KI KAM 21

U Paul u leit sha Jerusalem

1Ka la jia te, hadien ba ngi la ïakhlad noh na ki, bad ba la lah pynmih noh ïa ka lieng, ngi la ïawan poi da ka lynti kaba beit sha Kos, bad kum lashai sha Rhodos, nangta ruh sha Patara. 2Haba ngi la shem te ïa ka lieng kaba leit sha shiliang sha Phoiniki, ngi la leit kiew ha ka bad ngi la ïa-pynmih noh. 3Te ynda la lah paw ka Kypros ha ngi, bad ba ngi la iehnoh ïa ka sha kadiang, ngi la nang leit sha Syria, bad ngi la kiew ryngkew ha Tyros; namar hangta kata ka lieng kan sa sei noh ïa ka jingkit jong ka. 4Te ynda ngi la shem ïa ki synran, ngi la sah hangta hynñiew sngi; te kine ki la ïa-ong ha u Paul da U Mynsiem, ba un ym leit kiew sha Jerusalem. 5Hynrei, haba ngi la lah pyndep noh ïa kita ki sngi, ngi la ïamih noh bad ngi la nang leit la ka lynti; te ki baroh lem bad ki tnga bad ki khun, ki la ïaleit on lynti ïa ngi haduh bar shnong; te ynda ngi la ïadem la ki khohsiew harud duriaw ngi la ïaduwai. 6Ynda ngi la lah ïakhublei paralok hi, ngi la ïaleit kiew noh sha kata ka lieng; ki te ki la ïaleit phai pat sha la ïing.

7Ngi te, da kaba pyndep noh ïa la ka jingleit da ka lieng na Tyros, ngi la poi ha Ptolemais; bad haba ngi la ïakhublei ïa ki parabangeit, ngi la sah shi sngi bad ki. 8#Ki Kam. 6:5; 8:5.Te kum lashai ynda ngi la leit noh, ngi la ïapoi sha Kaisaria: bad haba ngi la ïarung hapoh ka ïing u Philip u nongïathuhkhana, uba la long uwei na kita ki hynñiew ngut, ngi la ïasah bad u. 9Une te, u la don saw ngut ki khun kynthei, ki theisotti, kiba ïathuhlypa. 10#Ki Kam. 11:28.Te haba ngi la ïaisah hangta bun sngi, la wan hiar na Judia uwei u nongïathuhlypa, uba kyrteng “u Agabos”. 11Te ynda u la wan ha ngi, bad ba u la shim ïa ka panpoh jong u Paul, u la khum ïa la ki jong ki kti bad kjat, bad u la ong, “Kumne u ong U Mynsiem Bakhuid: ‘Ïa uta u briew uba dei trai kane ka panpoh, kita ki Jiw kin ïakhum kumne ha Jerusalem, bad kin ïa-ai noh ha ki kti ki Jentil.’ ” 12Te mynba ngi la ïohsngew ïa kine kiei kiei ruh, ma ngi bad kita kiba shong sah hangta, ngi la ïakyrpad ïa u ban ym leit kiew sha Jerusalem. 13Hynrei, u Paul u la ïathuh, “Phin lei da kaba ïam bad da kaba pynpait ïa ka dohnud jong nga? Namar nga, nga la kloi ym tang ban shah khum, hynrei, ban ïap ruh ha Jerusalem na ka bynta ka kyrteng U Trai Jisu.” 14Te haba um kohnguh, ngi la keiñ noh, da kaba ong, “Ïa ka mon U Trai yn leh.”

15Te hadien kita ki sngi, ngi la ïakhreh la ki jingkit jingbah, bad ngi la ïaleit kiew noh sha Jerusalem. 16La don ruh ki synran na Kaisaria kiba la ïawan ryngkat bad ngi, ki da wallam ryngkat bad ki, ïa uwei u Mnason na Kypros, u synran barim, bad uba ngi la dei ban shong basa.

U leit jngoh ïa u Jakob

17Te mynba ngi la lah poi ha Jerusalem, ki parabangeit da kaba kmen ki la ïa-pdiang ïa ngi. 18Ha ka sngi kaba bud te, u Paul u la leit rung lem bad ngi sha u Jakob; te ki tymmen basan baroh ki la ïadon hangta. 19Te haba u la lah ïakhublei ïa ki, u la ïathuh kawei pa kawei ïa kita kiei kiei kiba U Blei u la lah leh hapdeng ki Jentil da ka jingtrei jong u. 20Ki te haba ki la ïohsngew, ki la pyndonburom ïa U Blei, bad ki la ong ha u, “Me ïohi, ko para, katno phew hajar ki Jiw ki don kiba la ngeit, baroh ruh ki ïalong kiba sngew-shitrhem shaphang ka hukum. 21Bad la pynbna ha ki shaphang jong me, ba me hikai ïa ki Jiw baroh kiba hapdeng ki Jentil, ïa ka ban lyndet ïa u Moses; me da hukum ïa ki, ban ym otsher ïa la ki khun, lymne ban ïaid katba kum ki niam ki rukom. 22Namar kata te, kumno? Khlem pep kin ïohsngew ba me la wan. 23#Jkñ. 6:13-21.Namar kata, to men leh ïa kane kaba ngi ong ïa me. Don bad ngi saw ngut ki rangbah kiba la teh ïa lade da ka jingsmai; 24shim ïa kine, bad pynkhuid ïa lade lem bad ki, bad men siew ruh na ka bynta jong ki, ba kin ïoh khi ïa la ki khlieh; kumta baroh kin ïoh tip, ba kim long ei ei ruh em kita kiei kiei kiba ki la ïabna shaphang jong me, hynrei, ba me hi ruh me ïaid beit, da kaba sumar ïa ka hukum. 25#Ki Kam. 15:29.Hynrei, shaphang kita ki Jentil kiba la ngeit, ngi la ïathoh, ba ngi la ïarai ba kin kyndiah noh na kita kiei kiei ba la kñia ïa ki bleithaw, bad na ka snam, bad na kaba la khyrwait, bad na kaba klim.” 26Hangta u Paul u la shim ïa kita ki briew; te kum lashai haba u la pynkhuid ïa lade lem bad ki, u la leit shapoh ka templ, u da pynbna ïa ka jingpyndep ïa ki sngi ka jingpynkhuid, tad ynda la ainguh ïa ka jingainguh na ka bynta uwei pa uwei na ki.

La kem ïa u Paul ha ka templ

27Te hamar ban sa kut kita ki hynñiew sngi, kita ki Jiw na Asia, haba ki la ïohi ïa u ha ka templ, ki la ïa-pynkynroi buk ïa uta u paidbah baroh, bad ki la kem ïa u, 28ki da ïapyrta noh, “Ko rangbah Israel, to ïarap kloi! Dei une u briew uba hikai kylleng la kylleng ruh ïa ki briew baroh ban ïaleh ïa u paidlang, bad ïa ka hukum, bad ïa kane ka jaka! Bad nalor kata, u la ïalam ïa ki Grik ruh hapoh ka templ, bad u la pyntngit ïa kane ka jaka bakyntang!” 29#Ki Kam. 20:4.(Namar ki la lah ïohi mynshuwa ha kata ka nongbah lem bad u ïa u Trophimos u nong Ephesos, ïa uba ki la ïatharai ba u Paul u la lah ïalam hapoh ka templ.) 30Te ka la khihwin jlang baroh kawei ka nongbah. Bad u paidbah u la ïaphet kyrthep lang, bad haba ki la kem ïa u Paul, ki la ïaring noh ïa u shabar ka templ; bad kumne kumne la khang noh ïa ki jingkhang. 31Te katba ki dang pyrshang ban pynïap noh ïa u, la wan ka khubor ha u rangbah shihajar jong ka kynhun ki shipai, ba la khihwin jlang baroh kawei ka Jerusalem. 32Kumne kumne ruh, u la shim ïa ki shipai bad ïa ki rangbah shispah, bad u la phet arsut sha ki, ki te haba ki la ïohi ïa uta u rangbah shihajar bad ïa ki shipai, ki la sangeh na kaba shoh ïa u Paul. 33Te u rangbah shihajar u la wan hajan, bad u la kem ïa u; bad u la hukum ban khum ïa u da ki ar tylli ki kynjri, bad u la ïakylli u long uei, bad aïu ba u la leh. 34Te kiwei ki la ïapyrta ïa kane, kiwei pat ïa kata, hapdeng uta u paidbah, te haba um lah ban tip ïa kaba shisha namar kata ka jingkhihwin, u la hukum ban ïalam noh ïa u shapoh ka kut. 35Mynba u la poi te ha ki kyrdon, ka la jia ban bah ïa u da kita ki shipai, namar ka jingleh-jubor jong uta u paidbah, 36namar u paidbah byllien jong uta u paidlang u la bud nadien, u da ïapyrta, “To da shim duh noh ïa u!”

U Paul u ïasaid-da ïa lade

37Te ha ban sa ïalam ïa u Paul shapoh kata ka kut, u la kylli ïa uta u rangbah shihajar, “Ka bit ne em ïa nga ban ong ei ei ha me?” U te u la kylli, “Me nang kren Grik! 38Me mem long shisha uta u nong Ijipt, uba mynshuwa kine ki sngi u la shet ïa kita ki saw hajar ki dakaid bad u la ïalam noh sha ka ri khlaw?” 39U Paul u la ïathuh te, “Nga, nga long u Jiw uba na Tarsos ha Kilikia, u trai-shnong ka nongbah kaba donnam. Nga kyrpad ïa me, to shah ïa nga ban kren ha u paidbah.” 40Te ynda u la lah shah ïa u, u Paul u da ïeng ha kita ki kyrdon, u la kaweh ha uta u paidlang; te ynda la long ka jingsngap jar jak, u la kren ha ki ha ka ktien Hebru kumne:

Currently Selected:

KI KAM 21: KHB

Highlight

Copy