KI KAM 27

U Paul u leit da ka lieng sha Rom

1Te mynba la pynkut ba ngin leit da ka lieng sha Itali, ki la ïa-aiti pateng ïa u Paul bad kiwei pat ki nongsah byndi ha u rangbah shispah uba kyrteng “u Julios”, uba na ka kynhun u Agustos. 2Te ynda ngi la leit kiew ha ka lieng kaba na Adramyttion, ka ban sa leit ha kita ki jaka jong ka Asia kiba harud duriaw, ngi la ïamih noh; don lem bad ngi u Aristarkhos na Makedonia, u nong Thessaloni. 3Te kum lashai ngi la ïahiar ha Sidon. U Julios te, u la leh sbun ïa u Paul, bad u la shah ïa u ban leit sha la ki lok ban ïoh ka jingsumar sukher. 4Haba ngi la ïamih noh nangta ruh, ngi la leit da ka lieng hapoh Kypros, namar ba ki lyer ki la pyrshah. 5Te ynda ngi la lah leit lyngba ïa kata ka duriaw kaba pyrshah Kilikia bad Pamphilia, ngi la ïapoi sha Maira, ka shnong jong ka Lykia. 6Hangta te, uta u rangbah shispah, haba u la shem ka lieng kaba na Aleksandria kaba leit sha Itali, u la pynkiew ïa ngi ha ka. 7Te haba ngi la lah ïaid lieng mian mian bun sngi, bad la poi da kaba eh ha pyrshah Knidos, ba ka lyer kam da shah shuh ïa ngi, ngi la ïaid hapoh ka Krit ha pyrshah ka Salmoni; 8bad haba ngi la pynïaid da kaba eh narud narud jong ka, ngi la poi ha kawei ka jaka ba khot, “Ki jaka rieh lieng bajai jai”, hajan kata la don ka shnong Lasia.

9Te haba la lah pynleit noh bun sngi, bad ka jingïaid lieng ka da long mynta kaba ma; namar Ka Niam Shah Jingit ka la lah palat noh, u Paul u la sneng, 10bad u la ong ha ki: “Ko rangbah, nga ïohi ba kane ka jingïaid lieng kan sa long lem bad ka jingmynsaw bad shibun ka jingduh, ym tang ïa ka jingkit bad ka lieng, hynrei, ïa ki jingim jong ngi ruh.” 11Hynrei, uta u rangbah shispah u la kham kohnguh ïa u maji bad u trai ka lieng ban ïa kita kiei kiei ba la kren u Paul. 12Te namar ba kata ka jaka rieh lieng ka la long ka bymbit ban rieh tlang, kham bun ki la ïakyntu ban pynmih noh nangta, lada da kumno kumno ki lah ban poi haduh Phoiniks, ban rieh tlang hangta, kaba long ka jaka rieh lieng ka Krit, kaba phai shaphang shatei lam mihngi, bad shaphang shathie lam mihngi.

Ka 'erïong ha duriaw

13Te haba ka lyer na shathie ka la beh jem jai, ba ki da ïamut ba ki la ïoh ïa kaba ki la thmu, ki la ïaring angkor bad ki la ïa-ïaid ha syndah ka Krit, narud narud. 14Hynrei, ym slem hadien, la beh na ryngkew ka 'erïong, kaba la khot “Ïurakuilo.” 15Te haba la lap ïa ka lieng, bad kam lah ban tur pyrshah ïa ka lyer, ngi la shu shah ïa ka, bad la rong noh ïa ngi. 16Bad haba ngi la ïaphet narum iwei i 'dewlynnong ba khot “Klauda”, da kaba eh ngi la lah ban pynskhem ïa ka lieng rit; 17te haba ki la lah ïakyntiew ïa ka, ki la spaiñ ïa ka lieng bah da ki tyllai; ba ki da sheptieng ruh ïoh yn ñiat ïa ki ha ki jingkyrsoi shyiap Syrtis, ki la ïa-pynhiar ïa ki mastul, kumta la rong noh ïa ki. 18Te haba ngi la ïaleh tyngeh shikatdei bad ka 'erïong, kum lashai ki la sdang ban bred noh ïa ka jingkit; 19bad ha ka sngi ka balai, ki la ïabred noh da ki kti jong ki hi ïa ki tiar ki tar jong ka lieng. 20Te mynba ka sngi lymne ki khlur kim paw shuh ha ngi bun sngi, bad ka 'erïong kaba jur ka ban khia ha ngi, ka jingkyrmen ban im ka la duh noh baroh.

21Hynrei, ynda ki la long slem khlem jingbam, ynda kumta, u Paul haba u la ïeng hapdeng jong ki u la ong, “Ko rangbah, ka la dei ïa phi ban shahshkor ïa nga ban ym mih noh na Krit, ïa ka ban ïoh kat kane ka jingmynsaw bad ka jingduh. 22Mynta ruh nga kyntu ïa phi ba phin sngewshngain; namar napdeng jong phi kan ym jah kawei ka mynsiem ruh, hynrei, tang kane ka lieng. 23Namar la ïeng hajan jong nga ha kane ka miet u angel U Blei, u jong uba nga long, bad ïa uba nga shakri ruh, 24u da ong, ‘Ko Paul, wat sheptieng; ka dei ïa me ban ïeng ha khmat u Kaisar. Ha khmih ruh U Blei u la ai ha me ïa kito baroh kiba ïaid lieng lem bad me.’ 25Naba kumta to sngewshngain phi, ko rangbah; namar nga ngeit ïa U Blei, ba kan long kumta kumba la kren ha nga. 26Hynrei, ka dei ban kynting noh ïa ngi ha kawei ka 'dewlynnong.”

27Te ynda ka miet ka bakhatsaw ka la poi, katba dang rong pynshad kylleng ïa ngi ha kata ka duriaw Adria; hamar shiteng synñia, kita ki riewlieng ki la ïamut ba ki la jan sha kawei ka ri. 28Te haba ki la bred da u sisa ban thew, ki la shem arphew pad; te haba ki la lah ïaid khyndiat, ki la ïathew pat, bad ki la shem khatsan pad. 29Te ba ki da sheptieng ïoh ba kumno re kumno yn kynting ïa ngi ha ki jaka maw, haba ki la ïabred saw tylli ki angkor na ka tdong lieng, ki la ïakwah hir hir ban mih ka sngi. 30Te katba kita ki riewlieng ki la ïawad lad ban phet ïap noh na kata ka lieng, bad haba ki la lah ïa-pynhiar noh ïa kata ka lieng rit ha ka duriaw, kum ki ban sa pynhiar noh ïa ki angkor na ka khmat lieng, 31u Paul u la ong ha uta u rangbah shispah, bad ha kita ki shipai, “Lymda kine ki sah ha ka lieng, phi phim lah ban ïohlait im.” 32Ynda kumta, kita ki shipai ki la ïa-ot noh ïa ki tyllai jong kata ka lieng rit, kumta ki la pyllait ïa ka.

33Te katba ka sngi ka la sdang mih, u Paul u la kyrpad ïa ki baroh ban ïabam jingbam, u da ong, “Kane ka dei ka sngi ka bakhatsaw ba phi ïa-ap, bad shah jingit khlem da bam ei ei. 34Naba kumta, nga kyrpad ïa phi ban ïabam jingbam; namar kane ka long khnang ïa ka ban pynim ïa phi; namar iwei i shñiuh in ym hap na ka khlieh jongno jongno ruh na phi.” 35Te haba u la lah ong ïa kane, bad haba u la lah shim ïa u kpu, u la ainguh ïa U Blei ha khmat jong ki baroh; bad u la kdiah ïa u, bad u la sdang ban bam. 36Ynda kumta, baroh ki la ïasngew im, ki hi ruh ki la ïabam jingbam. 37Te ngi la don baroh ha kata ka lieng, arspah hynñiewphew hynriew ki mynsiem. 38Te ynda ki la lah ïabam ïasa, ki la ïa-pynsting ïa kata ka lieng da kaba bred noh ïa u Kew sha ka duriaw.

Ka jingpaitlieng

39Te haba ka lashai, kim shym ithuh ïa kata ka ri; hynrei, ki la ïohi ïa kawei ka kdong um kaba don ka rud duriaw shyiap, bad ki la ïapyrkhat lada ki lah ban pynsah kut noh ïa kata ka lieng hangta. 40Kumta te, haba ki la lah pyllait noh ïa kita ki angkor, ki la iehnoh ïa ki ha duriaw, ki ïapynsynjor artad ïa ki tyllai ki boitha, bad haba ki la lah pynïeng ïa ka phar kaba sha khmat sha ka lyer, ki la ïaking sha kata ka rud duriaw. 41Hynrei, haba la kyndat ïa ki ha ka jaka kaba ïashem ar duriaw, ki la pynsuh ïa kata ka lieng sha ryngkew; te kumta ka khmat lieng ka la kiew ryngkew bad ka la neh den, hynrei, ka tdong lieng ka la sdang pait da ka bor jong ki jingat phyllung. 42Te ka jingthmu jong kita ki shipai ka la long ba kin pynïap noh ïa kita ki koidi, ïoh ba uno uno ruh na ki un jngi sha ryngkew bad un lait noh. 43Hynrei, uta u rangbah shispah, ba u da kwah ban pynim ïa u Paul, u la khang noh ïa ki na kata ka jingthmu, bad u la hukum kat kiba nang jngi ba kin ryngkoh na ka lieng, bad ban poi nyngkong sha ryngkew, 44bad ïa kita kiba sah, kiwei halor ki lyntang, kiwei pat de halor kiwei kiei kiei ruh kiba na kata ka lieng. Kumta te, ka la jia ba baroh ki la lait im sha ka ryngkew.

Currently Selected:

KI KAM 27: KHB

Highlight

Copy