KI KAM 16

U Timothi u synran ïa u Paul bad u Silas

1Te u la wan sha Derbi bad Lystra: ha khmih ruh, la don hangta uwei u synran uba kyrteng “u Timothi”, u khun kawei ka Jiw kaba ngeit, hynrei, u kpa jong u, u Grik: 2ïa uba la phla babha da kita ki parabangeit kiba ha Lystra bad ha Ikoniom. 3Ïa une, u Paul u la imon ba un leit ryngkat bad u; te haba u la shim u la otsher ïa u, na ka bynta kita ki Jiw kiba don ha kita ki phang; naba baroh ki la tip ba u kpa jong u, u long u Grik. 4Te katba ki dang ïaleit lyngba ïa kita ki shnong, ki la aiti ha ki ban sumar ïa kita ki jingrai kiba la lah ïakut da ki apostol bad ki tymmen basan kiba ha Jerusalem. 5Kumta, la pynskhem ïa kita ki balang ha kata ka jingngeit, bad ki la man bun ha ka jingkheiñ ha la ka sngi.

Ka jingithuhpaw u Paul ha Troas

6Te ki la ïaleit lyngba ïa ka ri Phrygia bad Galatia, ba la pynpep ïa ki da U Mynsiem Bakhuid ban ïalap ïa kata ka ktien ha Asia; 7bad haba ki la ïapoi haduh Mysia, ki la ïapyrshang ban leit sha Bithynia; te U Mynsiem jong U Jisu um shah ïa ki. 8Bad ynda ki la ïa-ïaid kiar ïa ka Mysia, ki la ïaleit hiar sha Troas. 9Te ka jingithuhpaw ka la paw ha u Paul mynmiet; uwei u briew uba na Makedonia u la ïeng, u da kyrpad ïa u, bad u da ong, “To wan sha shiliang sha Makedonia bad to ïarap ïa ngi.” 10Te haba u la ïohi ïa kata ka jingithuhpaw, shisyndon ngi la ïapyrshang ban leit noh sha Makedonia, ngi da ïarai jingmut ba U Blei u la lah khot khnang ïa ngi ïa ka ban ïalap ïa ka gospel ha ki.

La pynbaptis ïa ka Lydia

11Namar kata, ynda ngi la ïaid lieng na Troas, ngi la leit beit sha Samothraki, bad kum lashai sha Neapolis; 12nangta ruh sha Philipi, kaba long ka nongbah ka banyngkong ha kata ka bynta ka jong ka Makedonia, kaba la buhai ki Rom: te ngi la ïashong ha kata ka nongbah katto katne sngi. 13Te ha ka sngi Sabbaton ngi la ïaleit shabar shnong harud ka wah, ha kaba ngi la tharai ba la don ka jaka duwai; bad ynda ngi la ïashong, ngi la kren ha ki kynthei kiba la wan ïaseng lang. 14Te kawei ka briew kaba kyrteng “ka Lydia”, ka nongdie jaiñ saw bthuh na ka shnong Thiateira, kaba mane ïa U Blei, ka la sngew ïa ngi; ïa ka dohnud jong ka U Trai u la plie wang, ban shahshkor ïa kita kiei kiei ruh ïa kiba la ïalap da u Paul. 15Te ynda la pynbaptis ïa ka, bad ïa ki ba-ha-ïing jong ka, ka la kyrpad ïa ngi, ka da ong, “Lada phi la rai ba nga long kaba ngeit ha U Trai, to wan shong ha ïing jong nga.” Ka la pynkohnguh ruh ïa ngi.

Ha ka ïing byndi ha Philipi

16Ka la jia ruh, haba ngi dang ïaleit sha ka jaka duwai, ba kawei ka shakri kaba shong ksuid ba kren blei ka la ïakynduh bad ngi, kaba ju pynïoh shibun ka jingmyntoi ïa ki kynrad jong ka da kaba kren byrtong. 17Kane, haba ka bud jan ïa u Paul bad ïa ngi, ka la pyrta, ka da ong, “Kine ki briew ki long ki shakri jong U Blei U Bahakhlieh Tam Eh, kiba pynbna ha phi ïa ka lynti ka jingpynim!” 18Ïa kane te ka la leh bun sngi. Hynrei, u Paul, haba u la sngewsatia eh, u la phai dien, bad u la ong ha uta u ksuid, “Nga hukum ïa me ha ka kyrteng U Jisu Khrist ban mih noh na ka.” Bad ha kata kajuh ka por u la mih noh.

19Hynrei, haba kita ki kynrad jong ka ki la ïohi ba ka jingkyrmen kata ka nong jong ki ka la duh noh, ki la kem ïa u Paul bad ïa u Silas, bad ki la ïaring noh ïa ki sha ka jaka ïew, ha khmat ki nongsynshar; 20te ynda ki la ïalam ïa ki ha ki majistor, ki la ong, “Kine ki briew, kiba long ki Jiw, ki ïa-pynkhihwin jlang ïa ka shnong jong ngi: 21bad ki ïalap ïa ki niam ki rukom ki bymdei ïa ngi kiba long ki Rom ban pdiang lymne ban leh.” 22#2 Kor. 11:25.Uta u paidbah te u la ïeng lang ban ïaleh ïa ki: bad kita ki majistor haba ki la ïapatar ïa ki jaiñ jong ki, ki la hukum ban shoh da ki thri ïa ki. 23Te ynda ki la lah sympat ïa ki bun thri, ki la set ïa ki ha ka ïing byndi, ki da hukum skhem ïa u nongap byndi ban ap phira bha ïa ki; 24uba haba u la ïoh ka hukum kat kata, u la set ïa ki ha kata ka ïing byndi kaba kham shapoh, bad u la pynskhem ïa ki kjat jong ki ha ki dieng song.

25Hynrei, hamar kaba shiteng synñia, u Paul bad u Silas ki la ïaduwai, bad ki la ïarwai ïaroh ïa U Blei, bad ki nongsah byndi ki la shahshkor ïa ki. 26Te shisyndon la jia ka jingkhynñiuh jumai kaba khraw, kat ban pynkhynñiuh noh ïa ki nongrim jong kata ka ïing byndi; te kumne kumne ruh la plie wang ïa ki jingkhang baroh, bad ïa ki kynjri jong ki baroh la loit noh ruh. 27Te uta u nongap byndi, haba la pynkyndit ïa u na kaba ïohthiah, bad ba u la ïohi ba la plie wang ïa ki jingkhang jong kata ka ïing byndi, u la sei noh ïa la ka waitlam sa ban pynïap noh ïa lade, u da tharai ba kita ki nongsah byndi ki la ïaphet noh. 28Hynrei, u Paul u la pyrta noh da ka ktien bajam, u da ong, “Wat pynmynsaw ïa lade, naba ngi don hangne baroh!” 29U te u la pan ïa ki jingshai, bad u la rynsied kynsan shapoh, bad ba u la khynñiuh namar kaba sheptieng, u la dem khop#16:29 dem khop: Dem khrup. ha khmat u Paul bad u Silas, 30bad u la ïalam noh ïa ki shabar, bad u la ong, “A kynrad, aïu ka dei ïa nga ban leh ba yn pynim ïa nga?” 31Ki te ki la ïathuh, “To men ngeit ha U Jisu uba U Trai, bad yn sa pynim ïa me bad ïa ka ïing jong me.” 32Ki la ïalap ruh ïa ka ktien U Trai ha u, bad ha baroh kiba ha ïing jong u. 33Te u la shim ïa ki ha kata kajuh ka por mynmiet, bad u la sait noh ïa ki jingmong jong ki; bad la pynbaptis ïa u, ma u bad ki jong u baroh, kumne kumne ruh. 34Bad u la ïalam ïa ki sha ka ïing jong u, bad u la buh jingbam ha khmat jong ki, bad u la sngewkmen eh lem bad ka ïing jong u baroh kawei ba ki la ïangeit ha U Blei.

35Te haba la mih ka sngi, ki majistor ki la phah da ki piada, ki da ong, “Pyllait noh ïa kita ki briew.” 36Uta u nongap byndi te u la ïathuh ïa kine ki ktien ha u Paul, “Ki majistor ki la phah pyllait noh ïa phi: mynta namar kata ale mih noh, bad leit noh ha kaba suk.” 37Hynrei, u Paul u la ong ha ki, “Ki la sympat ïa ngi ha kaba paw khlem da bishar, haba ngi long ki trai-shnong Rom, bad ki la set ïa ngi ha byndi; te mynta ki shu pyllait jar jar ïa ngi? Ym kumta phi; hynrei, ai kin da wan hi bad ïalam noh ïa ngi shabar.” 38Te kita ki piada, ki la ïathuh pat ïa kine ki ktien ha ki majistor; te ki la sheptieng haba ki la ïohsngew ba ki long ki trai-shnong Rom; 39bad ki la wan bad ki la ïakyrpad noh ïa ki; bad haba ki la ïalam noh ïa ki shabar, ki la ïakyrpad ïa ki ban leit noh na kata ka shnong. 40Te ki la ïaleit noh na kata ka ïing byndi, bad ki la leit rung ha ka ïing ka Lydia: bad haba ki la lah ïohi ïa ki parabangeit, ki la pyntngen ïa ki, bad ki la leit noh.

Currently Selected:

KI KAM 16: KHB

Highlight

Copy