KI KAM 28

U Paul ha ka 'dewlynnong Melita

1Te ynda ngi la ïohlait im, ynda kumta ngi la ïatip ba khot kyrteng ïa kata ka 'dewlynnong “Melita”. 2Bad kita ki nongkyndong ki la pyni ka jingleh ieit ïa ngi kaba kham phylla, namar ki la sliew ding, bad ki la ïakhot sngewbha ïa ngi baroh, namar uta u slap uba mynkata, bad namar ka jingpjah. 3Hynrei, u Paul haba u la lah khar shi bah ki dieng, bad u la lah tei ïa ki ha ding, u 'seiñpuh u la mih noh namar ba shit, bad u la snoh na ka kti jong u. 4Te mynba kita ki nongkyndong ki la ïohi ïa uta u mrad ba u sdien na ka kti jong u, ki la ïa-ong paralok, “Khlem artatien une u briew u long u nongpynïap briew, uba, la u la ïohlait na ka duriaw, ka kput kam shym la shah ba un im.” 5Pynban, haba u la kynther noh ïa uta u mrad ha ding, um pang ei ei. 6Hynrei, ki la ïakhmih lynti ba un sa sieb noh, lane ba un sa kyllon ïap shisyndon, hynrei, haba ki dang ïakhmih lynti slem bad ki la ïohi ba um shym sniew ei ei ruh, ki la ïakylla jingmut, bad ki la ong ba u long u blei.

7Te hajan kata ka jaka la don ki khyndew ki jong u rangbah kata ka 'dewlynnong, uba kyrteng “u Publios”; une u la pdiang ïa ngi bad u la sumar bha ïa ngi lai sngi da kaba lehburom. 8Ka la jia ruh ba u kpa uta u Publios u la pang khieshoh bad ka suhot, ha uba u Paul u la leit rung, bad haba u la duwai, bad u la buh ïa la ki kti ha u, u la pynkhiah ïa u. 9Te ynda la leh ïa kane, kita kiwei ruh kiba la don ki jingpang ha kata ka 'dewlynnong ki la ïawan ha u, bad la pynkhiah ïa ki; 10kiba la ïaleh burom ruh ïa ngi da shibun ki jingai burom, te haba ngi la ïa-pynmih noh, ki la ïabuh ha ka lieng ïa kiei kiei katba ngi donkam.

Na Melita sha ka nongbah Rom

11Te hadien lai bnai ngi la ïa-pynmih noh ha ka lieng kaba na Aleksandria, kaba la rieh tlang ha kata ka 'dewlynnong, kaba ka dak jong ka “ki Dioskuri”. 12Haba ngi la lah ïahiar ruh ha Surakus, ngi la sah hangta, lai sngi. 13Nangta haba ngi la ïaid kyrwiang ngi la poi ha Rhejiom; bad hadien kawei ka sngi, la mih ka lyer kaba na shathie, bad ha ka ba-ar sngi, ngi la poi ha Putioli; 14hangta ngi la shem ki parabangeit, bad ki la kyrpad ïa ngi ban sah bad ki, hynñiew sngi. Te kumta ngi la poi sha Rom. 15Bad nangta ki parabangeit haba ki la lah ïohsngew shaphang jong ngi, ki la ïamih noh ïa ka ban wan tan ïa ngi haduh “Ka Ïew Apios”, bad “Ki Lai ïingbasa”, ïa kiba haba u Paul u la ïohi, u la nguh ïa U Blei, bad u la sngewshngain. 16Te mynba ngi la poi ha Rom, uta u rangbah shispah u la aiti ïa kita ki nongsah byndi ha u lyngskor kynhun shipai, hynrei, la shah ïa u Paul ban shong kyrpang marwei, lem bad u shipai uba ap ïa u.

U Paul u ïalap ha ka nongbah Rom

17Ka la jia ruh hadien lai sngi, ba u la khot ïaseng ïa kita kiba kham rangbah jong ki Jiw; te ynda ki la ïawan lang, u la ong ha ki, “Ko para, nga, la ngam shym la leh ei ei ruh em pyrshah ïa u paidlang, lane ïa kita ki niam ki rukom ki kpa tymmen jong ngi, pynban, la aiti noh ïa nga kum u nongsah byndi na Jerusalem ha ki kti ki nong Rom: 18kiba la kwah, ynda ki la lah kylli ïit ïa nga, ban pyllait noh ïa nga, namar ba ym don ei ei ka daw ïa nga ban ïap; 19#Ki Kam. 25:11.hynrei, haba ki Jiw ki la kren pyrshah ïa kata, la pynleh keiñ ïa nga ban appil ha u Kaisar; ym ba nga don ei ei ban mudui ïa ka kynja jong nga; 20kumta, na kane ka daw, nga la khot ïa phi ban ïohi, bad ban ïoh ïakren bad nga; naba na ka bynta ka jingkyrmen jong ki Israel la khum ïa nga da une u kynjri.” 21Ki te ki la ïa-ong ha u, “Ngi ngim shym la ïoh ki shithi na Judia shaphang jong me, lymne mano mano na kita ki para kim shym wan shane ban ïathuh lane kren ei ei ka basniew shaphang jong me; 22hynrei, ngi ïakwah ban ïohsngew na me, me mut kumno; namar shaphang kane ka kynja niam ngi la tip ba la krenbeiñ ïa ka kylleng la kylleng.”

23Te kumta haba ki la ïabuh sngi bad u, ki la ïawan shibun ha u hapoh ka ïingbasa jong u; ha kita u la pynpaw, u da phla ïa ka hima U Blei, bad u da pynkohnguh ïa ki shaphang U Jisu, na Ka Hukum u Moses, bad na Ki Nongïathuhlypa ruh, naduh mynstep haduh janmiet. 24Te don kiba la ngeit ïa kiei kiei ruh ba la kren, hynrei, don ki bym shym la ngeit. 25Te haba kim ïadei jingmut paralok hi, ki la ïaleit noh, ynda u Paul u la lah ong shikyntien, “Kaba dei ba la kren U Mynsiem Bakhuid da u Isaïah u nongïathuhlypa ha ki kpa jong phi, 26#Isa. 6:9,10.u da ong:

“ ‘To khie leit ha une u paidlang,

to ong ruh:

“Da kaba ïohsngew

phin ïohsngew,

te phin ym sngewthuh shuh;

bad haba ïohi phin ïohi,

hynrei, phin ym

ishemphang shuh.

27Namar ka dohnud jong

une u paidlang ka la rben,

bad ki la sngewkhia da la

ki shkor,

bad ki la khapbrip ïa la

ki khmat,

ba ïoh kin ïohi da la ki khmat,

bad ba kin ïohsngew da la

ki shkor,

bad ba kin sngewthuh da la

ka dohnud,

bad ba kin kylla pat,

bad ba ngan pynkhiah ïa ki.” ’

28 # Salm. 67:2. “Namar kata, to tip phi, ba la phah ïa kane ka jingpynim U Blei ha ki Jentil; ki ruh kin ïohsngew ïa ka. 29Te ynda u la lah ong ïa kine ki ktien, kita ki Jiw ki la ïaleit noh, ki da ïadon shibun ka jingïasaid kylliang paralok hi.”

30U te u la shong ar snem kynthih ha ka ïing ba u la wai hi, bad u pdiang baroh kiba wan hapoh ha u, 31u da ïalap ïa ka hima U Blei, bad u da hikai ïa kiei kiei ruh shaphang U Jisu Khrist uba U Trai da ka jingsngewshlur suda, bymdon ba khang ïa u.

Currently Selected:

KI KAM 28: KHB

Highlight

Copy