KI KAM 19

U Paul ha Ephesos

1Ka la jia mynba u Apollos u don ha Korinth, ba u Paul, ynda u la leit lyngba ïa kita ki phang kiba shaneng, u la wan sha Ephesos, bad u la shem ïa kiba long synran: 2bad u la kylli ïa ki, “Phi la pdiang ne em ïa U Mynsiem Bakhuid mynba phi la ngeit?” Bad ki la ïathuh ha u, “Em, ngim shym la ïohsngew wat lada la don ne em U Mynsiem Bakhuid.” 3Ynda kumta, u la kylli ïa ki, “Ha kaei te la pynbaptis ïa phi?” Ki te ki la ïathuh, “Ha ka jingbaptis u Ïoannis.” 4#Mat. 3:11; Mrk. 1:4,7,8; Luk. 3:4,16; Ïoan. 1:26,27.Te u Paul u la ong, “U Ïoannis u la pynbaptis da ka jingbaptis ka jingkylla-ka-bamut, u da ong ha u paidbah ba ki dei ban ngeit ha uta u ban sa wan hadien jong u, kata, ha U Jisu.” 5Ynda ki la ïohsngew te ïa kane, la pynbaptis ïa ki ha ka kyrteng U Trai Jisu. 6Te ynda u Paul u la lah buh ïa la ki kti ha ki, U Mynsiem Bakhuid u la wan ha ki, bad ki la kren da ki thylliej bad ki la ïathuhlypa. 7Te ki la don baroh kumba khat-ar ngut ki rangbah.

8Te u la leit rung shapoh ka synagog, bad u la kren shlur jin lai bnai, u da pyni nia bad pynkohnguh shaphang kiei kiei ki jong ka hima U Blei. 9Hynrei, mynba don kiba la pyneh ïa lade, bad kim ngeit, ki da kren sniew ïa kata “ka Lynti” ha khmat u paidbah, u la kynriah noh na ki, bad u la pynkyrpang ïa ki synran, ha la ka sngi u da pyni nia ha ka skul u Turannos. 10Bad kane ka la long ruh haduh ar snem; kumta, kita baroh kiba shong ha Asia ki la ïohsngew ïa ka ktien U Trai, ki Jiw ruh bad ki Grik.

Ki khun u Skeba

11Te U Blei u la ju leh ki kambah kiba kham khyllah da ki kti u Paul; 12kat haduh ba ki la leit lam ha ki bapang ïa ki rumar lane ki jaiñ kyrshah na ka met jong u, ki jingpang te ki la jah noh na ki, bad ki mynsiem bymman ki la mih noh. 13Hynrei, don kiba na ki Jiw kiba shang kylleng, ki nongbeh ksuid, ki la leh mynkhot halor kita kiba shong ki mynsiem bymman ïa ka kyrteng U Trai Jisu, ki da ong, “Nga pynsmai ïa phi ha uta U Jisu, ïa uba u Paul u ïalap.” 14Te la don hynñiew ngut ki khun uwei u Skeba, u Jiw, u rangbah lyngdoh ruh, kiba la leh ïa kane. 15Te uta u mynsiem bymman u la ïathuh bad u la ong ha ki, “Ïa U Jisu nga ithuh, bad ïa u Paul nga ithuh, hynrei, ma phi, phi long kiei?” 16Te uta u briew, ha uba la shong uta u mynsiem bymman u la sied ha ki, bad u la leh jubor ïa ki, bad u la jop ïa ki, katba ki la ïaphet ïap noh na kata ka ïing lyngboit bad ba la mong. 17Te baroh ki la bna ïa kane, bad Jiw bad Grik, kiba shong ha Ephesos; ka jingsheptieng te ka la kem ïa ki baroh, bad ïa ka kyrteng U Trai Jisu la pynkhraw. 18Shibun te na kita kiba la lah ngeit ki la ïawan, ki da ïaphla bad ki da ïathuh ïa la ki jingleh. 19Bad ym khyndiat na kita kiba ju leh ïa ki jingleh myntor, ki la ïawallam lang ïa la ki kitab, bad ki la ïathang ïa ki ha khmat ki briew baroh: te ki la ïakheiñ lang ïa ka dor jong ki, bad ki la shem ba ka long sanphew hajar ki sbai rupa. 20Kumta, da ka bor bah eh ka ktien jong U Trai ka la roi, bad ka la jop ruh.

Ka jingkhihwin ha Ephesos

21Te ynda la dep kine kiei kiei ruh, u Paul u la thmu ha la ka mynsiem, ynda u la leit lyngba ïa ka Makedonia bad ka Akhaïa, ban leit sha Jerusalem, u da ong, “Ynda nga la poi hangta, ka dei ïa nga ban ïohi ïa ka Rom ruh.” 22Te ynda u la phah noh sha Makedonia ar ngut na kita kiba ju synran ïa u, u Timothi bad u Erastos, u hi u la nang sah ha Asia katto katne.

23Mynkata te, la mih ka jingkhihwin ym khyndiat shaphang kata Ka Lynti. 24Namar uwei u briew uba kyrteng “u Dimetrios” u bania, uba ju thaw da ka rupa ïa ki dur ïingmane jong ka Diana, u la ju pynïoh kam ym khyndiat ïa ki nongtrei; 25ïa kiba u la pynïalum lang, lem bad ki para nongtrei kiba trei kajuh ka kam, bad u la ong, “Ko rangbah, phi tip ba na kane ka kam ka long ka spah jong ngi. 26Bad phi ïohi bad phi ïohsngew ruh, ba ym tang ha Ephesos hi, hynrei, la jan ha baroh kawei ka Asia, une u Paul u la pynkohnguh bad u la pynkylla noh ïa u paidbah babun, u da ong, ba kim long ki blei kita kiba la thaw da ki kti; 27kumta, ym tang ba la don jingma ba kane ka kam jong ngi kan kylla kaba ibeiñ, hynrei, ba yn ym ñiew ei ei ruh em ïa ka ïingmane ka Diana ruh, kane ka blei kaba khraw, bad yn pynduh noh ruh ïa ka jinglong khraw jong ka, ïa kaba ka Asia baroh kawei bad ka pyrthei ki ïamane.”

28Te haba ki la ïohsngew ïa kane, la pyndap ïa ki da ka jingbitar, bad ki la ïapyrta noh, ki da ong, “Kaba khraw ka Diana ka jong ki Ephesos!” 29Te la pyndap ïa kata ka nongbah da ka jingkhihwin; haba ki la kem ñiat te ïa u Gaïos bad ïa u Aristarkhos, kiba na Makedonia, ki para ba ïaleit lem bad u Paul, ki la ïaphet kyrthep ruh da kawei ka jingmut sha ka ïing seng ka shnong. 30Te mynba u Paul u da thew ban leit hapoh sha uta u paidbah, ki synran kim shah ïa u. 31Te don ruh ki rangbah Asia, ba ki long ki lok jong u, ki la ïaphah ha u, bad ki la ïakyrpad ïa u ban ym nud leit ha kata ka ïing seng ka shnong#19:31 ka ïing seng ka shnong: Ha ki Edition barim jong Ka Baibl Khasi ka kyntien ka ha shuwa ka kyntien shnong ka don. La buh biang hangne namar ka pynshai ïa ka jingmut.. 32Hangta te don kiba la ïapyrta ïa kane, bad kiwei pat ïa kata: namar la pynkulmar ïa uta u paidbah; te kiba kham bun kim shym tip na ka bynta aïu ki la ïawan lang. 33Te ki la ïa-pynmih na uta u paidbah ïa u Aleksander, ki Jiw ki da ïakyntuit sha khmat ïa u. Te u Aleksander u la kaweh da ka kti bad u la mut ban ïasaid-da ha uta u paidbah. 34Hynrei, ynda ki la tip ba u long u Jiw, la mih buk kawei ka jingpyrta na ki baroh, jin haduh ar kynta, ki da ïapyrta jam, “Kaba khraw ka Diana ka jong ki Ephesos!” 35Te ynda u nongthoh ka shnong u la lah pynjar jar ïa uta u paidbah, u la ong, “Ko phi ki rangbah Ephesos, uno u briew u bymtip ba kane ka nongbah ki Ephesos ka long ka nongsumar ïa ka templ jong ka Diana kaba khraw, bad ïa kata ka durblei kaba la hap na u Jupiter? 36Namar kata te, haba ïa kine kiei kiei ruh ym lah ban len, ka dei ba phin long jar jar, bad ban ym leh thurmur ei ei ruh em. 37Namar phi la wallam hangne ïa kine ki rangbah, ki bymlong kiba tuh kyntang, lymne kiba ïakrenbeiñ ïa ka blei jong ngi. 38Namar kata, lada u Dimetrios, bad kita ki nongtrei lem bad u, ki ïadon ka jingmudui pyrshah ïano ïano ruh, ki don ki ïing kashari, ki don ruh ki lyngskor; to kin ïatian bishar paralok hi. 39Hynrei, lada phi ïawad ei ei ruh shaphang kiwei pat ki kam, yn pyndep ïa ki ha ka jingïaseng kaba katba kum ka aiñ. 40Namar la dei sa ban mudui ïa ngi namar ka jingkhihwin ha kane ka sngi, ba ka long kaba khlem daw, bad ngin ym lah ban sei nia na ka bynta kane ka jingïalang bakhynwin.” 41Te ynda u la lah kren kumne, u la pynpra noh ïa kata ka jingïaseng.

Currently Selected:

KI KAM 19: KHB

Highlight

Copy