KI KAM 22

1“Ko ki para, bad ko ki kpa, to sngew ïa ka jingïasaid-da jong nga mynta ha phi.”

2Te haba ki la ïohsngew ba u la kren ha ki ha ka ktien Hebru, ki la kham sngap jar; bad u la ong,

3 # Ki Kam. 5:34-39. “Nga, nga long u Jiw, ïa uba la kha ha Tarsos ha Kilikia, hynrei, la pynnang ïa nga ha kane ka nongbah ha kjat u Gamaliel, ba la hikai ïa nga kat ka rukom babniah jong ka hukum ki kpa tymmen, nga da sngew-shitrhem shaphang U Blei, kat kumba phi baroh phi long ha kane ka sngi. 4#Eks. 22:28; Ki Kam. 8:3; 9:1-19; 26:9-18; Gal. 1:14.Bad nga uba la pynshitombeiñ ïa kane ‘Ka Lynti’ haduh ka jingïap, da kaba khum bad da kaba ai noh sha ki ïing byndi ïa ki briew shynrang bad kynthei, 5kumba uta u rangbah lyngdoh ruh, bad kata ka jingïaseng tymmen basan baroh, kin ïaphla shaphang jong nga. Na ki ruh, nga la ïoh ki shithi ha ki parabangeit, bad nga la leit noh sha Damaskos, ban sa wallam ruh ïa kita kiba don hangta kiba la khum sha Jerusalem, ïa ka ban ïoh pynshitom ïa ki.

U Paul u ïathuh kumno ba la pynkylla ïa u

6“Te ka la jia, katba nga nang leit lynti bad nang poi hajan Damaskos, hamar shiteng sngi, ba kyndit kyndit la tyngshaiñ lep na bneng ka jingshai bakhraw baroh sawdong ïa nga. 7Te nga la kyllon kram ha khyndew, bad nga la ïohsngew ka ktien ba ong ha nga, ‘Saul, Saul, balei me pynshitombeiñ ïa nga?’ 8Nga te nga la ïathuh, ‘Me long uei, A Trai?’ Te u la ïathuh ha nga, ‘Nga long U Jisu uba na Nasaret, ïa uba pynshitombeiñ ma me.’ 9Kita ruh kiba don lem bad nga ki la ïohi shisha ïa kata ka jingshai, hynrei, kim shym la ïohsngew ïa kata ka ktien jong uta uba la kren bad nga. 10Te nga la ong, ‘Aïu ngan leh, A Trai?’ Ynda kumta, U Trai u la ïathuh ha nga, ‘To ïeng joit, to khie leit ruh sha Damaskos; bad yn ïathuh ha me hangta shaphang kiei kiei baroh kiba la buh khnang ïa me ban leh.’ 11Te haba ngam imat namar ka jingtyngshaiñ jong kata ka jingshai, da kaba btin na ka kti ïa nga da kita kiba ïadon bad nga, nga la poi ha Damaskos.

12“Te uwei u Ananias, u briew uba riewblei kat Ka Hukum, ïa uba la ïaphla babha da ki Jiw baroh kiba ïashong hangta, 13haba u la wan ha nga, bad u la ïeng hajan, u la ong ha nga, ‘Ko Saul, u para jong nga, to men ïoh peit pat!’ Nga te ha kata kajuh ka por nga la khmied sha u. 14U la ong ruh, ‘U Blei ki kpa jong ngi u la thung ïa me ban tip ïa ka mon jong u, bad ban ïohi ïa uta U Bahok, bad ban ïohsngew ïa ka ktien na ka shyntur jong u. 15Naba men ïoh long u nongphla na ka bynta jong u ha ki briew baroh, shaphang kita kiba me la ïohi bad ba me la ïohsngew. 16Mynta te, balei me pyntud? To ïeng, to shah ba yn pynbaptis ïa me bad sait noh ïa ki pop jong me, da kaba khot kyrpad ïa ka kyrteng jong u.’

Ka jingkhot u Paul ban ïalap sha ki Jentil

17“Te ka la jia, mynba nga la lah wan phai pat sha Jerusalem, bad katba nga dang duwai ha ka templ, ba nga la long ha ka jinglong rngai, 18bad nga la ïohi ïa u, ba u ong ha nga, ‘To pynkloi noh me, bad khie leit noh kyrkieh na Jerusalem, naba kin ym pdiang ïa ka jingphla jong me shaphang jong nga.’ 19Nga te nga la ïathuh, ‘A Trai, ki hi ki ïatip ba nga la ju set byndi bad sympat ha ki synagog baroh ïa kita kiba la ngeit ha me, 20#Ki Kam. 7:58.bad mynba la pynmih noh ïa ka snam u Stephan u nongphla jong me, nga hi ruh nga la ïeng hajan, bad nga da kohnguh, bad nga da sumar ïa ki jaiñ jong kita kiba ïa-pynïap noh ïa u!’ 21U la ong te ha nga, ‘To khie leit noh; naba nga ngan phah noh ïa me jngai nangne sha ki Jentil.’ ”

U Paul bad u Rangbah Shi hajar

22Te ki la ïasngap ïa u haduh kane ka ktien. Ynda kumta, ki la ïa-pynjam noh ïa ka ktien jong ki, bad ki la ïa-ong, “To da shim duh noh kum ïa uta na ka khyndew! Kam dei ïa u ban ïoh im!” 23Te haba ki dang ïapyrta jam noh, bad ki bred noh bak ïa la ki jaiñkup, bad ki kynting pui pui sha ka suiñ, 24uta u rangbah shihajar u la hukum ban ïalam ïa u shapoh kata ka kut, u da hukum ban kylli ïit ïa u da ki jingsympat, ba un ïoh tip na kano ka daw ba ki la ïapyrta kumta pyrshah ïa u. 25Te ynda ki la lah khum ïa u da ki 'sai snieh, u Paul u la ong ha uta u rangbah shispah uba la ïeng hajan, “Ka dei ne em ïa phi ban sympat ïa u briew uba long u trai-shnong Rom, khlem da bishar ruh?” 26Te mynba uta u rangbah shispah u la lah ïohsngew ïa kata, u la leit ïathuh ha uta u rangbah shihajar, u da ong, “To khmih men sa leh aïu? Namar une u briew u long u trai-shnong Rom.” 27Te uta u rangbah shihajar u la wan bad u la ong ha u, “To ïathuh ha nga, me long shisha u trai-shnong Rom?” U la ïathuh te, “Ho-oid.” 28Te uta u rangbah shihajar u la ïathuh, “Da ka spah kaba bun nga la ïoh thied ïa kane ka jinglong trai-shnong.” U Paul u la ong, “Hynrei, ïa nga la kha kumta.” 29Kumne kumne ruh, namar kata, ki la kynriah noh na u kita ki ban sa tohkit ïa u; bad uta u rangbah shihajar ruh u la sheptieng haba u la tip ba u long u trai-shnong Rom, bad naba u la lah khum ïa u.

U Paul ha khmat ka dorbar

30Te kum lashai, ba u da kwah ban tip thikna namar balei la mudui ïa u da kita ki Jiw, u la loit noh ïa u na kita ki jingkhum, bad u la hukum ïa ki rangbah lyngdoh, bad ïa kata ka dorbar baroh ban ïawan lang; te haba u la ïalam arsut ïa u Paul, u la pynïeng ïa u ha khmat jong ki.

Currently Selected:

KI KAM 22: KHB

Highlight

Copy