KI KAM 24

Ka jingmudui pyrshah ïa u Paul

1Hadien san sngi te, u Ananias u rangbah lyngdoh u la leit hiar lem bad ki tymmen basan, bad uwei u Tertullos, u riewsaid; te ki la ïa-mihpaw ha khmat uta u lyngskor ïa ka ban ïaleh ïa u Paul. 2Bad ynda ki la khot ïa u, u Tertullos u la sdang ban mudui ïa u, u da ong,

3“Namar ba ngi ïaïoh da me shibun ka jingsuk, bad ïa ki kam basniew la pynbeit ha kane ka jaid bynriew da ka jingsumar jong me, ha kaei kaei baroh ruh bad ha ki jaka baroh ngi ïakohnguh, A u Pheliks u babha tam eh, lem bad ka jingsngewnguh baroh. 4Hynrei, ba ngan ym pynbtai ïa me, nga kyrpad ïa me na la ki jingisynei ban sngew ïa ngi shikyntien ar kyntien. 5Namar ngi la shem ïa une u briew u nongpynjot, bad uba shet ïa ka jingkhihwin hapdeng ki Jiw baroh kylleng ka pyrthei, u nongïalamphrang ruh ïa kata ka kynja niam jong ki Nasaret. 6U la pyrshang ruh ban pynsang ïa ka templ; ïa une te ngi la ïakem, bad ngi la ïakwah ban bishar kat kum ka hukum jong ngi. 7Hynrei, haba u Lusias uta u rangbah shihajar u la poi tiap, u la knieh jubor ïa u na ki kti jong ngi, 8u da hukum ïa ki nongmudui jong u ban wan ha me; na u, da kaba kylli ïit hi, me lah ban tip biang shaphang kine kiei kiei baroh kiba ngi ïamudui ïa u.”

9Bad kita ki Jiw ruh ki la ïakohnguh, ki da ïathuh skhem ba kine kiei kiei ruh ki la long kumta.

Ka jingïasaid-da u Paul ha khmat u Pheliks

10Te ynda uta u lyngskor u la kohnguh khlieh ïa u ban kren, u Paul u la ïathuh, “Namar ba nga tip ba me long la bun snem u nongbishar ha kane ka jaid bynriew, da kaba sngewbha nga ïasaid-da ïa lade, 11namar me lah ban tip ba ym pat palat khat-ar sngi naduh ba nga la leit kiew ban mane ha Jerusalem. 12Bad kim shym la shem ïa nga ba nga ïasaid nia ha ka templ badno badno ruh, lane pynkhihwin ïa u paidbah, lymne ha ki synagog, lymne ha kata ka nongbah; 13lymne kim lah ban pynsabut ha me ïa kita kiei kiei ïa kiba ki ïamudui ïa nga mynta. 14Hynrei, ïa kane nga phla ha me, ba ha kata ‘ka Lynti’ ïa kaba ki ïakhot ‘Ka niam kylla jaid’, kumta keiñ nga shakri ïa U Blei ki kpa jong ngi, da kaba ngeit ïa kiei kiei baroh kiba long katba kum Ka Hukum, bad kiba la thoh ha Ki Nongïathuhlypa; 15ba nga don ka jingkyrmen ha U Blei, ïa kaba kine hi ruh ki ïakhmih lynti, ba kan sa long ka jingmihpat ki baïap, ki bahok ruh bad ki bymhok. 16Ha kane, nga hi ruh nga pynmlien ïa lade, ban ïoh khlem da pud ka jingïatiplem ba khlem pynthut sha U Blei bad sha ki briew. 17#Ki Kam. 21:17-28.Te hadien bun snem, nga la wan ïa ka ban wallam ki jingai isynei ha ka para jaid jong nga, bad ki jingainguh: 18hapdeng kata, ki la shem ïa nga ba la pynkhuid ha ka templ, ym lem bad u paidbah, lymne bad ka jingkhihwin; 19hynrei, la don ki Jiw na Asia, kiba la dei ban don hangne ha khmat jong me, bad ban mudui lada ki la don ei ei pyrshah ïa nga. 20Lane kine hi to kin ïathuh, lada ki la shem ei ei ka bymdei katba nga la ïeng ha khmat ka dorbar, 21#Ki Kam. 23:6.lymda tang namar kane kawei ka ktien ïa kaba nga la pyrta mynba nga ïeng hapdeng jong ki, ‘Shaphang ka jingmihpat ki baïap la bishar ïa nga ha kane ka sngi ha khmat jong phi.’ ”

22Hynrei, u Pheliks ba u la tip kham janai shaphang kata “ka Lynti”, u la buh teng noh ïa ki, u da ong, “Ynda u Lusias u rangbah shihajar un wan hiar, ngan sa bishar kut ïa ka kam jong phi.” 23Te u la hukum ïa uta u rangbah shispah ba yn ap ïa u, hynrei, ban ym pyrkhing eh, bad ban ym khang ïano ïano ruh na ki lok jong u ban sumar ïa u.

U Paul ha khmat u Pheliks bad ka Drosila

24Ynda katto katne sngi, u Pheliks u la wan poi lem bad ka Drosila ka tnga jong u, kaba long ka Jiw, bad u la phah khot ïa u Paul, bad u la ïohsngew ïa u shaphang kata ka jingngeit ha U Khrist Jisu. 25Te katba u dang ïalap shaphang ka hok, bad ka bor halor lade, bad ka jingbishar ka ban sa wan, u Pheliks u la sheptieng; bad u la ïathuh, “Mynta, to khie leit noh shuwa; te ynda nga la lait por, ngan sa phah khot ïa me”; 26u la kyrmen ruh putet ban ïoh sbai na u Paul, naba kumta ruh u la phah khot ïa u kham bunsien, bad u la ïakren bad u. 27Hynrei, ynda la dap ar snem, u Porkios Phistos u la wan ha ka jaka u Pheliks; te u Pheliks ba u da mon ban pynsngewbha ïa kita ki Jiw, u la pynsah ïa u Paul ha ki 'saikhum.

Currently Selected:

KI KAM 24: KHB

Highlight

Copy