkhuid bad ïa ki riewkynthei, u la aiti ïa ka, kaba la im pat. 42Te la bna ïa kata ha Joppa baroh kawei, bad shibun ki la ngeit ha U Trai. 43Ka la jia ruh, ba u la ïaishong bun sngi ha Joppa bad uwei u Simon, u nongshna snieh.

Currently Selected:

KI KAM 9: KHB

Highlight

Copy