KI KAM 8

1 # Ki Kam. 11:19. Te u Saul u la ïamynjur lem ïa ka jingpynïap ïa u.

U Saul u pynshitombeiñ ïa ka Balang

Ha kata ka sngi te, la jia ka jingpynshitom beiñ bakhraw ïa ka balang kaba ha Jerusalem, te la pynsakma ïa ki baroh, kylleng ki ri Judia bad Samaria, lait sa tang ki apostol. 2Te ki rangbah bariewblei ki la ïatep ïa u Stephan, bad ki la ïa-pynlong ka jingïambriew kaba khraw na ka bynta jong u. 3#Ki Kam. 22:4,5; 26:9-11.Hynrei, u Saul u la pynjot ïa ka balang, u da leit rung man la ka ïing, bad haba u la ring noh ïa ki briew shynrang bad kynthei, u la ai noh ïa ki sha ka ïing byndi.

La ïalap ïa ka gospel ha Samaria

4Namar kata, kita ïa kiba la pynsakma, ki la leit kylleng kylleng, ki da ïalap ïa kata ka ktien. 5Bad u Philip u la leit hiar sha ka shnong Samaria, bad u la ïalap ïa U Khrist ha ki. 6Te ki paidbah ki la shahshkor da kawei ka jingmut, ïa kita kiei kiei ruh kiba la kren da u Philip, haba ki la ïohsngew bad ki la ïohi ïa kita ki dak khyllah kiba u la leh. 7Namar ki mynsiem bymkhuid haba ki la pyrta da ka ktien bajam, ki la mih noh na shibun ha kiba ki la ju shong; shibun kiba la pang ïapshiliang, bad ki ba-dkoh, la pynkhiah. 8Te la don ka jingkmen bakhraw ha kata ka shnong.

9Hynrei, la don uwei u briew, uba kyrteng “u Simon”, uba ju leh byrtong mynshuwa ha kata ka shnong, bad u la pynmaïa ïa ki briew jong ka Samaria; u da kren sarong ïa lade, ba u long uwei u bakhraw. 10Ha u, baroh ki la ïa-pynleit jingmut, naduh u barit tam haduh u bakhraw tam, ki da ong, “Une u briew u long kata ka bor U Blei ïa kaba la khot ‘Bakhraw’.” 11Ha u te, ki la ïa-pynshahshkor, namar la mynslem bah, da ki jingleh byrtong u la pynmaïa ïa ki. 12Hynrei, ynda ki la ngeit ïa u Philip, ba u da ïalap ïa ka khubor babha shaphang ka hima U Blei bad ka kyrteng U Jisu Khrist, la pynbaptis ïa ki, bad shynrang bad kynthei. 13Te u Simon hi ruh u la ngeit, bad haba la pynbaptis ïa u, u la sah lem bad u Philip, bad u la sngewlyngngoh haba u la khmih ïa ki dak khyllah, bad ki kambah bakhraw ïa kiba la leh.

14Te haba ki apostol kiba ha Jerusalem ki la ïohsngew ba ka Samaria ka la lah pdiang ïa ka ktien U Blei, ki la phah ha ki ïa u Petros bad ïa u Ïoannis; 15kiba, ynda ki la leit hiar, ki la ïaduwai na ka bynta jong ki, ba kin ïoh pdiang ïa U Mynsiem Bakhuid. 16(Namar um pat shym la hap hano hano ruh na ki; hynrei, tang ba la pynbaptis ïa ki ha ka kyrteng U Trai Jisu.) 17Ynda kumta, ki la ïabuh la ki kti ha ki, bad ki la pdiang ïa U Mynsiem Bakhuid. 18Te ynda u Simon u la ïohi ba da kaba buh ki kti ki apostol, la ai ïa U Mynsiem Bakhuid, u la tyrwa sbai ha ki, 19u da ong, “To ai ha nga ruh ïa kane ka bor, ba hano hano ruh ba ngan buh ïa la ki kti, un ïoh pdiang ïa U Mynsiem Bakhuid.” 20Hynrei, u Petros u la ong ha u, “Ka rupa jong me to kan jot noh lem bad me, naba me la mut ban ïoh ïa ka jingai jong U Blei da u sbai! 21#Salm. 78:37.Mem don ka bynta, lymne ka pakai ha kane ka kam; namar ka dohnud jong me kam long kaba beit ha khmat U Blei. 22Namar kata, to kylla-ka-bamut noh na kane ka bymman jong me, bad to duwai ha U Blei, lehse yn dang map ïa me ïa kane ka buit ka dohnud jong me. 23#Isa. 58:6.Namar nga ïohi ba me long u ksang ka jingkthang, bad ka jingkhum ka jingbymman.” 24U Simon te u la ïathuh bad u la ong, “To duwai ma phi na ka bynta jong nga ha U Trai, ba kawei ruh na kita ïa kiba phi la kren, kan ym jia ha nga!”

25Ki te namar kata, ynda ki la ïaphla bad ïalap ïa ka ktien U Trai, ki la ïaleit phai pat sha Jerusalem, bad ki la ïalap ïa ka gospel ha bun ki shnong jong ki Samaria.

U Philip bad u Ïunukh bakhrawbor na Ithiopia

26Hynrei u angel U Trai u la kren ha u Philip, u da ong, “To ïeng joit, khie leit ruh shaphang shathie, sha kata ka lynti kaba leit hiar na Jerusalem sha Gasa” (kata ka long ka ri khlaw). 27Kumta, u la ïeng bad u la leit; te ha khmih, u briew na Ithiopia, u Ïunukh uba khraw bor hapoh ka Kandasi, ka syiem ki nong Ithiopia, uba la long halor ka jingkynshew jong ka baroh, uba la wan ban mane sha Jerusalem; 28te u dang leit phai, u da shong ha ka kali jong u, bad u dang pule ïa u Isaïah u nongïathuhlypa. 29U Mynsiem te, u la ong ha u Philip, “Khie leit hajan, to snoh ruh ha kane ka kali.” 30Te u Philip u la phet sha u, bad u la ïohsngew ba u pule ïa u Isaïah u nongïathuhlypa, bad u la ong, “Me shemphang ïa kata kaba me pule?” 31U la ïathuh te, “Kumno nga lah, lymda don uno uno u ban ïalam ïa nga?” Bad u la kyrpad ïa u Philip ban wan kiew bad shong ryngkat bad u. 32#Isa. 53:7-8.Te ka jaka jong kata Ka Jingthoh kaba u la pule, ka la long kane:

“Kum ka langbrot

la ïalam noh ïa u

sha ka jingpynïap,

bad kum i khun langbrot

ba sngap jar

ha khmat u nongot shñiuh

jong i,

kumta um ang la ka shyntur.

33Ha ka jinglong rit jong u

la shim noh ïa ka jingbishar

jong u;

hynrei, uei u ban ïathuh

ïa ka jingkha pateng jong u?

naba la shim noh

ïa ka jingim jong u

na ka khyndew.”

34Te uta u Ïunukh u la ïathuh ha u Philip, bad u la ong, “Nga kyrpad ïa me, shaphang jongno u nongïathuhlypa u kren ïa kane? shaphang ïa lade hi, ne shaphang uwei pat?” 35Ynda kumta, u Philip u la ang la ka shyntur, bad da kaba sdang na kane ka jingthoh, u la ïalap ha u ïa U Jisu. 36Te katba ki nang ïaleit ha kata ka lynti, ki la ïapoi ha kawei ka um; te uta u Ïunukh u la ong, “Ha khmih ka um; kaei ba pynpep ban pynbaptis ïa nga?” 37Te u Philip u la ong, “Lada me ngeit na la ka dohnud baroh, me lah.” U la ïathuh bad u la ong, “Nga ngeit ba U Jisu Khrist u long U Khun U Blei.” 38Te u la hukum ban pynsangeh ïa ka kali: bad ki la ïaleit hiar baroh ar ngut sha kata ka um, u Philip bad uta u Ïunukh de, bad u la pynbaptis ïa u. 39Te haba ki la ïawan kiew noh na kata ka um, U Mynsiem U Trai u la rah noh ïa u Philip, bad uta u Ïunukh um shym la ïohi shuh ïa u, naba u la nang leit ha ka lynti jong u da kaba kmen. 40Hynrei, ïa u Philip la shem ha Asotos; te katba u dang ïaid lyngba, u la ïalap ïa ka gospel ha ki shnong baroh, haduh ba u la poi sha Kaisaria.

Currently Selected:

KI KAM 8: KHB

Highlight

Copy