KI KAM 20

Sha Makedonia bad ka ri Grik

1Te haba la wai noh kata ka jingkhihwin, ynda u Paul u la lah phah khot ïa ki synran, bad ba u la lah sneng ïa ki, u la khublei ïa ki bad u la mih noh ban leit sha Makedonia. 2Te ynda u la lah leit lyngba ïa kita ki phang, bad ba u la lah ai jingsneng shibun ïa ki, u la wan sha ka ri Grik. 3Bad haba u la shong hangta lai bnai, bad ba la pynlong ka jingthap ïa u da ki Jiw, haba un sa mih noh da ka lieng sha Syria, u la kut jingmut ïa ka ban leit phai pat lyngba ïa ka Makedonia. 4Te la leit lem bad u haduh Asia, u Sopater u nong Beria, u khun u Pyrrhos; bad na ki Thessaloni, u Aristarkhos bad u Sekundos; bad u Gaïos u nong Derbi, bad u Timothi: bad na Asia, u Tukhikos bad u Trophimos. 5Hynrei, kine ki la lah leit sha shuwa, bad ki ïa-ap ïa ngi ha Troas. 6Te ngi, ngi la ïaleit mih noh da ka lieng na Philipi, hadien ki sngi U Kpu Bakhlem Thiat, bad ngi la wan poi ha ki sha Troas ha ki san sngi; hangta ngi la shong hynñiew sngi.

Ka jingleit ka bakhatduh u Paul sha Troas

7Te ha ka sngi nyngkong ka taïew, mynba ngi la wan ïaseng ïa ka ban kdiah kpu, u Paul u la ïalap ha ki, ba un sa leit noh lashai; te u la pynslem ïa la ka jingïalap haduh shiteng synñia. 8Te la don shibun ki sharak ha kata ka kamra ba sha jrong, ha kaba ngi la ïaseng. 9Te uwei u samla uba kyrteng “u Eutikhos” uba la shong ha ka jingkhang ïit, ba la shoh samthiah lyngngai ïa u, katba u Paul u kham ïalap slem, u la kyllon na kata kaba ïohthiah, bad u la hap arsut na ka balai mala bad la rah ïap ïa u. 10U Paul te ynda u la leit hiar u la dem halor jong u, bad haba u la kynthup ïa u, u la ong, “Phi wat khuslai, namar ka mynsiem jong u ka don ha u.” 11Te haba u la lah leit kiew pat, bad ba u la lah kdiah ïa uta u kpu, bad ba u la lah bam, bad ba u la lah ïakren bad ki kham slem ha ban da shai byrngut, kumta u la leit noh. 12Bad ki la ïawallam im ïa uta u samla, te la pyntngen ïa ki ym khyndiat.

Na Troas sha Miletos

13Ngi te haba ngi la leit sha shuwa ha kata ka lieng, ngi la ïa-pynmih noh sha Assos, nangta ngi da ïamut ban kyntiew halor lieng ïa u Paul, namar kumta u la lah ïabuh, u da sngewbha hi ban ïaid ryngkew. 14Te haba u la ïashem bad ngi ha Assos, ngi la kyntiew lieng ïa u, bad ngi la ïawan poi sha Mitylini. 15Nangta ruh ynda ngi la ïamih noh da ka lieng, ngi la wan kum lashai ha pyrshah ka Khios; bad ha kawei pat ka sngi, ngi la ïapoi ryngkew ha Samos, bad ha ka sngi kaba bud ngi la ïawan poi sha Miletos. 16Namar u Paul u la lah thmu bad ïaid kiar ïa ka Ephesos, ba un ym pynslem shuh ha Asia; namar u la pynkloi lada lah ïa ka ban don ha Jerusalem ha ka sngi Pentekost.

U Paul u khot lang ïa ki tymmen basan ha Miletos

17Te na Miletos haba u la phah sha Ephesos, u la khot ha u ïa ki tymmen basan jong kata ka balang. 18Te ynda ki la lah poi ha u, u la ong ha ki, “Phi hi phi tip, naduh ka sngi ka banyngkong ba nga la wan sha Asia, kumno nga la leh ïa lade hapdeng jong phi baroh shi katta, 19ba nga da shakri ïa U Trai da ka jingsngewrit baroh, bad ha ki jingjaw ummat bad ki jingtynjuh kiba la jia long ha nga da ki jingthap jong ki Jiw; 20kumno ba ngam shym la pep ban ïathuh ha phi ïa kiei kiei baroh kiba pynmyntoi, bad ban hikai ïa phi ha kaba paw, bad ha ki ïing ki ïing, 21da kaba phla ha ki Jiw bad ha ki Grik de ïa ka jingkylla-ka-bamut sha U Blei, bad ïa ka jingngeit ha U Jisu Khrist uba U Trai jong ngi. 22Mynta te, ha khmih, nga, nga leit noh ba la khum ha ka mynsiem sha Jerusalem, ngam da tip ïa kiei kiei ruh ki ban jia ïa nga hangta; 23hynrei, tang ba U Mynsiem Bakhuid u phla shai ha nga ha kawei pa kawei ka shnong, u da ong, ba ki jingkhum bad ki jingshitom ki ïa-ap ïa nga. 24#2 Tim. 4:7.Hynrei, nga kheiñduh ïa la ka jingim, bad ngam ñiewkor shuh ïa ka, ba kumta ngan ïoh pyndep noh ïa ka jingphet jong nga, bad ïa kata ka kam U Blei kaba nga la ïoh na U Trai Jisu, ïa ka ban phla ïa ka gospel ka jingaiei U Blei. 25Mynta ruh, ha khmih nga tip ba phi baroh, hapdeng kiba nga la leit kylleng da kaba ïalap ïa kata ka hima, phin ym ïohi shuh ïa ka khmat jong nga. 26Naba kumta, nga phla ha phi ha kane ka sngi, ba nga khuid na ka snam ki briew baroh. 27Namar ngam shym la pep ban ïathuh ha phi ïa ka mon ka jong U Blei baroh. 28To sumar shaphang ïa lade bad shaphang kata ka kynhun baroh, ha kaba U Mynsiem Bakhuid u la pynlong ïa phi ki nongsharai, ban bsa ïa ka balang U Blei, ïa kaba u la thied da ka snam jong u hi. 29Nga tip ba hadien kane ka jingleit noh jong nga, ki suri barunar sat kin ïabsut hapdeng jong phi, kim da isynei ïa kata ka kynhun; 30bad napdeng jong phi hi ruh, ki rangbah kin ïamih kiba ïalap ïa kiei kiei ruh kiba bakla, ïa ka ban ring pah ïa ki synran hadien jong ki. 31Naba kumta, to ïasharai, da kynmaw ruh ba jin lai snem, mynmiet bad mynsngi, ngam shym la wai noh ban sneng ïa uwei pa uwei na phi da ki jingjaw ummat. 32Te mynta, nga aiti noh ïa phi ha U Blei, bad ha ka ktien ka jingaiei jong u, uba lah ban ïaitei ïa phi, bad ban ai ha phi ka bynta hapdeng kita baroh ïa kiba la pynkhuid. 33Ka rupa, lane ka ksiar, lane ka jaiñkup jongno jongno ruh, ngam shym la ikwah; 34phi hi phi tip ba kine ki kti ki la trei ban pyndap ïa ki jingdonkam jong nga, bad ki jong kita kiba don lem bad nga. 35Ha kiei kiei baroh, nga la pyni rukom ha phi, ba da kaba trei minot kumta, ka dei ban shan bor ïa ki batlot, bad ban kynmaw ïa ki ktien U Trai Jisu ba u hi u la ong, ‘Ka kham suk ban ai ban ïa kaba pdiang.’ ”

36Te ynda u la lah kren kumne, u la dem la ki khohsiew, bad u la duwai lem bad ki baroh. 37Te ki la ïam shibun baroh, bad ki la dem ha ka ryndang u Paul, bad ki la ïadoh ïa u, 38ki da ïasngewsih kham tam eh namar kata ka ktien ïa kaba u la lah ong, ba kin ym ïoh khmih shuh ïa ka khmat jong u. Te ki la ïaleit on lynti ïa u sha kata ka lieng.

Currently Selected:

KI KAM 20: KHB

Highlight

Copy