KI KAM 26

Ka jingïasaid-da ïa lade ha khmat u syiem Agrippa

1Bad u Agrippa u la ong ha u Paul, “La shah ïa me ban kren na ka bynta ïa lade.” Ynda kumta, u Paul u la kner ïa la ka kti, bad u la ïasaid-da ïa lade:

2“Nga ñiew ïa lade uba suk, ko syiem Agrippa, ha ban sa ïasaid-da ïa lade ha khmat jong me ha kane ka sngi, shaphang kiei kiei baroh ïa kiba la tian bishar ïa nga da ki Jiw; 3kham tam keiñ naba me long uba shemphang janai ïa ki niam ki rukom bad ïa ki jingïasaid baroh kiba hapdeng ki Jiw. Naba kumta, nga kyrpad ïa me ban sngew ïa nga da kaba ïaishah slem.

4“Ïa ka rukom ka jinglong jingim jong nga te, la myndang khynnah kaba la long naduh kaba mynnyngkong hapdeng ki para jaid jong nga bad ha Jerusalem, ki Jiw baroh ki ïatip; 5#Ki Kam. 23:6; Php. 3:5.ki da ithuh ïa nga na ka banyngkong, lada ki ïamon ban ïaphla, ba kum ka jaid niam kaba bniah tam jong ka niam jong ngi, nga la long u Pharisi. 6Mynta ruh, namar ka jingkyrmen jong kata ka jingkular ba la buh bad kita ki kpa da U Blei, nga la ïeng ba yn bishar ïa nga; 7sha kata ka jingkular, ki khat-ar jaid jong ngi, haba shakri ïa U Blei da kaba sngew-shitrhem mynmiet bad mynsngi, ki kyrmen ban kot. Shaphang kane ka jingkyrmen, la tian bishar ïa nga da ki Jiw, ko syiem Agrippa. 8Balei yn kheiñ kum ka bym lah ngeit ha phi, lada U Blei u pynmih pat ïa ki baïap?

9 # Ki Kam. 8:3; 9:1-8; 22:4-16. “Nga shisha nga la ju tharai ha lade ba ka dei ïa nga ban leh shibun kiei kiei ruh pyrshah ïa ka kyrteng U Jisu u nong Nasaret. 10Ïa kane, nga la leh ruh ha Jerusalem. Bad shibun ki riewkhuid nga la set ha ki ïing byndi, haba nga la ïoh hukum na ki rangbah lyngdoh; bad mynba la pynïap noh ïa ki, nga la noh ïa la u mawria ba ïakohnguh; 11da kaba pynshitom ruh ïa ki bunsien ha ki synagog baroh, nga la ju ïaleh ban pynbor ïa ki ban krenbeiñ blei; bad haba nga la bitar lamwir shikatdei eh ïa ki, nga la ju behbeiñ ïa ki wat haduh ki nongbah kiba sha palat ilaka.

U Paul u ïathuh ïa ka rukom ba la pynkylla ïa u

(Ki Kam. 9:1-19; 22:6-16)

12“Ha kane ruh, haba dang leit sha Damaskos, bad ka bor bad ka hukum ruh na kita ki rangbah lyngdoh, 13hamar shiteng sngi, ko syiem, nga la ïohi ha kata ka lynti ka jingshai na bneng, tam ïa ka jingtyngshaiñ ka sngi, ka da tyngshaiñ sawdong ïa nga, bad ïa kita kiba leit jingleit lem bad nga. 14Te mynba ngi la lah kyllon kram baroh ha khyndew, nga la ïohsngew ka ktien ba kren ha nga, ha ka ktien Hebru, ‘Saul, Saul, balei me pynshitombeiñ ïa nga? Ka long kaba eh ïa me ban kynjat pyrshah ïa ki dieng tyndung.’ 15Nga la ong te, ‘Me long uei, A Trai?’ Te U Trai u la ïathuh, ‘Nga long U Jisu, ïa uba me pynshitombeiñ ma me. 16#Ese. 2:1,3.Hynrei, to khie to ïeng ruh, namar khnang ïa kane keiñ nga la mihpaw ha me, ban thung ïa me ban long u nongïalap bad u nongphla ïa kine kiei kiei ha kiba me la ïohi ïa nga, bad ïa kita kiei kiei ruh ha kiba ngan pynpaw ïa lade ha me, 17da kaba pyllait noh ïa me na u paidlang, bad na ki Jentil ha kiba nga phah noh ïa me, 18#Isa. 42:7,16.ban pynpeit ïa ki khmat jong ki, ba kin ïoh phai na ka jingdum sha ka jingshai, bad na ka bor jong u Soitan sha U Blei, ba kin ïoh pdiang kaba map ki pop, bad ka bynta hapdeng kita ïa kiba la pynkhuid da ka jingngeit kaba ha nga.’ ”

Ka jingphla jong u hapdeng ki Jiw bad ki Jentil

19“Nangta, ko syiem Agrippa, ngam shym la long u bymkohnguh ïa kata ka jingithuhpaw bneng; 20#Ki Kam. 9:20; 9:28,29.hynrei, nga la ïalap nyngkong ha kiba ha Damaskos, bad ha Jerusalem ruh, bad ha ka ri Judia baroh, bad ha ki Jentil ruh, ba kin kylla-ka-bamut, bad kin phai sha U Blei, da kaba leh ïa ki kam ba dei biang ïa ka jingkylla-ka-bamut. 21Namar kane, ki Jiw haba ki la ïakem ïa nga ha ka templ, ki la ïapyrshang ban pynïap noh ïa nga. 22Hynrei, haba la ïoh kata ka jingïarap kaba na U Blei, nga ïai-ïeng haduh kane ka sngi, nga da phla ha u barit ruh bad ha u bakhraw, khlem da ong ei ei ruh em tam ïa kaba la lah ong ki nongïathuhlypa bad u Moses ba kin sa long; 23#Isa. 42:6; 49:6.kumno ba ka la dei ïa U Khrist ban shah, bad kumno nyngkong da ka jingmihpat na ki baïap, un pynbna ka jingshai ha u paidlang ruh, bad ha ki Jentil.”

U Paul u pyrshang ban pynkohnguh ïa u syiem Agrippa

24Te haba u dang ïasaid-da ïa lade kumne, u Phistos u la ong da ka ktien bajam, “Paul, me lamwir! Ka jingbun ka jingstad jong me ka pynlamwir ïa me.” 25Hynrei, u Paul u ong, “Ngam lamwir, ko Phistos u babha tam eh, hynrei, nga kren shynna ki ktien ka jingshisha bad ka jingtipbriew. 26Namar u syiem u tip shaphang kine kiei kiei, ha u, namar kata, nga kren da kaba shlur; namar nga ngeit skhem bymdon kawei na kine kiei kiei ba la buhrieh na u; naba ym shym la leh ïa kane ha kyndong. 27Ko syiem Agrippa, me ngeit ïa ki nongïathuhlypa? Nga tip ba me ngeit.” 28Ynda kumta, u Agrippa u la ong ha u Paul, “Sa khyndiat men ngeit ba me la pynkohnguh ïa nga ban long Khristan.” 29U Paul te u la ong, “Nga duwai ha U Blei, ba da kaba khyndiat ne da kaba shibun, ym tang ma me, hynrei, baroh kiba ïohsngew ïa nga ha kane ka sngi, phin ïalong kum nga, lait na kine ki kynjri.”

30Te u syiem u la ïeng joit, bad u lyngskor, bad ka Berniki, bad kita kiba ïashong lem bad ki. 31Te haba ki la lah ïaleit noh kyrpang, ki la ïakren paralok hi ki da ïa-ong, “Une u briew um shym leh ei ei ruh em kaba dei ïa ka ban ïap, lane ïa ka ban khum.” 32Ynda kumta, u Agrippa u la ong ha u Phistos, “Lah ban pyllait noh ïa une u briew, lada um shym la lah appil ha u Kaisar.”

Currently Selected:

KI KAM 26: KHB

Highlight

Copy