KI KAM 10

U Petros bad u Kornilios

1 # Ki Kam. 11:4-17. Te la don ha Kaisaria uwei u briew uba kyrteng “u Kornilios”, u rangbah shispah na ka kynhun shipai ba la khot “Ka Italia”, 2u briew bariewblei, bad uba sheptieng ïa U Blei, lem bad ka ïing jong u baroh, uba la ai shibun ki jingai isynei ïa ki briew, bad uba duwai de ha U Blei khlem da pud. 3U la ïohi shynna ha ka jingithuhpaw, hamar kaba khyndai baje mynsngi#10:3 kaba khyndai baje mynsngi: Kane ka dei ka kynta bakhyndai. Kat kum ka jingkheiñ por ha kine ki sngi, kan dei ka por lai baje janmiet., ïa u angel U Blei ba u wan hapoh ha u, bad ba u ong ha u, “Ko Kornilios.” 4U te, haba u la khmih shaiñ ha u, bad ba u dang kyndit, u la ong, “Kumno, Kynrad?” Te u la ïathuh ha u, “Ki jingduwai jong me bad ki jingai isynei jong me, ki la ïakiew soit kum ka jingkynmaw ha khmat U Blei. 5Mynta te to phah briew sha Joppa, bad khot ïa u Simon, ïa uba sin ‘Petros’; 6u shong basa bad uwei u Simon, u nongshna snieh, uba ka ïing jong u ka don harud duriaw.” 7Te ynda uta u angel uba la kren ha u, u la leit noh, u la khot ar ngut na ki shakri ïing jong u, bad ïa u shipai bariewblei na kita kiba ju ïa-ap ïa u; 8te haba u la bthah ha ki, ïa kiei kiei baroh, u la phah noh ïa ki sha Joppa.

9Te kum lashai, katba kita ki dang ha lynti, bad ba ki la poi hajan kata ka shnong, u Petros u la leit kiew shalor ïing ban duwai, hamar kaba hynriew baje#10:9 kaba hynriew baje: Kane ka dei ka kynta ka bahynriew. Ha ka jingkheiñ por ha kine ki sngi, kan dei ka por khat-ar baje shiteng sngi.. 10Te u la sngewthngan, bad u la kwah ban ïoh jingbam: hynrei, katba ki dang pynkhreh, la ngat ka jinglong rngai ha u. 11Bad u ïohi ïa ka bneng ba la plie, bad uwei u khiew ba u da hiar, kum ka jingsiang bakhraw ba la pynhiar na ki sawdong ha khyndew, 12ha kaba la don ki kynja mrad ba saw kjat baroh, bad ki kynja bapar jong ka khyndew, bad ki sim jong ka bneng de. 13Te la wan ka ktien ha u, “To ïeng, ko Petros, to pynïap to bam ruh.” 14Hynrei, u Petros u la ong, “Ym kumta, A Trai; namar ngam ju bam mynno mynno ruh kaei kaei kaba sang lane ka bymkhuid.” 15Te ka ktien ka la wan pat ha u ka ba-ar sien, “Ïa kaba U Blei u la pynkhuid, wat ñiew sang ma me.” 16Bad la leh ïa kane lai sien; te la pdiang soit pat ïa uta u khiew sha bneng.

17Te katba u Petros u dang sngewlyngngoh shibun ha lade, kata ka jingithuhpaw kaba u la ïohi ka lah ban mut aïu, ha khmih ruh, kita ki briew ïa kiba la phah da u Kornilios, ynda ki la lah wad ïa ka ïing u Simon, ki la ïaïeng ha khmat ka khyrdop, 18bad ki la khot, bad ki la ïakylli, la u Simon ïa uba sin “Petros”, u shong basa hangta ne em. 19Te katba u Petros u dang pyrkhat shaphang kata ka jingithuhpaw, U Mynsiem u la ïathuh ha u, “Ha khmih, lai ngut ki briew ki ïawad ïa me. 20Hynrei to ïeng, to leit hiar noh, bad to leit ryngkat bad ki khlem da sngew-artatien, namar la phah ma nga ïa ki.” 21Kumta, u Petros u la leit hiar sha kita ki briew, bad u la ong, “Ha khmih, nga long uta ïa uba phi ïawad. Na ka daw aïu phi la wan?” 22Te ki la ïathuh, “U Kornilios, u rangbah shispah, u briew u bahok, bad uba sheptieng ïa U Blei, bad uba la ïoh ka jingïaroh na ka jaid Jiw baroh, la sneng ïa u da u angel bakhuid ban phah khot ïa me shapoh ka ïing jong u, bad ban ïohsngew ïa ki ktien na me.” 23Kumta, u la khot ïa ki shapoh, bad u la khot basa ïa ki.

Te ha kaba lashai u la ïeng bad u la leit noh lem bad ki, bad don ruh ki parabangeit kiba na Joppa kiba la ïaleit ryngkat bad u. 24Te kum lashai ki la ïawan poi shapoh Kaisaria. U Kornilios te u la lah khot lang ïa ki kur jong u, bad ïa ki lok ba-ieit jong u. 25Te ka la jia katba u Petros u dang rung, ba u Kornilios u la leit tan ïa u, bad u la dem khrup ha ki kjat jong u, bad u la mane ïa u. 26Hynrei, u Petros u la pynïeng pat ïa u, u da ong, “To ïeng joit, nga hi ruh nga long u briew.” 27Te katba u la nang ïakren bad u, u la rung, bad u la shem shibun kiba la ïawan lang. 28U la ong te ha ki, “Phi hi phi tip kumno ba ka long kaba sang ïa u briew uba long u Jiw ban ïalok lane ban ïajan bad uba na kawei pat ka jaid bynriew; pynban, U Blei u la pyni ha nga ba ngan ym ñiew uba sang lane u bymkhuid ïa uno uno u briew; 29namar kata te, haba la phah khot ïa nga, nga la wan khlem da ïasaid. Namar kata, nga kylli: ïa ka ban lei phi la phah khot ïa nga?”

30U Kornilios te u la ong, “Mynta la saw sngi haduh kane ka por, haba nga dang duwai ïa ka jingduwai kaba khyndai baje ha ka ïing jong nga, ha khmih, uwei u briew u la ïeng ha khmat jong nga ha ka jaiñkup baphyrnai, 31bad u ong, ‘Ko Kornilios, la shahshkor ïa ka jingduwai jong me, bad ïa ki jingai isynei jong me la buh jingkynmaw ha khmat U Blei. 32Namar kata, to phah sha Joppa, bad khot ha me ïa u Simon ïa uba la sin “Petros”, u shong basa ha ka ïing u Simon, u nongshna snieh, harud ka duriaw.’ 33Namar kata, mar mar nga la phah ktien sha me, me ruh me la leh bha ba me la poi. Mynta, namar kata, ngi baroh ngi ïadon hangne ha khmat U Blei, khnang ïa ka ban ïohsngew ïa kiei kiei baroh, ïa kiba la hukum ha me da U Trai.”

Ka jingïalap u Petros ha ïing u Kornilios

34 # Deu. 10:17. Ynda kumta, u Petros u la ang la ka shyntur, bad u la ong, “Shisha nga sngewthuh ba U Blei um long uba ñiew shiliang khmat, 35hynrei, ha kano kano ka jaid bynriew, jar uba sheptieng ïa U, bad uba ïai-leh ïa ka hok, u long keiñ uba la pdiang sngewbha da U. 36Kata ka ktien ïa kaba U la phah ha ki khun Israel, da kaba ïalap ïa ka gospel ka jingsuk da U Jisu Khrist (long ma u, U Trai halor baroh), 37ïa kata ka ktien, phi hi phi tip ïa kaba la pynbna ha Judia baroh, haba la sdang na Galilaïa hadien kata ka jingpynbaptis kaba la ïalap u Ïoannis; 38shaphang U Jisu uba na Nasaret, kumno ba U Blei u la pynsleh ïa u da U Mynsiem Bakhuid, bad da ka bor, uba la ïaid kylleng u da leh babha, bad u da pynkhiah ïa kita baroh kiba la ban shitom da u Soitan; naba U Blei u long ryngkat bad u. 39Bad ngi long ki sakhi ïa kiei kiei baroh kat kiba u la leh ha ka ri ki Jiw, bad ha Jerusalem; ïa uba ki la pynïap noh ruh, da kaba sdien ïa u ha u dieng. 40Ïa une, U Blei u la pynmih pat ha ka balai sngi, bad u la shah ïa u ban long uba paw shynna, 41ym ha u paidbah baroh, hynrei, ha ki sakhi ïa kiba la jied mynshuwa da U Blei, ha ngi keiñ, kiba la ïabam ïadih ryngkat bad u, ynda u la mihpat na ki baïap. 42U la hukum te ïa ngi ban ïalap ha u paidbah, bad ban phla ba une, u long uta uba la thung da U Blei ban long U Nongbishar ki ba-im bad ki baïap. 43Ïa une, ki nongïathuhlypa baroh ki ïaphla, ba da ka kyrteng jong u, uno uno baroh uba ngeit ha u, un ïoh kaba map ki pop.”

Ki Jentil ki ïoh pdiang ïa U Mynsiem Bakhuid

44Katba u Petros u dang kren ïa kine ki ktien, U Mynsiem Bakhuid u la hap ha kita baroh kiba la ïohsngew ïa kata ka ktien. 45Te kiba na ka jingotsher kiba la ngeit, kat kiba la ïawan lem bad u Petros, ki la sngewkyndit, namar ba ha ki Jentil ruh la theh noh ïa ka jingai U Mynsiem Bakhuid, 46namar ki la ïohsngew ba ki ïakren da ki thylliej, bad ba ki ïapynkhraw ïa U Blei. Kumta u Petros u la ïathuh, 47“Don mano mano uba lah ban adong ïa ka um, kat ban ym pynbaptis ïa kine kiba la ïoh pdiang ïa U Mynsiem Bakhuid, kumjuh kum ngi?” 48Te u la hukum ba yn pynbaptis ïa ki ha ka kyrteng U Jisu Khrist. Ynda kumta, ki la ïakyrpad ïa u ban sah sa khyndiat sngi.

Currently Selected:

KI KAM 10: KHB

Highlight

Copy