KI KAM 25

U Paul u appil sha u Kaisar

1Ynda u Phistos, namar kata, u la wan ha kata ka muluk, hadien lai sngi u la leit kiew sha Jerusalem na Kaisaria. 2Bad ki rangbah lyngdoh bad kita ki bakhraw batri jong ki Jiw ki la ïapaw ha khmat jong u, ïa ka ban ïaleh ïa u Paul, bad ki la ïakyrpad ïa u, 3ki da ïapan sngewbha pyrshah ïa u, ba un phah khot ïa u sha Jerusalem; ki da ïa-ap thap ban pynïap noh ïa u ha lynti. 4Hynrei, u Phistos u la ïathuh ba la ap phira ïa u Paul ha Kaisaria, bad ba u hi un sa leit noh shen hangta. 5“Namar kata, kita kiba lah hapdeng jong phi,” u ong, “ai kin ïaleit hiar lem bad nga, bad lada don kaei kaei ruh ka bymdei ha une u briew, kin ïamudui ïa u.”

6Te ynda u la lah sah hapdeng jong ki ym tam ïa ka phra ne shiphew sngi, u la leit hiar sha Kaisaria; bad ha kaba lashai u la shong halor ka khet bishar, bad u la hukum ban wallam ïa u Paul. 7Te ynda u la poi, kita ki Jiw kiba la wan hiar na Jerusalem ki la ïeng tawiar ïa u, ki da ïatian ki jingtian bishar babun bad bakhia pyrshah ïa u Paul, ïa kiba kim lah satia ban pynsabut. 8U Paul pat, ha ka jingïasaid-da ïa lade, u la ong, “Ngam shym la leh pop ei ei ruh ïa ka hukum jong ki Jiw, lymne ïa ka templ, lymne ïa u Kaisar.” 9Hynrei, u Phistos, ba u da mon ban pynsngewbha ïa kita ki Jiw, u la ïathuh ha u Paul, bad u la ong, “Me kwah leit kiew sha Jerusalem, ïa ka ban bishar ïa me hangta shaphang kine kiei kiei ha khmat jong nga?” 10Hynrei, u Paul u la ïathuh, “Nga ïeng keiñ ha khmat ka khet bishar u Kaisar, ha kaba ka dei ban bishar ïa nga. Ngam shym la leh bymdei ïa ki Jiw, kumba me hi ruh me tip bha. 11Lada shisha nga la leh bymdei, bad nga la leh ei ei kaba dei ban ïap, ngam kyrngah ïa ka ban ïap; hynrei, lada kine kiei kiei ruh kim long kiba shisha ba kine ki mudui ïa nga, ym don uba lah ban aiti noh ïa nga ha ki. Nga appil ha u Kaisar.” 12Ynda kumta, u Phistos ynda u la lah ïasylla bad kiba ïabishar lem, u la ïathuh, “Me la appil ha u Kaisar? te ha u Kaisar men leit!”

U Paul ha khmat u syiem Agrippa bad ka Berniki

13Te ynda la lah khyndiat sngi, u Agrippa syiem, bad ka Berniki ki la ïawan hiar sha Kaisaria ki da khublei ïa u Phistos. 14Te ba ki la sah hangta kham bun sngi, u Phistos u la buh ïa ka kam u Paul ha khmat u syiem, u da ong, “Don u briew ba la iehnoh teng da u Pheliks ha byndi. 15Shaphang jong u, mynba nga la don ha Jerusalem, ki rangbah lyngdoh bad ki tymmen basan jong ki Jiw ki la ïakren ha nga, ki da ïakyrpad ka jingkut bishar pyrshah ïa u. 16Ha kiba nga la ïathuh, ba kam long ka rukom ki nong Rom ban aiti noh ïa uno uno ruh u briew, haba uta u nongshah mudui um pat ïoh ïashem markhmat bad kita ki nongmudui, ba un ïoh lad ban da ïa lade shaphang kata kaba ki ïamudui ïa u. 17Namar kata, mynba ki la lah ïawan lang shane, ngam shym pyntud ei ei, hynrei, kum lashai nga la shong ha ka khet bishar, bad nga la hukum ban wallam ïa uta u briew. 18Shaphang jong u, haba kita ki nongmudui ki la mih, kim shym wallam ka jingmudui ïa u shaphang kita kiei kiei ruh ki basniew kumba nga la tharai ma nga. 19Hynrei, ki la ïadon ki jingïasaid ïaleh ïa u shaphang ka niam jong ki hi, bad shaphang uwei U Jisu ba la ïap, ïa uba u Paul u la ïathuh skhem ba u im. 20Nga te ba nga la sngewlyngngoh kumno ban tohkit shaphang kine kiei kiei ruh, nga la kylli lada un leit sha Jerusalem, bad ba hangta yn bishar ïa u shaphang kine kiei kiei. 21Hynrei, mynba u Paul u la lah appil ba yn iehnoh teng ïa u ïa ka jingbishar kut jong u Patsha, nga la hukum ban iehnoh teng ïa u tad ynda ngan ïoh phah ïa u ha u Kaisar.” 22Ynda kumta, u Agrippa u la ong ha u Phistos, “Nga hi ruh nga kwah ban ïohsngew ïa uta u briew.” U ruh u la ong, “Lashai men sa ïohsngew ïa u.”

23Kumta, kum lashai ynda la lah wan u Agrippa, bad ka Berniki, da ka jingpynpaw burom ka bakhraw, bad ba ki la lah rung sha ka kamra bishar lem bad ki rangbah shihajar bad ki rangbah kiba donnam jong kata ka nongbah, bad haba la hukum u Phistos, la wallam ïa u Paul ha khmat. 24Te u Phistos u la ong, “Ko syiem Agrippa, bad phi ki rangbah baroh kiba don ha khmat lem bad ngi, phi khmih ïa une u briew, shaphang uba u paidbah Jiw baroh u la wan ïakyrpad ha nga ha Jerusalem ruh bad hangne, ki da ïapyrta ba um dei ban im shuh. 25Hynrei, nga la shem ba um shym la leh ei ei ruh em kaba dei ban ïap, bad haba u hi u la lah appil ha u Patsha, nga la kut jingmut ban phah ïa u. 26Shaphang jong u ngam don ei ei ruh kaba thikna ban thoh ha la u kynrad. Naba kumta, nga la wallam ïa u ha khmat jong phi, bad kham tam ha khmat jong me, ko syiem Agrippa, ba hadien kaba kylli bniah ïa u, nga lah ban ïoh ei ei ban thoh. 27Namar ha nga ka ibieit haba phah ïa u nongsah byndi, ban ym pyni ruh ïa ki jingmudui bapyrshah ïa u.”

Currently Selected:

KI KAM 25: KHB

Highlight

Copy