KI KAM 17

Ka jingkhihwin ha Thessaloni

1Te haba ki la leit lyngba ïa ka Amphipolis bad ka Appollonia, ki la poi ha Thessaloni, ha kaba la don ka synagog jong ki Jiw. 2Te u Paul, kumba u ju leh, u la leit rung ha ki, bad lai sngi Sabbaton u la pyni nia ha ki na Ki Jingthoh, 3da kaba batai bad da kaba ong skhem, ba ka la dei ïa U Khrist ban shah, bad ban mihpat na ki baïap; bad ba “une U Jisu, ïa uba nga, nga ïalap ha phi, u long uta U Khrist.” 4Te don na ki, kiba la ngeit, bad ki la ïasoh lok bad u Paul bad u Silas, bad u paidbah babun na ki Grik bariewblei, bad na ki kynthei ki bakhraw batri ym khyndiat. 5Hynrei, kita ki Jiw da kaba sngewpihuiñ, ki la ïakhot lok ïa ki briew bathala na ki kynja bapoh, bad haba ki la pynlang paidbah, ki la ïa-pynkhihwin jlang ïa kata ka nongbah; bad haba ki la ïeng ïaleh ïa ka ïing u Jason, ki la ïapyrshang ban pynmih noh ïa ki sha uta u paidbah. 6Te haba kim shym la shem ïa ki, ki la ïaring noh ïa uta u Jason bad ïa kiba na ki parabangeit ha khmat ki nongsynshar ka shnong, ki da pyrta, “Kine kiba la pynkylla khongpong ïa ka pyrthei ki la wan poi hangne ruh! 7ïa kiba u Jason u la khot ïing: bad kine baroh ki ïaleh pyrshah ïa ki hukum u Kaisar, ki da ong ba don uwei pat u syiem, U Jisu.” 8Te ki la ïa-pynlyngngoh ïa uta u paidbah bad ïa ki nongsynshar ka shnong haba ki la ïohsngew ïa kine kiei kiei ruh. 9Hynrei, ynda ki la lah shim ka jingbahkhlieh na uta u Jason bad na kita kiwei pat, ki la pyllait noh ïa ki.

Ki Apostol ha Beria

10Te kita ki parabangeit kumne kumne ruh ki la phah noh ïa u Paul bad u Silas mynmiet sha Beria; kiba haba ki la lah poi hangta, ki la ïaleit sha ka synagog ki Jiw. 11Kine te ki la long kiba kham don akor ban ïa kita kiba ha Thessaloni, kiba la pdiang ïa kata ka ktien da ka jingsngew-la-kloi baroh, ha la ka sngi ki da ïitbniah ïa Ki Jingthoh, la kine kiei kiei ruh ki lah long kumta ne em. 12Namar kata keiñ, bun na ki, ki la ngeit; na ki kynthei Grik ruh ki bakhraw batri, bad na ki rangbah de ym khyndiat. 13Hynrei, ynda ki Jiw kiba na Thessaloni ki la bna ba ha Beria ruh la ïalap da u Paul ïa ka ktien U Blei, ki la ïawan hangta ruh, ki da ïapynkhih bad pynkulmar ïa ki paidbah. 14Te kumta, mar mar kita ki parabangeit ki la ïaphah noh ïa u Paul ban leit shaduh rud duriaw; hynrei, u Silas bad u Timothi ki la ïanangsah hangta. 15Hynrei, kita kiba la leit on ïa u Paul, ki la ïalam ïa u haduh Athen; bad haba ki la ïoh ka hukum ïa u Silas bad ïa u Timothi ba kin wan ha u kloi kloi katba lah, ki la ïaleit wan noh.

U Paul ha Athen

16Te katba u Paul u ap khmih lynti ïa ki ha Athen, la pynkhih buk ïa ka mynsiem jong u hapoh jong u haba u khmih ïa kata ka nongbah ba ka dap da ki bleithaw. 17Kumta, u la ïa-pyni nia ha ka synagog bad ki Jiw bad kita ki bariewblei ruh, bad ha ka jaka ïew ha la ka sngi ruh bad kita kiba ïakynduh bad u. 18Bad la don ki riewstad na ki Epikuri bad na ki Stoik kiba la ïaleh nia bad u: te don kiba la ïa-ong, “Ine iba blab blab i mon ban ong aïu?” Hynrei, kiwei pat, “U i kumba u long u nongïalap ïa ki blei khyllah”; naba u la ïalap ïa U Jisu bad ïa ka jingmihpat. 19Te ynda ki la kem ïa u, ki la ïalam noh ïa u sha u lum Ariopagos, ki da ong, “Ngi lah ban tip kaei kane ka jinghikai bathymmai ïa kaba me ïalap? 20Namar me wallam ïa kiei kiei ruh kiba khyllah sha ki shkor jong ngi; namar kata, ngi kwah ban tip, ki mut aïu kine kiei kiei ruh.” 21(Te ki nong Athen baroh bad ki sohshnong kiba shong basa hangta, kim ju kloi ïa kaei kaei ruh kawei pat, hynrei, tang ban ïathuh lane ban ïohsngew ïa kaei kaei kaba kham thymmai.)

22Te u Paul u la ïeng hapdeng uta u lum Ariopagos, bad u la ong, “Ko rangbah Athen, nga ïohi ha kiei kiei baroh ba phi long kiba kham shait mane blei: 23namar haba nga ïaid bad nga khmih thuh ïa kiei kiei ruh ki jingmane jong phi, nga la shem ka duwan ha kaba la don ka jingthoh kum kane, ‘Ha U Blei ïa u bymithuh.’ Ïa uba phi ïamane namar kata khlem da ithuh, ïa une keiñ nga ïalap ha phi: 24#Isa. 42:5.uta U Blei keiñ uba la thaw ïa ka pyrthei, bad ïa kiei kiei baroh kiba don ha ka, uba haba u long U Trai ka bneng bad ka khyndew, um shong ha ki ïing blei ba la thaw da ki kti; 25lymne ym ju shakri ïa u da ki kti ki briew, kumba u da kyrduh ei ei ruh, haba u hi u ai ha ki baroh ïa ka jingim, bad ka mynsiem, bad ïa kiei kiei baroh ruh; 26u la thaw ruh na kawei ka snam ïa u kynja bynriew baroh, ïa ka ban shong halor ka khyndew baroh, haba u la pynthikna ïa ki aïom ba la buh, bad ïa ki pud ka jaka shong jong ki; 27ïa ka ban wad khnang ïa U Blei, ïoh lehse kumno kumno kin da ïoh tare nadien jong u, bad shem ïa u, la um long jngai na uwei pa uwei na ngi: 28namar,

“ ‘ha u ngi im, bad ngi khih,

bad ngi long de;’

“kumba kiba na ki nongthaw jingrwai jong phi hi ruh ki la ong,

“ ‘Namar ngi long ruh

ki khun ki ksiew jong u.’

29“Te haba ngi long ki khun ki ksiew jong U Blei, ym dei ïa ngi ban mut ba Ka Jinglong Blei ka long syriem ïa ka ksiar lane ïa ka rupa lane ïa u maw, ba la pynlong dur da ka kam stad bad ka buit jong u briew. 30U Blei, namar kata, u la leh kum bym khmih ïa ki aïom ka jingbymtip, hynrei, mynta, u hukum ïa ki briew baroh kylleng la kylleng ban kylla-ka-bamut; 31#Salm. 9:8; 96:13; 98:9.naba u la buh ka sngi ha kaba un sa bishar ïa ka pyrthei ha ka hok da uta u briew ïa uba u la thung; shaphang kata, u la ai ka jingpynskhem ha ki briew baroh, da kaba u la pynmih pat ïa u na ki baïap.”

32Te haba ki la ïohsngew shaphang ka jingmihpat ki baïap, don kiba la beiñ; hynrei, kiwei pat ki la ong, “Ngin ïasngew ïa me pat shaphang kane.” 33Kumta te u Paul u la leit noh napdeng jong ki. 34Hynrei, don ki rangbah kiba la ïasnoh lok ha u bad ki la ngeit; hapdeng kita don u Dionisios ruh, uwei u rangbah ka dorbar Ariopagos, bad ka kynthei kaba kyrteng “ka Damaris”, bad kiwei pat lem bad ki.

Currently Selected:

KI KAM 17: KHB

Highlight

Copy