KI KAM 23

1Te u Paul haba u la khmih shaiñ ha kata ka dorbar u la ong, “Ko ki para, nga la ïaid beit ha ka jingïatiplem babha baroh ha khmat U Blei haduh kane ka sngi.” 2Bad u Ananias u rangbah lyngdoh, u la hukum ïa kita kiba la ïeng hajan jong u ban thab ïa u na ka shyntur. 3#Mat. 23:27,28.Ynda kumta, u Paul u la ong ha u, “U Blei un sa shoh ïa me, me ka kynroh ba la pynlieh! kumta du shong bishar ma me ïa nga kat ka hukum, pynban, da kaba pynkheiñ ïa ka hukum me phah thab ïa nga?” 4Te kita kiba la ïeng hajan ki la ïa-ong, “Me krenbeiñ ïa u rangbah lyngdoh jong U Blei?” 5#Eks. 22:28.U Paul u la ong, “Ngam shym la tip, ko ki para, ba u long u rangbah lyngdoh: naba la thoh, ‘Men ym kren sniew ïa u nongsynshar u paidlang jong me.’ ”

6 # Ki Kam. 26:5; Php. 3:5. Hynrei, haba u Paul u la ïohi ba kawei ka bynta ka long ki Saddusi, bad kawei pat ki Pharisi, u la pyrta noh ha ka dorbar, “Ko ki para, nga, nga long u Pharisi, u khun ki Pharisi; shaphang ka jingkyrmen bad ka jingmihpat ki baïap la bishar ïa nga.” 7Te ynda u la lah ong ïa kane, la mih buk ka jingïasaid hapdeng kita ki Pharisi bad kita ki Saddusi; bad uta u paidbah u la ïakad ar liang. 8#Mat. 22:23; Mrk. 12:18; Luk. 20:27.Namar ki Saddusi ki ïa-ong ba ym don ka jingmihpat, lymne ki angel, lymne ki mynsiem; hynrei, ki Pharisi ki ïaphla ïa ki baroh ar. 9Te la mih ka jingkhynwin jlang; bad haba la ïaïeng joit ki nongthoh kiba na ka liang ki Pharisi, ki la ïa-pyneh noh, ki da ong, “Ngim shem ka basniew ei ei ruh ha une u briew; hynrei, yn leh kumno lada ka mynsiem ka la kren ha u, lane u angel?” 10Te mynba la mih ka jingïasaid khynwin bakhraw, uta u rangbah shihajar ba u la sngewsheptieng ïoh kin bthat lyngkhot lyngkhot ïa u Paul, u la hukum ïa ki shipai ban leit hiar noh bad ban knieh kynthet ïa u napdeng jong ki, bad ban wallam noh ïa u shapoh kata ka kut.

11Te kum lashai mynmiet, U Trai u la ïeng hajan jong u, u la ong ruh, “To sngewshlur! Namar kumba me la phla shaphang jong nga ha Jerusalem, kumjuh ka dei ïa me ban phla ha Rom ruh.”

Ka jingïasylla ban pynïap ïa u Paul

12Te ynda la mih ka sngi, kiba na ki Jiw haba ki la ïasylla lang, ki la ïateh jingsmai paralok hi ki da ïakut ban ym bam lymne dih haduh ba kin da ïoh pynïap noh ïa u Paul. 13Ki la ïadon sawphew ngut tam kiba la ïa-pynlong ïa kane ka jingïashet. 14Haba ki la ïawan ha ki rangbah lyngdoh bad ki tymmen basan, ki la ïa-ong, “Ngi la ïateh paralok da ka jingtim bakhraw, ban ym mad ei ei ruh haduh ba ngin da ïoh pynïap noh ïa u Paul. 15Mynta, namar kata, ma phi lem bad ka dorbar to phin ïaphah ktien ha uta u rangbah shihajar, ba un ïalam noh arsut ïa u ha phi, kumba phin sa bishar kham bniah ïa ka kam jong u. Ngi te katba um pat poi hajan, ngi la ïakloi lypa ïa ka ban pynïap noh ïa u.”

16Hynrei, mynba u khun ka para u Paul u la ïohsngew shaphang kata ka jingïa-ap thap, u la wan bad u la leit rung sha kata ka kut, bad u la ïathuh ha u Paul. 17U Paul te haba u la khot ha u ïa uwei na kita ki rangbah shispah, u la ong, “To ïalam ïa une u samla ha u rangbah shihajar, namar u don ei ei ban ïathuh ha u.” 18Kumta, u la shim ïa u bad u la ïalam ïa u ha uta u rangbah shihajar bad u la ong, “U Paul u nongsah byndi, haba u la khot ha u ïa nga, u la kyrpad ïa nga ban ïalam ïa une u samla ha me, uba don ei ei ban ïathuh ha me.” 19Te uta u rangbah shihajar haba u la shim ïa u na ka kti bad haba ki la ïaleit kyrpang, u la kylli ïa u jar jar, “Me don aïu ban ïathuh ha nga?” 20Te u la ïathuh, “Ki Jiw ki la ïakut lem ban kyrpad ïa me ban ïalam arsut ïa u Paul lashai sha ka dorbar, kumba men sa kylli kham bniah shaphang jong u. 21Me, namar kata, wat kohnguh ïa ki; namar don sawphew ngut tam ki rangbah na ki kiba ïa-ap thap ïa u, kiba la ïateh paralok da ka jingsmai ban ym bam lymne dih haduh ba kin da ïoh pynïap noh ïa u: mynta ruh ki la ïakloi lypa, ba ki da ïakhmih lynti ïa kata ka jingkular na me.” 22Ynda kumta, uta u rangbah shihajar u la pyllait noh ïa uta u samla, u da hukum skhem ïa u ban ym ïathuh hano hano ruh ba u la lah pynpaw ïa kine kiei kiei ha u.

La phah ïa u Paul sha u Pheliks, u lyngskor

23Te haba u la khot ha u ar ngut na ki rangbah shispah u la ong, “Khreh arspah ngut ki shipai ba kin leit haduh Kaisaria, bad hynñiewphew ngut ki shipai shong kulai, bad arspah ngut ki nongbat sum, hamar kaba lai baje mynmiet: 24bad khreh ruh ki kulai, ba kin pynshong ïa u Paul halor, ba kin ïalam biang biang ïa u ha u Pheliks, u lyngskor.” 25Bad u la thoh ka shithi kaba kum kane:

26“U Klaudios Lusias, ha u Pheliks u lyngskor babha tam eh: khublei. 27Ïa une u briew la kem da ki Jiw, bad sa ba kin pynïap noh ïa u; te haba nga la wan lap ïa ki lem bad ki shipai, nga la pyllait noh ïa u, naba nga la ïoh tip skhem ba u long u trai-shnong Rom. 28Te ba nga da kwah ban tip ïa ka daw ba ki la mudui ïa u, nga la ïalam noh arsut ïa u sha ka dorbar jong ki; 29nga la shem ba la mudui ïa u shaphang ki jingïasaid ka hukum jong ki, hynrei, ba ym don ei ei ruh ka jingmudui ba dei ïa ka ban ïap lane ïa ka ban khum. 30Te ynda nga la tip ba kan long ka jingthap ïa une u briew, shisyndon noh keiñ nga la phah ïa u sha me, nga da hukum skhem ruh ïa kita ki nongmudui jong u ban ïathuh ha khmat jong me ïa kiei kiei ba ki ïaleh ïa u.”

31Ynda kumta, kita ki shipai, kumba la hukum ïa ki, ki la shim ïa u Paul bad ki la ïalam noh ïa u mynmiet haduh Antipatris. 32Te ha kaba lashai, ynda ki la iehnoh ïa kita ki shipai shong kulai ïa ka ban nang leit lem bad u, ki la ïawan phai pat sha kata ka kut. 33Te kita, haba ki la lah poi ha Kaisaria bad ba ki la lah ai ïa kata ka shithi ha u lyngskor, ki la wallam ïa u Paul ruh ha khmat jong u. 34Bad ynda u la lah pule ïa ka, u la kylli na kano ka muluk u long; te ynda u la tip ba u long na Kilikia, 35“Ngan bishar ïa me,” u ong, “ynda ki nongmudui jong me ruh ki la poi.” U la hukum te ban ap ïa u ha ka ïingbah u Herod.

Currently Selected:

KI KAM 23: KHB

Highlight

Copy